អត្ថបទពាណិជ្ជកម្ម
ដើមឈើជិត១០០០ដើម ត្រូវបានដាំនៅបណ្តោយផ្លូវជាតិលេខ ៦A ក្រោមកិច្ចសហការបស់សាលារាជធានីភ្នំពេញ និងក្រុមហ៊ុនភេសជ្ជៈកម្ពុជាកូកា-កូឡា
× ភ្នំពេញ៖ ក្រោមកិច្ចសហការរបស់សាលារាជធានីភ្នំពេញ និងក្រុមហ៊ុនភេសជ្ជៈកម្ពុជា កូកា-កូឡា ពិធីដាំដើមឈើចំនួន ១០០០ ដើម នៅតាមបណ្តោយផ្លូវជាតិលេខ៦អា ត្រូវបានប្រារព្ធឡើងកាលពីព្រឹកថ្ងៃទី២៧ ខែមេសា ឆ្នាំ២០២០។ ពិធីនេះ ធ្វើឡើងក្រោមអធិបតីភាពរបស់លោក នួន ផារ័ត្ន អភិបាលរងសាលារាជធានីភ្នំពេញ តំណាងដ៏ខ្ពង់ខ្ពស់របស់លោក ឃួង ស្រេង អភិបាលសាលារាជធានីភ្នំពេញ, ភារធារី Michael Newbill តំណាងខ្ពង់ខ្ពស់របស់ឯកអគ្គរដ្ឋទូតអាមេរិកប្រចាំនៅកម្ពុជា និងលោក មាស វុត្ថា នាយកផ្នែកលក់ប្រចាំប្រទេសរបស់ក្រុមហ៊ុន។
លោក មាស វុត្ថា នាយកផ្នែកលក់ប្រចាំប្រទេសរបស់ក្រុមហ៊ុនកូកា-កូឡា បានថ្លែងក្នុងពិធីនេះថា៖ «សកម្មភាពនៅថ្ងៃនេះ គឺជាសកម្មភាពមួយ នៃគម្រោងរបស់ក្រុមហ៊ុនក្រោមឈ្មោះថា «កំណើនបៃតង ឬ Green Growth» ដែលមានចក្ខុវិស័យ ជួយបង្កើនទម្រង់បៃតងនៅកម្ពុជា ក៏ដូចជាសរបញ្ជាក់ពីឆន្ទៈ របស់ក្រុមហ៊ុនកូកា-កូឡា ក្នុងការរួមចំណែកជាមួយរាជរដ្ឋាភិបាល អនុវត្តនូវគោលនយោបាយពាក់ព័ន្ធ នឹងផែនការយុទ្ធសាស្ត្រជាតិឆ្លើយតបនឹងការប្រែប្រួលអាកាសធាតុ ក៏ដូចជាគាំទ្រទស្សនវិស័យរបស់កម្ពុជាឆ្ពោះទៅរកការអភិវឌ្ឍបៃតង និងការគ្រប់គ្រងការបញ្ចេញកាបូននិចនៅកម្ពុជា»។
លោកបានបន្តទៀតថា ក្រុមហ៊ុនពិតជាមានក្តីមោទកភាព ដែលបានចូលរួមជាមួយរដ្ឋាភិបាល និងដៃគូសហការ ក្នុងការបង្កើតឲ្យមានសមិទ្ធផលនៅថ្ងៃនេះ ហើយនៅមានសកម្មភាពសហគមន៍ជាច្រើនទៀត ដែលនឹងត្រូវអនុវត្តបន្តតៀត បន្ទាប់ពីឆ្លងផុតគ្រាដ៏តានតឹងនេះ។
សម្រាប់ លោក នួន ផារ័ត្ន អភិបាលរងនៃគណៈអភិបាលសាលារាជធានីភ្នំពេញ ក៏មានប្រសាសន៍នៅក្នុងឱកាសនោះថា រាជធានីភ្នំពេញមានផែនការមេមួយចំនួន ជាពិសេសប្លង់គោលប្រើប្រាស់ដីធ្លីឆ្នាំ ២០១៥-២០៣៥ រួមទាំងប្លង់គោលប្រឡាយ លូមេ ប្លង់គោលប្រព័ន្ធដឹកជញ្ជូន កីដូចជាគម្រោងឈានទៅរក ការរៀបចំនូវប្លង់មេ សម្រាប់ការអភិវឌ្ឍទីក្រុងវៃឆ្លាត ក៏ដូចជាទីក្រុងដែលមាននិរន្តរភាព ក្នុងនោះការពង្រីកនូវគម្របបៃតង គឺជាចំណុចអាទិភាពមួយ។ សម្រាប់អភិបាលរងរាជធានី ការដាំដើមឈើថ្ងៃនេះ គឺជាការបោះជំហានតូចមួយទៀត នៅក្នុងដំណើរដ៏វែងឆ្ងាយ ក្នុងការអភិវឌ្ឍរាជធានីភ្នំពេញ ជាពិសេសទាំងផ្នែកសោភណភាព និងបរិស្ថាន។ លោក នួន ផារ័ត្ន បានបន្ថែមទៀតថា ៖«ការដាំដើមឈើ គឺជាការបណ្តុះនូវក្តីសង្ឃឹមផងដែរ ប្រសិនបើមានការថែទាំល្អ ក្នុងរយៈពេលប្រាំទៅដប់ឆ្នាំទៀត យើងនឹងទទួលបាននូវម្លប់ដ៏ត្រជាក់ និងសោភណភាពដ៏ស្រស់ស្អាតសម្រាប់រាជធានីយើង»។
លោក នួន ផារ័ត្ន ក៏បានឆ្លៀតឱកាសនេះ ថ្លែងអំណរគុណចំពោះអង្គភាពពាក់ព័ន្ធទាំងអស់ ក៏ដូចជាក្រុមហ៊ុនកូកា-កូឡាកម្ពុជា ដែលបានសហការរៀបចំកម្មវិធីដ៏មានសារៈសំខាន់ នៅក្នុងថ្ងៃនេះ។
សម្រាប់ក្រុមហ៊ុនកូកា-កូឡា សកម្មភាពក្នុងថ្ងៃនេះ គឺជាសក្ខីភាព បញ្ជាក់ពីគោលជំហររបស់ក្រុមហ៊ុនថា ទោះបីជាពួកយើង កំពុងស្ថិតក្នុងគ្រាដ៏លំបាកយ៉ាងណាក៏ដោយ ក្រុមហ៊ុននឹងមិនបំភ្លេច និងនៅតែបន្តចូលរួមជាមួយរដ្ឋាភិបាល ព្រមទាំងដៃគូសហការផ្សេងទៀត ក្នុងការអនុវត្តសកម្មភាពសង្គម។ ហើយក្រុមហ៊ុន នៅមានគម្រោងជាច្រើនទៀត រួមមានការផ្ដល់ប៉មចម្រោះទឹកស្អាត ការលើកកម្ពស់សហគ្រិនជាស្ត្រី និងគម្រោងពិភពលោកគ្មានសំរាម ដែលបានត្រៀមរួចជាស្រេច ដើម្បីអនុវត្តនៅក្នុងកាលៈទេសៈសមស្រប នាពេលខាងមុខ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com