COVID-19
អន្តរជាតិ
ជាង៧០០នាក់ស្លាប់ដោយសារផឹកអាល់កុលនៅអ៊ីរ៉ង់ ព្រោះគិតថាអាចព្យាបាល COVID-19
×![]()
មនុស្សជាង៧០០នាក់ នៅអ៊ីរ៉ង់បានស្លាប់ដោយសារតែផឹកអាល់កុលមេតាណុលដែលមានជាតិពុល ដោយច្រឡំថាអាចនឹងព្យាបាលជំងឺ COVID-19 ។ ករណីបែបនេះ បានហក់ឡើងខ្លាំង ខណៈដែលការឆ្លង COVID-19 ក្នុងប្រទេសនេះ មានអត្រាយ៉ាងខ្ពស់។ 
អាជ្ញាធរកោសល្យវិច័យអ៊ីរ៉ង បានបញ្ជាក់ថា ចាប់ពីថ្ងៃទី២០ ខែកុម្ភៈ រហូតដល់ថ្ងៃទី៧ ខែមេសា អ្នកដែលស្លាប់ដោយសារពុលអាល់កុល មានចំនួន៧២៩នាក់ ដែលកាលពីឆ្នាំមុនមានត្រឹមតែ៦៦នាក់ប៉ុណ្ណោះ។ នេះបើតាមការផ្សាយដោយសារព័ត៌មាន Aljazeera។
យោងតាមរបាយការណ៍របស់រដ្ឋាភិបាល ចំនួនអ្នកស្លាប់ដោយសារពុលអាល់កុលនៅអ៊ីរ៉ង់ បានកើនឡើងចំនួន១០ដង ប្រៀបធៀបកាលពីឆ្នាំមុន។ លោកKianoush Jahanpour អ្នកនាំពាក្យក្រសួងសុខាភិបាលអ៊ីរ៉ង់ និយាយថា មានមនុស្ស៥,០០១នាក់ ពុលអាល់កុលមេតាណុល និងមនុស្ស៩០នាក់បន្ថែមទៀត បាត់បង់ការមើលឃើញ ឬខូចភ្នែក ដោយសារតែការពុលអាល់កុលប្រភេទនេះ។
មេតាណុល ជាអាល់កុលមួយបែបដែលគ្មានពណ៌ និងរសជាតិ ប៉ុន្តែអាចបណ្តាលឲ្យប៉ះពាល់សរីរាង្គ និងខូចខួរក្បាលនៅពេលផឹកចូលក្នុងខ្លួន។ អាការអាចមាន ឈឺទ្រូង ចង្អោរ ដកដង្ហើមញាប់ ខ្វាក់ និងសន្លប់ជាដើម។
នៅអ៊ីរ៉ង រដ្ឋាភិបាលបានតម្រូវឲ្យអ្នកផលិតអាល់កុលមេតាណុល ដាក់បន្ថែមពណ៌សិប្បនិម្មិត ដើម្បីកុំឲ្យសាធារណជន ច្រឡំជាមួយអេតាណុល។ អេតាណុល ជាអាល់កុលមួយប្រភេទ ដែលគេប្រើសម្រាប់លាងរបួស។
គួរបញ្ជាក់ផងដែរថា អ៊ីរ៉ង់ជាប្រទេសដែលរងគ្រោះខ្លាំងបំផុត ដោយសារការផ្ទុះជំងឺ COVID-19 នៅមជ្ឈិមបូព៌ា ដោយមានអ្នកឆ្លងចំនួន៩១,៤៧២នាក់ និងស្លាប់ចំនួន៥,៨០៦នាក់៕
© រក្សាសិទ្ធិដោយ thmeythmey.com
