រុស្ស៊ី ជាប្រទេសទី៩ មានករណីឆ្លង COVID-19 ច្រើនជាងចិន

COVID-19

អន្តរជាតិ

រុស្ស៊ី ជាប្រទេសទី៩ មានករណីឆ្លង COVID-19 ច្រើនជាងចិន

27, Apr 2020 , 11:59 pm

រូបភាព

រូបភាព៖ Anadolu Agency

ដោយ: ធៀន ភារិន្ទ

ចំនួនករណីសរុបនៃជំងឺរលាកសួត ដែលបង្កដោយកូរ៉ូណាវីរុស(COVID-19) របស់រុស្ស៊ី បានកើនលើសចិនហើយ បើគិតត្រឹមរសៀលថ្ងៃទី២៧ ខែមេសានេះ។ ការណ៍នេះ បានធ្វើឲ្យរុស្ស៊ីឈរនៅលំដាប់ទី៩ ខណៈចិនឈរនៅលំដាប់ទី១០ នៃប្រទេសមានករណីកូរ៉ូណាវីរុសច្រើន។

បើតាមវេបសាយ Worldometer នាថ្ងៃទី២៧ ខែមេសានេះ រុស្ស៊ីបានរាយការណ៍ពីអ្នកឆ្លង COVID-19 ថ្មី ចំនួន ៦១៩៨នាក់ និងអ្នកស្លាប់សរុបចំនួន ៤៧ករណី។ តួលេខC OVID-19 សរុបមានចំនួន ៨៧១៤៧ករណី និងអ្នកស្លាប់ ៧៩៤ករណី។ អត្រាដ៏ច្រើនបែបនេះហើយ បានធ្វើឲ្យរុស្ស៊ីមានចំនួនករណីសរុបច្រើនជាងចិនរហូតជិត ៥ពាន់ករណី ដោយចិនមានចំនួន ៨២៨៣០ករណី។

បើគិតចាប់តាំងពីថ្ងៃទី១៧ ខែមេសាមក ក្នុងមួយថ្ងៃៗ រុស្ស៊ីមានករណីឆ្លងថ្មីយ៉ាងហោចណាស់ ៤ពាន់ករណី ខណៈថ្ងៃខ្លះ រុស្ស៊ីមានករណីឆ្លងរហូតដល់ជាង ៦ពាន់ករណីឯណោះ។ ជាមួយនឹងតួលេខច្រើនបែបនេះ មន្ត្រីសុខាភិបាលជាន់ខ្ពស់រុស្ស៊ីព្រមានថា រុស្ស៊ីអាចនឹងមានចំនួនអ្នកឆ្លងជំងឺ COVID-19 ច្រើនក្នុងខែឧសភា បើសិនជាពលរដ្ឋមិនគោរពវិធានការនៅពេលបិទប្រទេស ជាពិសេសក្នុងអំឡុងពេលថ្ងៃឈប់សម្រាកសាធារណៈនាដើមខែឧសភា។

បើតាមទីភ្នាក់ងារព័ត៌មាន Reuters លោកស្រីAnna Popova ប្រធានផ្នែកឃ្លាំមើលសុខាភិបាលរុស្ស៊ី បានលើកឡើងថា មកទល់ពេលនេះ រុស្ស៊ីអាចបញ្ចៀសការឆ្លងយ៉ាងគំហុកបាន ហើយរុស្ស៊ីក៏បានបញ្ចៀសការឆ្លងដ៏ច្រើនបែបនេះ នាពេលខាងមុខបានដែរ ប្រសិនបើប្រជាជនចូលរួមអនុវត្តវិធានការសុវត្ថិភាព ក្នុងអំឡុងពេលឈប់សម្រាក ដែលគ្រោងនឹងធ្វើឡើងចាប់ពីថ្ងៃទី១ ដល់ថ្ងៃទី១១ ខែឧសភា។

ចាប់ពីថ្ងៃទី១ ដល់ថ្ងៃទី១១ ខែឧសភានេះ គឺជាពេលវេលារបស់ប្រជាជនរុស្ស៊ីឈប់សម្រាកពីការងារ ដំណើរកម្សាន្ត និងជួបជុំគ្រួសារជាដើម។ បើតាមលោកស្រី Popova ពេលឈប់សម្រាកនេះ គឺជាហានិភ័យខ្ពស់បំផុតសម្រាប់រុស្ស៊ី ព្រោះវាអាចបង្កឲ្យ COVID-19 រីកសាយពេញផ្ទៃប្រទេស និងកើនឡើងករណីឆ្លងយ៉ាងគំហុក។ លោកស្រីប្រធានផ្នែកឃ្លាំមើលសុខាភិបាលរុស្ស៊ី បានទទូចឲ្យប្រជាជនស្នាក់នៅផ្ទះបណ្តោះអាសន្នសិន ជាជាងធ្វើដំណើរទៅកន្លែងផ្សេង។

បន្ថែមពីលើនេះ លោក វ្ល៉ាឌីមៀ ពូទីន ប្រធានាធិបតីរុស្ស៊ី ក៏បានសម្រេចលើកពេលប្រារព្ធពិធីរំលឹកខួបទី៧៥ឆ្នាំ នៃជ័យជំនះរបស់សូវៀតក្នុងសង្គ្រាមលោកលើកទី២ផងដែរ ដែលគ្រោងនឹងប្រារព្ធនៅថ្ងៃទី៩ ខែឧសភាខាងមុខនេះ៕