ខណៈដែលរាជរដ្ឋាភិបាលកម្ពុជា លើកទឹកចិត្តអោយស្ថាប័នអប់រំនានា បន្តជួយសិស្សនិស្សិត ដើម្បីបន្ត បង្កើនចំណេះដឹង រួមទាំងការសិក្សាតាមប្រព័ន្ធអេឡិចត្រូនិក ឬ ពីចម្ងាយដើម្បីចៀសវាងនូវជំងឺកូវីដ១៩ មជ្ឈមណ្ឌលអូស្ត្រាលីសំរាប់ការបណ្តុះបណ្តាល (សាលាអេស៊ីអ៊ី) បានផ្តល់ជូនសិស្សនិស្សិតរបស់ខ្លួន នូវការសិក្សាពីចម្ងាយដែលអាចអោយសិស្សនិស្សិតបានរៀន និងមានទំនាក់ទំនងផ្ទាល់ ជាមួយលោកគ្រូអ្នកគ្រូ និងមិត្តរួមថ្នាក់ពីចម្ងាយ ដោយប្រើប្រាស់បច្ចេកវិទ្យា និងកម្មវិធីសិក្សា តាមប្រព័ន្ធអេឡិចត្រូនិកថ្មីទំនើប។
ជាមួយនឹងការគាំទ្រពីសំណាក់ស្ថាប័ន IDP Education ក្រោមកម្មវិធីកិច្ចការសង្គមក្នុងវិស័យអប់រំ សាលា អេស៊ីអ៊ី ប្រកាសផ្តល់ជូនសិស្សនិស្សិតនូវអាហារូបករណ៍១០០ភាគរយ សម្រាប់ការសិក្សាភាសាអង់គ្លេស រយៈពេលមួយឆ្នាំពេញ ចំនួន ២០០កន្លែង ដើម្បីសិក្សានៅសាខាណាមួយ ក្នុងចំណោមទីតាំងទាំង៦ រួមទាំងទីតាំងថ្មីនៅតាខ្មៅផងដែរ។
លោកម៉ៅ ស្រេង នាយកប្រចាំប្រទេសនៃស្ថាប័ន IDP Education និងសាលាអេស៊ីអ៊ី បានមានប្រសាសន៍ថា៖ «កំឡុងពេលដែលសាលាអេស៊ីអ៊ីគ្រប់ទីតាំង ផ្អាកការបង្រៀនក្នុងថ្នាក់ ការបង្រៀនពីចម្ងាយដោយប្រើប្រាស់ បច្ចេកវិទ្យា និងនិយាមសិក្សាធិការទំនើប ដែលអាចឱ្យសិស្សនិស្សិត សន្ទនាជាមួយលោកគ្រូអ្នកគ្រូ និងមិត្តរួមថ្នាក់ ព្រមទាំងកម្មវិធីសិក្សាតាមប្រព័ន្ធអេឡិចត្រូនិកផ្សេងៗ (education apps) កំពុង ត្រូវបានអនុវត្ត ក្នុងការបន្តផ្តល់នូវការអប់រំដែលមានគុណភាព ដល់សិស្សអេស៊ីអ៊ីទាំងអស់។ ហើយតាមរយៈការផ្តល់ អាហារូបករណ៍មួយឆ្នាំពេញចំនួន២០០កន្លែងនេះ នឹងផ្តល់ឱកាសនូវការអប់រំដែលមានគុណភាព ដល់សិស្សនិស្សិត ដែលអាចជួបការលំបាកក្នុងការបន្តការសិក្សា ដែលមានប្រសិទ្ធភាព ឬមានកង្វះខាតផ្នែកហិរញ្ញវត្ថុ ក្នុងកំឡុងពេលដ៏លំបាកនេះ»។
