COVID-19
អន្តរជាតិ
ប្រមុខ WHO៖ ជំងឺ COVID-19 នៅលើផ្លូវវែងឆ្ងាយណាស់ មុនដល់ទីបញ្ចប់ អគ្គនាយក WHO លោក Tedros Adhanom Ghebreyesus - AFP
× ជំងឺរាតត្បាតសាកល គឺនៅលើផ្លូវវែងឆ្ងាយណាស់ មុននឹងដល់ទីបញ្ចប់។ ប្រមុខអង្គការសុខភាពពិភពលោក(WHO) លើកឡើងបែបនេះ នៅថ្ងៃទី២៧ ខែមេសា ដោយបង្ហាញការព្រួយបារម្ភថា COVID-19 ក៏កំពុងបង្អាក់ដំណើរការសេវាកម្មសុខភាពធម្មតាទូទៅ ជាពិសេសការផ្ដល់ប្រព័ន្ធភាពស៊ាំ ដែលអាចជួយជីវិតជូនដល់កុមារក្នុងបណ្ដាប្រទេសក្រីក្រ។
«យើងមានផ្លូវវែងឆ្ងាយណាស់នៅពីមុខយើង ហើយក៏មានការងារច្រើនសម្រាប់ធ្វើផងដែរ»។ អគ្គនាយកWHO លោក Tedros Adhanom Ghebreyesus ប្រាប់សន្និសីទព័ត៌មានតាមប្រព័ន្ធវីដេអូ ក្នុងទីក្រុងហ្សឺណែវ ប្រទេសស្វីស ដោយបន្ថែមថា រលកនៃការឆ្លងលើកទី២ អាចបង្ការទៅបានជាមួយការដាក់ចេញសកម្មភាពដ៏ត្រឹមត្រូវ។
តាមការចុះផ្សាយរបស់ទីភ្នាក់ងារព័ត៌មាន Reuters អង្គការសុខភាពពិភពលោក ព្រួយបារម្ភជុំវិញកំណើន នៃតួលេខអ្នកឆ្លងនិងស្លាប់ដោយសារ COVID-19 ក្នុងតំបន់អាហ្វ្រិក អឺរ៉ុបខាងកើត អាមេរិកឡាទីន និងបណ្ដាប្រទេសអាស៊ីខ្លះ ទោះបីជាតួលេខធ្លាក់ចុះ ក្នុងបណ្ដាប្រជាជាតិអ្នកមានមួយចំនួនខ្លះក៏ដោយក្តី។
ទាក់ទិននឹងបញ្ហានេះ លោកអគ្គនាយក Tedros បង្ហាញក្តីកង្វល់ថា សុខភាពកុមារ កំពុងរងការគំរាមកំហែងដោយសារឥទ្ធិពល នៃភាពអាសន្ន COVID-19 លើកម្មវិធីអភិវឌ្ឍវ៉ាក់សាំងសម្រាប់ជំងឺដទៃ។ ត្រង់ចំណុចនេះ លោកអះអាងដូច្នេះថា៖«កុមារប្រហែលប្រឈមហានិភ័យទាបសម្រាប់ភាពធ្ងន់ធ្ងរ និងការស្លាប់ដោយសារ COVID-19 ដែលជាជំងឺផ្លូវដង្ហើមបង្កឡើងដោយកូរ៉ូណាវីរុសថ្មី។ ក៏ប៉ុន្តែ[ពួកគេ] អាចប្រឈមហានិភ័យខ្ពស់ ចំពោះជំងឺដទៃទៀត ដែលអាចបង្ការទៅបានដោយប្រើវ៉ាក់សាំង»។
មនុស្សប្រមាណ១៣លាននាក់ រងផលប៉ះពាល់នៅទូទាំងពិភពលោក ដោយសារភាពយឺតយ៉ាវ ក្នុងការផ្ដល់ប្រព័ន្ធភាពស៊ាំប្រឆាំងជំងឺ ដូចជា ជំងឺខួរឆ្អឹងខ្នង ជំងឺកញ្ជ្រឹល ជំងឺអាសន្នរោគ ជំងឺគ្រុនលឿង និងជំងឺរលាកស្រោមខួរក្បាលជាដើម។ លោក Tedros លើកឡើងបែបនេះ ដោយបន្ថែមថា កង្វះខាតវ៉ាក់សាំងប្រឆាំងជំងឺដទៃ ត្រូវរាយការណ៍ថាកើតមានក្នុងបណ្ដាប្រទេសចំនួន២១ ដោយហេតុតែ ការរឹតត្បិតច្រកព្រំដែន និងការរំខានចរាចរណ៍ផ្លូវអាកាស។
លើសពីនោះ លោក Tedros ព្រមានទៀតថា តួលេខករណីគ្រុនចាញ់ ក្នុងអនុតំបន់សាហារ៉ាអាហ្វ្រិក អាចស្ទុះឡើងទ្វេដង។ ។ យ៉ាងណាមិញ លោកសង្កត់ធ្ងន់ថា៖«រឿងនេះពុំត្រូវកើតឡើងនោះឡើយ។ យើងកំពុងធ្វើការជាមួយបណ្ដាប្រទេសនានា ដើម្បីគាំទ្រពួកគេ»។
សូមបញ្ជាក់ថា ជំងឺCOVID-19 ដែលរកឃើញលើកដំបូងកាលពីចុងឆ្នាំ២០១៩ ក្នុងក្រុងវូហាន ប្រទេសចិន បានឆ្លងមនុស្សនៅទូទាំងពិភពលោក សរុបជាង៣លាននាក់ហើយ និងឆក់យកជីវិតមនុស្សជាង២០ម៉ឺន៕
Tag:
WHO
COVID-19
Tedros Adhanom Ghebreyesus
© រក្សាសិទ្ធិដោយ thmeythmey.com