COVID-19
អន្តរជាតិ
ប៉ូលិសបារាំង រឹបអូសម៉ាស់ខុសច្បាប់ចំនួន ១៤ម៉ឺនសន្លឹក រូបភាព៖ AFP
× ប៉ូលិសបារាំង បានរឹបអូសម៉ាស់ខុសច្បាប់ចំនួន ១៤ម៉ឺនសន្លឹក ដែលត្រៀមលក់នៅក្នុងទីផ្សារងងឹត។ នេះគឺជាចំនួនម៉ាសដ៏ច្រើនបំផុត ដែលប៉ូលិសបារាំងរឹបអូសបានចាប់តាំងពីផ្ទុះជំងឺរលាកសួត ដែលបង្កដោយកូរ៉ូណាវីរុស (COVID-19) នាពេលកន្លងមក។ ប្រតិបត្តិការចុះបង្ក្រាបនេះ ធ្វើឡើងនាថ្ងៃទី២៦ ខែមេសា។
ម៉ាស់ចំនួន១៤ម៉ឺនសន្លឹក គឺជាតួលេខដ៏ច្រើនជាងគេ ដែលសមត្ថកិច្ចបារាំងរឹបអូសបាន។ ប្រតិបត្តិការនេះ ធ្វើឡើងដើម្បីហាមឃាត់ និងប្រយុទ្ធប្រឆាំងការលក់ម៉ាស់ខុសច្បាប់ទាំងឡាយ ដែលទុកសម្រាប់បុគ្គលិកសុខាភិបាលបារាំង ខណៈពេលជំងឺ COVID-19 កំពុងតែរីកសាយភាយខ្លាំងនៅក្នុងប្រទេស ហើយសម្ភារវេជ្ជសាស្ត្រមួយចំនួន កំពុងតែខ្វះខាត។
បើតាមទីភ្នាក់ងារព័ត៌មាន AFP ក្នុងការចុះបង្ក្រាបនេះ មន្ត្រីប៉ូលិសបារាំង បានចាប់ខ្លួនបុរសចំនួន ២នាក់ នាសង្កាត់ Saint-Denis ក្នុងរដ្ឋធានីបារីស។ តាមការសាកសួររបស់ប៉ូលិស ក្នុងចំណោមពួកគេទាំងពីរ មាន១នាក់ គឺជាអ្នកជំនួញ ដែលបានទិញម៉ាស់ពីហូឡង់ក្នុងតម្លៃប្រមាណជិត ៩ម៉ឺនដុល្លារ។ ក្នុងប្រភេទម៉ាស់ទាំងនោះ ក៏មានម៉ាស់ការពារប្រភេទ FFP2 ផងដែរ។ បើតាមការអះអាងរបស់មន្ត្រីប៉ូលិស ម៉ាស់ដែលមានចំនួនដ៏ច្រើនបែបនេះ គឺត្រៀមរៀបចំលក់ឲ្យកម្មករសំណង់ ក្នុងតម្លៃដ៏ខ្ពស់មួយ។
នាខែមីនាកន្លងទៅ អាជ្ញាធរបារាំង បានរឹបអូសម៉ាស់ប្រមាណជា ៣២៥០០សន្លឹក ដែលត្រូវបានគេទិញមកពីចិន និងស្តុកទុកនៅក្នុងឃ្លាំងមួយក្បែរទីក្រុងប៉ារីស។ បន្ថែមពីលើនេះ ក្នុងខែដដែល អាជ្ញាធរបារាំងក៏បានរឹបអូសម៉ាស់ប្រមាណជា ២៨៨០០សន្លឹក ក្នុងសង្កាត់មួយ នាទីក្រុងប៉ារីសផងដែរ។
សូមបញ្ជាក់ថា គិតមកត្រឹមពេលនេះ បារាំងមានករណី COVID-19 សរុបចំនួន ១៦២១០០ករណី អ្នកស្លាប់ចំនួន ២២៨៥៦ករណី និងអ្នកជាសះស្បើយមានចំនួន ៤៤៩០៣ករណី៕
© រក្សាសិទ្ធិដោយ thmeythmey.com