លោក Ashley Irving ចាងហ្វាងសាលាអេស៊ីអ៊ី បានថ្លែងថា៖ « ដើម្បីបន្តជ្រោមជ្រែងការសិក្សារបស់សិស្ស នៅគេហដ្ឋាន ក្រុមការងារបច្ចេកទេសខាងអប់រំតាមប្រព័ន្ធអេឡិចត្រូនិក បាន និងកំពុងខិតខំប្រឹងប្រែង អស់ពីសមត្ថភាព ក្នុងរយៈពេលប៉ុន្មានខែនេះ ដើម្បីផ្តល់ជូនសិស្ស និស្សិត នូវបទពិសោធន៍សិក្សា ដែលមានវិសាលភាព។ ក្រុមការងារយើងខ្ញុំ មិនត្រឹមតែជ្រើសរើសយកកម្មវិធីសិក្សា តាមប្រព័ន្ធអេឡិចត្រូនិក ដែលនាំមុខលើពិភពលោកដូចជា Zoom for Education, ClassDojo និង Google Classroom មកប្រើប្រាស់ប៉ុណ្ណោះទេ តែក៏បានបង្កើតនូវវីដេអូណែនាំ ថ្នាក់រៀនបង្ហាញពីគន្លឹះ នៃការរៀនពីចម្ងាយ និងថ្នាក់បង្ហាត់នូវការប្រើប្រាស់ប្រព័ន្ធសិក្សាផ្សេងៗ ដើម្បីផ្តល់ជូនដល់សិស្ស និស្សិតទាំងអស់នូវចំណេះ និងជំនាញសម្រាប់ជាប្រយោជន៍ ដល់ការសិក្សារបស់គាត់»។
ស្របពេលជាមួយគ្នានេះដែរ ក្លិបសិក្សាតាមប្រព័ន្ធអេឡិចត្រូនិកថ្មីសម្រាប់ជំនួយ និងជំរុញដល់ការសិក្សា របស់សិស្សត្រូវបានបង្កើតឡើង ដែលសិស្សនិស្សិត និងលោកគ្រូអ្នកគ្រូទាំងអស់ អាចចែករំលែកអំពី វិធីសាស្ត្រសិក្សាល្អៗ ដើម្បីអោយការសិក្សាកាន់តែមានភាពជោគជ័យ។ កញ្ញា ម៉ម ជូលីណា និងលោក Andrew Millar ដែលជាអ្នកទទួលរ៉ាប់រងនូវកិច្ចការ លើកកម្ពស់បទពិសោធន៍សិក្សា របស់សិស្សសាលា អេស៊ីអ៊ីបានមានមតិថា៖«កម្រិតនៃចំណេះដឹង និងជំនាញក្នុងការប្រើប្រាស់កម្មវិធីសិក្សា តាមប្រព័ន្ធអេឡិច ត្រូនិករបស់សិស្ស និស្សិត និងលោកគ្រូអ្នកគ្រូបានអភិវឌ្ឍយ៉ាងខ្លាំងគួរឱ្យកត់សម្គាល់»។
កញ្ញា សុខេង បញ្ចនាថ ដែលជាគ្រូបង្រៀន និងអ្នកឯកទេសផ្នែកអប់រំនៅសាលាអេស៊ីអ៊ី បានលើកឡើងថា៖ «លោកគ្រូ អ្នកគ្រូនៅសាលាអេស៊ីអ៊ី តែងតែបង្ហាញនូវអារម្មណ៍វិជ្ជមាន ក្នុងការអនុវត្តការបង្រៀនពីចម្ងាយ តាមប្រព័ន្ធអេឡិចត្រូនិក ដើម្បីជំនួយដល់ការសិក្សារបស់សិស្សនៅតាមគេហដ្ឋាន។ បច្ចេកវិទ្យា មិនអាចជំនួស គ្រូបង្រៀនបានទេ ប៉ុន្តែគ្រូបង្រៀនដែលមានភាពច្នៃប្រឌិត អាចប្រើប្រាស់បច្ចេកវិទ្យា ដើម្បីជំនួយដល់ការសិក្សារបស់សិស្ស ឱ្យមានភាពជោគជ័យ ដោយជាពិសេស ផ្តោតទៅលើគោលការណ៍ រក្សាសុខភាព និងសុវត្ថិភាពរបស់សិស្ស មាតាបិតា លោកគ្រូអ្នកគ្រូ និងបុគ្គលិកទាំងអស់ នៅក្នុងស្ថានភាពជំងឺកូវីដ-១៩នាពេលបច្ចុប្បន្ននេះ»។
