ជាតិ
សង្គមជាតិ
លោក ខៀវ កាញារីទ្ធ លុបអាជ្ញាបណ្ណ CKV TV ដែលផ្សាយប៉ះពាល់ដល់សណ្តាប់ធ្នាប់សាធារណៈ
សកម្មភាពលោក ចាន់ ឫទ្ធី ចាងហ្វាយស្ថាប័នព័ត៌មាន CKV TV ដែលចុះទៅរាយការណ៍ព័ត៌មាននៅសង្កាត់ចោមចៅទី១ ខណ្ឌពោធិ៍សែនជ័យ កាលពីថ្ងៃទី២៥ ខែមេសា ឆ្នាំ២០២០
×![]()
ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានសម្រេចលុបអាជ្ញាបណ្ណគេហទំព័រ ចក្រវាឡ ធីវីអនឡាញ (CKV TV) ដែលមានលោក ចាន់ ឬទ្ធី ជាចាងហ្វាង។ តាមប្រកាសចុះថ្ងៃទី២៧ ខែមេសា លោករដ្ឋមន្ត្រីបានពិនិត្យឃើញថា ម្ចាស់អាជ្ញាបណ្ណបានធ្វើសកម្មភាពយកព័ត៌មានដែលនាំឲ្យប៉ះពាល់ដល់សណ្តាប់ធ្នាប់សាធារណៈ និងបំពានកិច្ចសន្យាជាមួយក្រសួងព័ត៌មាន។
មុនឈានដល់ការសម្រេចលុបអាជ្ញាបណ្ណរបស់ស្ថាប័នព័ត៌មាននេះ កាលពីថ្ងៃទី២៥ ខែមេសា លោក ចាន់ ឬទ្ធី បានចុះទៅរាយការណ៍ព័ត៌មានផ្ទាល់នៅផ្ទះពលរដ្ឋក្នុងសង្កាត់ចោមចៅទី១ ខណ្ឌពោធិ៍សែនជ័យ ដោយរាយការណ៍ថា មានម្ចាស់អាជីវករមួយរំលោភបំពានផ្លូវថ្នល់សាធារណៈសម្រាប់បើកអាជីវកម្ម និងបានចោទសួរទៅម្ចាស់អាជីវកម្មពីទំនាស់រវាងអ្នកជិតខាងថាមិនអនុញ្ញាតឲ្យសាងសង់ផ្ទះដែលជាប់របងគ្នា។
កន្លងមក ម្ចាស់គេហទំព័រ CKV TV ក៏ធ្លាប់ត្រូវបានថ្នាក់ដឹកនាំក្រសួងព័ត៌មាន ហៅទៅធ្វើកិច្ចសន្យាផងដែរ ដោយសារតែការប្រើពាក្យពេចន៍ និងកាយវិការមិនសមរម្យ ដែលនាំឲ្យមានការរិះគន់ដល់វិជ្ជាជីវៈសារព័ត៌មាន។
លោក ចាន់ ឬទ្ធី ធ្លាប់ទទួលបានការណែនាំផ្ទាល់ពីសំណាក់លោក យ៉ែម ណយ ទីប្រឹក្សាក្រសួងព័ត៌មាននិងជាប្រធាននាយកដ្ឋានមណ្ឌលព័ត៌មាន ដល់ទៅ២លើក ហើយកាលពីថ្ងៃទី១៦ ខែមីនា ចាងហ្វាង CKV TV រូបនេះ បានសន្យាមិនឲ្យមានជាលើកទី៣។
កន្លងមកក្រសួងព័ត៌មានបានលុបចោលអាជ្ញាបណ្ណ TVFB និងFBTV ក្រោមហេតុផលផ្សព្វផ្សាយព័ត៌មានបែបញុះញ៉ង់ បង្កឲ្យប៉ះពាល់ដល់សន្តិសុខ សណ្តាប់ធ្នាប់ និងសុវត្ថិភាពសង្គមជាតិ កាលពីថ្ងៃទី៨ ខែមេសា ឆ្នាំ២០២០៕
Tag:
សារព័ត៌មាន
ក្រសួងព័ត៌មាន
© រក្សាសិទ្ធិដោយ thmeythmey.com
