ថៃ ពន្យារពេលដាក់ប្រទេសក្នុងភាពអាសន្នដល់ចុងខែឧសភា

COVID-19

អន្តរជាតិ

ថៃ ពន្យារពេលដាក់ប្រទេសក្នុងភាពអាសន្នដល់ចុងខែឧសភា

27, Apr 2020 , 4:39 pm

រូបភាព

លោកប្រាយុទ្ធ ចន្ទអូចា និងមន្រ្តីពាក់ព័ន្ធ។ រូបភាព៖ The Thaiger

ដោយ: ធៀន ភារិន្ទ

ថៃ បានប្រកាសពន្យារពេលដាក់ប្រទេសក្នុងភាពអាសន្ន រយៈពេលមួយខែបន្ថែមទៀត ដើម្បីទប់ស្កាត់ជំងឺរលាកសួត ដែលបង្កដោយកូរ៉ូណាវីរុស (COVID-19) បើទោះបីករណីឆ្លងនៅក្នុងប្រទេស មានការធ្លាក់ចុះក៏ដោយ។ ការប្រកាសពន្យារពេលដាក់ប្រទេសក្នុងភាពអាសន្ននេះ ធ្វើឡើងនាថ្ងៃទី២៧ ខែមេសា។

មួយរយៈចុងក្រោយនេះ ថៃបានរកឃើញចំនួនអ្នកផ្ទុកCOVID-19 ថ្មី ដែលធ្លាក់ចុះបន្តិចម្តងៗ។ ថៃមានអ្នកជំងឺថ្មីត្រឹមតែ ៩ករណីប៉ុណ្ណោះ នៅថ្ងៃទី២៧ ខែមេសា បើធៀបនឹងថ្ងៃទី២៦ ខែមេសា ដែលមានចំនួន ១៥ករណី។ តួលេខសរុបនៅប្រទេស គឺមានចំនួន ២៩៣១ករណី ចំណែកអ្នកស្លាប់ដោយសារ COVID-19 សរុបមាន ៥២ករណី។

បើទោះបីជា ថៃមានករណីឆ្លងនៅក្នុងប្រទេសតិចក៏ដោយ ប៉ុន្តែប្រទេសក្នុងតំបន់អាស៊ីអាគ្នេយ៍មួយនេះ បានបន្ថែមរយៈពេលដាក់ប្រទេស ក្នុងភាពអាសន្នរយៈពេល ១ខែទៀត បន្ថែមពីលើរយៈពេលចាស់ ដែលនឹងផុតកំណត់នៅថ្ងៃទី៣០ ខែមេសា។ នេះបើតាមការចុះផ្សាយរបស់កាសែត Bangkok Post។

បើតាមការបញ្ជាក់របស់អ្នកនាំពាក្យមជ្ឈមណ្ឌលគ្រប់គ្រងស្ថានការណ៍COVID-19 ថៃ (CCSA) លោក Taweesilp Visanuyothin ច្បាប់ស្តីពីការដាក់ប្រទេសក្នុងភាពអាសន្ន នឹងពន្យាររហូតដល់ដំណាច់ខែឧសភា។ ការបន្ថែមរយៈពេលដាក់ប្រទេសក្នុងភាពអាសន្ននេះ ធ្វើឡើង ដោយសារតែមានការព្រួយបារម្ភពីការវិលត្រលប់នៃកូរ៉ូណាវីរុស ខណៈពេលមជ្ឈមណ្ឌល គ្រប់គ្រងស្ថានការណ៍ COVID-19 កំពុងតែញាប់ដៃជើងប្រយុទ្ធជាមួយជំងឺឆ្លងសកលមួយនេះ។

បើគ្មានការប្រែប្រួលអ្វីទេ បម្រាមគោចរនៅពេលយប់ ការហាមឃាត់ការជួបជុំគ្នា ការកំណត់ការធ្វើដំណើរឆ្លងខេត្ត និងវិធានការផ្សេងទៀត នៅតែបន្តអនុវត្តដដែល។ ពាក់ព័ន្ធនឹង ការបន្ថែមរយៈពេលដាក់ប្រទេសក្នុងភាពអាសន្ននេះ ក្រុមប្រឹក្សាសន្តិសុខជាតិ បានប្រាប់កិច្ចប្រជុំ ដែលដឹកនាំដោយលោកនាយករដ្ឋមន្ត្រី ប្រាយុទ្ធ ចន្ទអូចា ថា ការពន្យារពេលបិទប្រទេសនេះ គឺធ្វើតាមការគាំទ្ររបស់ប្រជាជន តាមរយៈការស្ទង់មតិ។ ប៉ុន្តែក្រុមប្រឹក្សានេះ មិនបានលំអិតពីព័ត៌មានស្ទង់មតិរបស់ប្រជាជនតាមរប្រៀបណាឡើយ។

សូមបញ្ជាក់ថា បើទោះបីជាថៃមានករណីCOVID-19 សរុបជិត ៣ពាន់ករណីក៏ពិតមែន ប៉ុន្តែថៃក៏បានព្យាបាលអ្នកជំងឺឲ្យជាសះស្បើយ បានចំនួនច្រើនផងដែរ ពោលគឺមានចំនួន រហូតដល់ទៅ ២៦០៩ករណីឯណោះ។ អ្នកជំងឺ កំពុងសម្រាកព្យាបាលនៅថៃមានចំនួនសរុប ២៧០ករណី៕