ឆោម សុវណ្ណរ៉ូហ្សា ដែលជាសិស្សសាលាអេស៊ីអ៊ី កំពុងសិក្សាកម្មវិធីសិក្សាអង់គ្លេសកម្រិតទូទៅបាននិយាយថា៖ «មុនដំបូង ខ្ញុំគិតថាការរៀនតាមប្រព័ន្ធអនឡាញ មានភាពលំបាក ប៉ុន្តែក្រោយពីបានរៀនមួយរយៈមក ខ្ញុំបានឃើញថាវាមានចំណុចល្អ និងគួរអោយចាប់អារម្មណ៍ជាច្រើន ដែលធ្វើអោយខ្ញុំចង់បន្តការសិក្សាតាមប្រព័ន្ធអនឡាញ»។
ង៉ោ ពេជ្រមរកត ដែលជាសិស្សម្នាក់ក្នុងចំណោមសិស្សរាប់ម៉ឺននាក់ ដែលកំពុងសិក្សាតាមប្រព័ន្ធអេឡិចត្រូនិករបស់សាលាអេស៊ីអ៊ី បានថ្លែងថា៖« ខ្ញុំកំពុងតែសម្របខ្លួន និងទទួលបានចំណេះដឹងថ្មីៗ ហើយខ្ញុំក៏បានចូលរួមថ្នាក់បង្រៀន ពីរបៀបប្រើប្រាស់កម្មវិធីសិក្សាតា មប្រព័ន្ធអេឡិចត្រូនិក ផ្តល់ជូនដោយសាលាអេស៊ីអ៊ី។ ឥឡូវ ខ្ញុំយល់ពីរបៀបប្រើប្រាស់កម្មវិធីទាំងនោះ បានប្រសើរជាងមុន»។
សិស្សសាលាអេស៊ីអ៊ី ថន វីរបុត្រ ក៏បានចែករំលែកថា៖ «ខ្ញុំមិនដែលរៀនតាមប្រព័ន្ធអេឡិចត្រូនិកពីមុនមកទេ វាផ្តល់ឱកាសឱ្យខ្ញុំទទួលបាន នូវការសិក្សាមួយដែលសមស្រប ជាមួយរបៀបសិក្សាបែបទំនើបរបស់ខ្ញុំ»។
លោកស្រី Samira Hazari គ្រូបណ្តុះបណ្តាលនៅសាលាអេស៊ីអ៊ី ដែលបានរួមចំណែកក្នុងការបង្កើតឡើងនូវឯកសារសិក្សាសម្រាប់ការសិក្សាតាមប្រព័ន្ធថ្មីនេះ បានលើកឡើងថា៖ «សិស្សទទួលបានការបង្ហាត់ណែនាំ ក្នុងការប្រើប្រាស់កម្មវិធីសិក្សាតាមប្រព័ន្ធអេឡិចត្រូនិក ដើម្បីឱ្យពួកគាត់ ទទួលបានការសិក្សាដែលមានប្រសិទ្ធភាព»។
លោក វ៉ាន់ កុសល ដែលជាគ្រូបង្រៀននៅសាលាអេស៊ីអ៊ី ក៏បានថ្លែងថា៖ «ជាមួយនឹងកម្មវិធីសិក្សាតាមប្រព័ន្ធអេឡិចត្រូនិក សិស្សអាចទទួលបាននូវឯកសារ និងសកម្មភាពសិក្សាផ្សេងៗ ព្រមទាំងអាចចូលរួមក្នុងការងារ និងការពិភាក្សាជាក្រុម»។
លោកស្រី ហូ កុឡាប ដែលមានបុត្រម្នាក់ កំពុងសិក្សាកម្មវិធីសម្រាប់កុមារនៅសាលាអេស៊ីអ៊ី បានមានប្រសាសន៍ថា៖ «មុនដំបូងខ្ញុំឆ្ងល់ថា កូនរៀនពីផ្ទះតាមរបៀបណា ប៉ុន្តែឥឡូវខ្ញុំឃើញថា គាត់រៀនបានចេះច្រើន ហើយសប្បាយ។ ការរៀនពីចម្ងាយតាមប្រព័ន្ធអេឡិចត្រូនិក របស់សាលាអេស៊ីអ៊ី ផ្តល់នូវសកម្មភាពល្អៗឱ្យកូនខ្ញុំ ដូចពេលគាត់រៀននៅសាលាដែរ»។
