សិស្ស​ចិន​រាប់ម៉ឺន​នាក់​ត្រលប់​ទៅ​សាលារៀន​វិញ ខណៈ​រដ្ឋាភិបាល​បន្ធូរ​ការបិទ​ប្រទេស​
COVID-19
អន្តរជាតិ
សិស្ស​ចិន​រាប់ម៉ឺន​នាក់​ត្រលប់​ទៅ​សាលារៀន​វិញ ខណៈ​រដ្ឋាភិបាល​បន្ធូរ​ការបិទ​ប្រទេស​
27, Apr 2020 , 5:59 pm        
រូបភាព
ប្រភពរូប៖ AFP
ប្រភពរូប៖ AFP
​សិស្ស​រាប់ម៉ឺន​នាក់ បាន​ផ្ដើម​ត្រលប់​ចូល​សាលារៀន​វិញ​ហើយ​ក្នុង​រដ្ឋធានី​ប៉េកាំង និង​ទីក្រុង​សៀង​ហៃ នៅ​ថ្ងៃ​២៧ ខែមេសា ក្រោយ​រដ្ឋាភិបាល​បានសម្រេច​បិទ​សាលារៀន​រាប់​ខែ​ក្នុង​គោលដៅ​ទប់ស្កាត់​ការរីក​រាលដាល​នៃ​ជំងឺ COVID-19 ។ ការវិល​ចូលរៀន​វិញ​របស់​សិស្ស​ចិន​នេះ ធ្វើឡើង​ខណៈ​ទីក្រុង​សំខាន់ៗ​របស់​ចិន កំពុង​វិល​ត្រលប់​ទៅកាន់​សភាព​ធម្មតា​វិញ ជា​បណ្ដើរៗ​ហើយ​។

 
​សិស្ស​នៅ​ក្រុង​សៀង​ហៃ ដែល​ស្ថិតនៅ​ឆ្នាំ​ចុងក្រោយ​នៃ​ថ្នាក់​អនុវិទ្យាល័យ និង​ថ្នាក់​វិទ្យាល័យ បាន​ត្រលប់​ចូល​អង្គុយ​ក្នុង​បន្ទប់រៀន​ពួកគេ​វិញ ខណៈ​នៅ​ប៉េកាំង មានតែ​សិស្ស​ថ្នាក់​វិទ្យាល័យ​ឆ្នាំ​បញ្ចប់​ប៉ុណ្ណោះ ដែល​អនុញ្ញាត​ឲ្យ​វិល​ចូល​អគារសិក្សា​វិញ​ដើម្បី​ត្រៀមខ្លួន​សម្រាប់​ការប្រលង​ចូល​សាកលវិទ្យាល័យ​។ 
 
​សិស្ស​ចិន​ម្នាក់ ឈ្មោះថា Meng Xianghao បាន​និយាយថា រូបគេ​បាន​បង្កើន​ការប្រុងប្រយ័ត្ន​ទ្វេដង​នៅ​ថ្ងៃទី​១​របស់ខ្លួន នៅ​វិទ្យាល័យ Chengjinglun ក្រុង​ប៉េកាំង​។ ក្នុង​កិច្ច​សម្ភាស​ជាមួយ​ទីភ្នាក់ងារ​ព័ត៌មាន AFP ក្មេងប្រុស​ជំទង់​រូបនេះ អះអាងថា​៖«​ខ្ញុំ​បាន​ទិញ​ម៉ាស់ ថង់​សំរាម និង​ឧបករណ៍​សម្លាប់​មេរោគ​»​។ 
 
​ចំណែក សិស្ស​វិទ្យាល័យ​អាយុ​១៨​ឆ្នាំ​ម្នាក់ទៀត ឈ្មោះថា Hang Huan និយាយ​ដូច្នេះ​ថា​៖«​ខ្ញុំ​សប្បាយចិត្ត​ពន់ពេក​។ វា​យូរណាស់​ហើយ​ចាប់តាំងពី​ខ្ញុំ​បានឃើញ​មិត្ត​រួម​ថ្នាក់​ខ្ញុំ​។ ខ្ញុំ​នឹក​ពួកគេ​ណាស់​»​។ ដោយឡែក មុនពេល​សិស្ស​អាច​ចូល​សាលារៀន​បាន ពួកគេ​ត្រូវ​ឆ្លងកាត់​ការពិនិត្យ​កម្តៅ និង​បាញ់សម្លាប់​មេរោគ នៅ​ច្រកចូល​សាលា​ជាមុនសិន​។ 
 
