COVID-19
កីឡាអន្តរជាតិ
អន្តរជាតិ
លីគបាល់ទាត់អាហ្សង់ទីន សម្រេចមិនមានការកាត់ក្រុមណាមួយចេញសម្រាប់ពីររដូវកាល
× សហព័ន្ធកីឡាបាល់ទាត់អាហ្សង់ទីន (AFA) នៅថ្ងៃទី២៧ ខែមេសា បានប្រកាសថានឹងមិនមានការកាត់ចោលក្រុម ចំនួនពីររដូវកាល សម្រាប់ការប្រកួតលីគក្នុងស្រុក គិតចាប់ពីរដូវកាលនេះតទៅ។ ការសម្រេចនេះ ធ្វើឡើងដោយសារតែមានការរំខានខ្លាំង ពីជំងឺរាតត្បាត COVID-19 លើកម្មវិធីកីឡាបាលទាត់របស់ AFA។
លោក Claudio Tapia ប្រធាន AFA បានប្រាប់បណ្តាញព័ត៌មានក្នុងស្រុកមួយថា សហព័ន្ធកំពុងបញ្ចប់ការប្រកួតលីគ ដែលនៅសេសសល់រដូវកាលនេះ ហើយការសម្រេចមិនកាត់ក្រុមពីលីគកំពូលទៅលីគបន្ទាប់ នឹងត្រូវអនុម័តជាផ្លូវការនៅថ្ងៃទី២៨ ខែមេសានេះតែម្តង។
លោក Claudio Tapia ប្រធានសហព័ន្ធកីឡាបាល់ទាត់អាហ្សង់ទីន
បើតាមរបាយការណ៍របស់វេបសាយ World Meters អាហ្សង់ទីន មានករណីឆ្លងជំងឺ COVID-19 លើស៤០០០នាក់ហើយ ក្នុងនោះស្លាប់ជិត២០០នាក់ និងសះស្បើយជាង១០០០នាក់ គិតត្រឹមថ្ងៃទី២៨ ខែមេសានេះ។
ដោយសារការរីករាលដាល់ជំងឺរលាកសួតបង្កដោយកូរ៉ូណាវីរុសប្រភេទថ្មី កាលសប្តាហ៍មុនប្រធានាធិបតីអាហ្សង់ទីន លោក Alberto Fernandez បានពង្រីកការរឹតត្បឹតបន្ថែម លើកាលកំណត់របស់ខ្លួនទូទាំងប្រទេស រហូតដល់ថ្ងៃទី១០ ខែឧសភា។
ជុំវិញការប្រកួតប្រជែងដោយមិនមានការកាត់ចោលក្រុម លោក Tapia បានបន្ថែមថា សម្រាប់ក្រុមដែលត្រូវឡើងមកវិញ (Promotion) នឹងបន្តដំណើរការធម្មតា ប៉ុន្តែលោកមិនបានបញ្ជាក់ច្បាស់ថា លីគកម្រិតណានោះទេ។
ការសម្រេចខាងលើនេះ មានន័យថាការប្រកួតលីគកំពូលអាហ្សង់ទីន Copa Superliga ដែលមាន២៤ក្រុមចូលរួម ហើយគ្រោងនឹងបញ្ចប់ក្នុងការប្រកួតវគ្គជម្រុះ នៅខែឧសភា ត្រូវបានលុបចោលតែម្តង។ ដូច្នេះ មានតែការប្រកួតមួយជុំប៉ុណ្ណោះ ដែលនឹងកើតឡើងនៅពេលការប្រកួតចាប់ផ្តើមឡើងវិញ បន្ទាប់ពីការផ្អាក។
ការសម្រេចមិនកាត់ចោលក្រុមនេះ ក៏ទទួលបានការសារទរពីក្រុមបាតតារាងជំនួន៣ ដោយក្នុងនោះមានក្រុម Gimnasia ដែលដឹកនាំដោយលោក Diego Maradona ផងដែរ។ លោក Maradona ឡើងដឹកនាំក្រុម Gimnasia កាលពីខែកញ្ញា ឆ្នាំ២០១៩ ហើយបច្ចុប្បន្នក្រុមនេះ មានពិន្ទុដែលត្រូវប្រឈមការកាត់ចោលទៅលីគទីពីរ៕
Tag:
AFA
COVID-19
Claudio Tapia
© រក្សាសិទ្ធិដោយ thmeythmey.com