លោក ចាន់ ដារ័ត្ន ដែលមានបុត្ររៀននៅសាលាអេស៊ីអ៊ីដែរក៏បានមានមតិថា៖ កូនរបស់ខ្ញុំគាត់អង្គុយរៀននៅផ្ទះ នៅពេលដែលលោកគ្រូអ្នកគ្រូគាត់អង្គុយបង្រៀនពីក្នុងថ្នាក់។ ខ្ញុំសប្បាយចិត្តដែលគាត់នៅតែបានរៀនពីចម្ងាយដោយមិនបាច់បារម្ភខ្លាចគាត់ឆ្លងជំងឺពេលចេញទៅក្រៅ។
ដើម្បីផ្តល់ឱកាសដល់សិស្ស និងនិស្សិត ទទួលបានការសិក្សាដែលមានគុណភាព អាហារូបករណ៍២០០កន្លែង សម្រាប់ការសិក្សាមួយឆ្នាំពេញ ត្រូវបានផ្តល់ជូនសម្រាប់កម្មវិធីសិក្សាសម្រាប់កុមារ អាយុពី ៨ដល់១០ឆ្នាំ កម្មវិធីសិក្សាសម្រាប់សិស្សមធ្យមសិក្សា អាយុពី ១១ដល់១៤ឆ្នាំ កម្មវិធីសិក្សាភាសាអង់គ្លេសទូទៅ សម្រាប់សិស្សអាយុចាប់ពី១៥ឆ្នាំឡើង និងកម្មវិធីសិក្សាភាសាអង់គ្លេសកម្រិតខ្ពស់ និងសម្រាប់ត្រៀមខ្លួនទៅសិក្សានៅបរទេស។
បេក្ខជន ឬ អាណាព្យាបាល អាចដាក់ពាក្យតាមរយៈប្រព័ន្ធអេឡិចត្រូនិក តាមរយៈ
https://acecambodia.org/ACEScholarship ឬទាក់ទងទៅកាន់លេខ ០៨៥ ៨០៩ ៥៨៩ / ០១៥ ៣៦០ ៨៤៦ សម្រាប់ព័ត៌មានបន្ថែម។ បេក្ខជន នឹងទទួលបានការធ្វើតេស្តវាស់ស្ទង់កម្រិតភាសាអង់គ្លេស តាមប្រព័ន្ធអេឡិចត្រូនិកដោយឥតគិតថ្លៃ ដើម្បីចូលរៀនក្នុងកម្រិតដែលត្រូវនឹងសមត្ថភាពភាសាអង់គ្លេសរបស់ខ្លួន។ ដើម្បីឱ្យបេក្ខជនទាំងអស់ ទទួលបានឱកាសស្មើៗគ្នា លក្ខខណ្ឌនៃការជ្រើសរើសរួមមាន សមភាពយេនឌ័រ ថ្នាក់ និងម៉ោងសិក្សាដែលមាននៅសាលាអេស៊ីអ៊ី តម្រូវការ និងសក្តានុពល ក្នុងការប្រើប្រាស់ជំនាញភាសាអង់គ្លេសដែលបេក្ខជនបំពេញក្នុងពាក្យសុំអាហារូបករណ៍។
បេក្ខជនជ័យលាភី នឹងចាប់ផ្តើមចូលរៀនតាមប្រព័ន្ធអេឡិចត្រូនិកនៅ ថ្ងៃទី៨ ខែឧសភា ឆ្នាំ២០២០ ហើយនឹងអាចជ្រើសរើសចូលរៀន នៅទីតាំងណាមួយក្នុងចំណោម ទីតាំងសាលាអេស៊ីអ៊ីទាំងអស់ នៅពេលណាដែលរាជរដ្ឋាភិបាលអនុញ្ញាត ឱ្យបើកសាលារៀនជាធម្មតាឡើងវិញ៕
(អត្ថបទពាណិជ្ជកម្ម)