​សិស្ស​នៅ​ប៉េកាំង​ម្នាក់​ឈ្មោះថា Xiao Shuhan បាន​ប្រាប់​ទីភ្នាក់ងារ​ព័ត៌មាន AFP ដែរ​ថា ខ្លួន​គិតថា ទម្រង់​ខ្លះ​នៃ​គម្លាត​សុវត្ថិភាព នឹង​នៅតែ​បន្ត​អនុវត្ត​ដដែល ទោះជា​មិត្ត​រួម​ថ្នាក់ និង​មិត្ត​ជិត​ស្និ​ទ្ធិ​ខ្លួន​ជួបជុំគ្នា​វិញ​ក៏ដោយ​ក្តី​។ ត្រង់ចំណុច​នេះ ក្មេងប្រុស​វ័យ​ជំទង់​រូបនេះ លើកឡើង​ដូច្នេះ​ថា​៖«​យើង​នឹង​លែង​ដាក់​ដៃ​លើ​ស្មា​គ្នា​ទៅវិញទៅមក​ទៀតហើយ​»​។​
 
​ទោះបី​ជោគជ័យ​ទប់ស្កាត់​ការរីក​រាលដាល​ជំងឺ COVID-19 មួយផ្នែគធំ ចិន​នៅតែមាន​កម្រិត​ប្រកាសអាសន្ន​ខ្ពស់ ដោយ​កំណើន​ករណី​ឆ្លង​នាំចូល និង​រលក​ទី​២​នៃ​ការចម្លង​ក្នុងស្រុក​នៅ​ភាគ​ឦសាន​នៃ​ប្រទេស​។ យ៉ាងណាមិញ អាជ្ញាធរ​សុខាភិបាល​ចិន នា​ថ្ងៃទី​២៦ ខែមេសា ប្រកាសថា​
 ទីក្រុង​វូ​ហាន ប្រទេស​ចិន ដែលជា​កន្លែង​ផ្ទុះ​ដំបូង​ជំងឺ​រលាក​សួត ដែល​បង្កដោយ​កូ​រ៉ូ​ណាវី​រុស (COVID-19) លែងមាន​អ្នកជំងឺ​ព្យាបាល​នៅក្នុង​មន្ទីរពេទ្យ​ទៀតហើយ​។​
 
​សូមបញ្ជាក់ថា វីដេអូ​មួយ​ដែល​ចុះផ្សាយ​ដោយសារ​ព័ត៌មាន Beijing Daily របស់​បក្ស​ក​ម្មុយ​នី​ស្ត​ចិន នៅ​ថ្ងៃទី​២៧ ខែមេសា​នេះ បង្ហាញថា សិស្ស​វិទ្យាល័យ​ថ្នាក់​បញ្ចប់​ប្រមាណ ៤៩០០០​នាក់ អង្គុយ​ក្នុង​បន្ទប់រៀន ហើយ​ពាក់​ម៉ាស់​។ ក្នុង​វីដេអូ​នេះ គ្រូបង្រៀន​លើកឡើង​ពី​សារសំខាន់​នៃ​ការយក​ជ័យជម្នះ​លើ​ជំងឺ​រាតត្បាត COVID-19 ដោយមាន​រូបលោក​ប្រធានាធិបតី​ចិន ស៊ី ជិន​ភីង នៅមុខ​កញ្ចក់​ទូរទស្សន៍​៕

Tag:
 ចិន​
  ប៉េកាំង​
  សៀង​ហៃ​
  COVID-19
  អប់រំ​
© រក្សាសិទ្ធិដោយ thmeythmey.com