ឡាវ នឹងលុបចោលការរឹតត្បិតខ្លះនៅថ្ងៃទី៣ ខែឧសភា បើនៅតែគ្មានករណីឆ្លង COVID-19

COVID-19

អន្តរជាតិ

ឡាវ នឹងលុបចោលការរឹតត្បិតខ្លះនៅថ្ងៃទី៣ ខែឧសភា បើនៅតែគ្មានករណីឆ្លង COVID-19

28, Apr 2020 , 9:59 pm

រូបភាព

រូបភាព៖ Xinhua

ដោយ: ធៀន ភារិន្ទ

បទបញ្ជាបិទប្រទេសឡាវទាំងស្រុង នឹងត្រូវលុបចោលនាថ្ងៃទី៣ ខែឧសភា ខាងមុខ ប្រសិនបើជំងឺរលាកសួត ដែលបង្កដោយកូរ៉ូណាវីរុស(COVID-19) នៅតែមិនត្រូវបានគេរកឃើញនៅក្នុងប្រទេស។ នេះបើតាមការបញ្ជាក់របស់គណៈកម្មការទប់ស្កាត់ និងបង្ការ COVID-19 នាថ្ងៃទី២៧ ខែមេសា។

ឡាវ បានបិទប្រទេសតាំងពីថ្ងៃទី៣០ ខែមីនា មកម្លេះ ដោយផ្អែកទៅតាមអនុក្រិត្យរបស់នាយករដ្ឋមន្ត្រីឡាវ។ តាមរយៈក្រិត្យមួយនេះ រដ្ឋាភិបាលឡាវ បានហាមឃាត់ប្រជាជនរបស់ខ្លួនទាំងអស់ មិនឲ្យចាកចេញពីផ្ទះឡើយ លើកលែងតែករណីចាំបាច់មួយចំនួនដូចជា ទៅមន្ទីរពេទ្យ ទិញម្ហូបអាហារ និងកិច្ចការងារមួយចំនួន ដែលធ្វើឡើងក្រោមបទបញ្ជារបស់រដ្ឋាភិបាល។

បទបញ្ជារបស់នាយករដ្ឋមន្ត្រីនេះ បានអស់សុពលភាពម្តងហើយនាពាក់កណ្តាលខែមេសាកន្លងមក ប៉ុន្តែត្រូវពន្យារពេលបន្ថែមទៀតទៅដល់ថ្ងៃទី៣ ខែឧសភា ដើម្បីទប់ស្កាត់ការរីកសាយភាពនៃកូរ៉ូណាវីរុសនៅក្នុងប្រទេស។

តាមរយៈកិច្ចប្រជុំរបស់គណៈកម្មការទប់ស្កាត់ និងបង្ការ COVID-19 ដែលដឹកនាំដោយឧបនាយករដ្ឋមន្ត្រី និងរដ្ឋមន្ត្រីហិរញ្ញវត្ថុ លោក Somdy Duangdy ប្រទេសឡាវ នឹងលុបចោលបម្រាមបិទប្រទេសនៅថ្ងៃទី៣ ខែឧសភា ប្រសិនបើករណីឆ្លងCOVID-19 នៅក្នុងប្រទេសនៅតែមិនមាន និងករណីឆ្លងនៅប្រទេសជិតខាងមានស្ថានភាពធូរស្រាល។ នេះបើតាមការផ្សាយរបស់សារព័ត៌មាន Laotian Times ។

ប៉ុន្តែការបើកប្រទេសឡើងវិញនេះ ក៏មិនមែនជាការបន្ធូរបន្ថយទាំងស្រុងដែរ ពោលគឺមានបម្រាមរឹតត្បិតមួយចំនួន និងអនុញ្ញាតការងារមួយចំនួន។ ការជួបប្រជុំអាចធ្វើឡើង តែមិនត្រូវលើសពីមនុស្ស ៥០នាក់ ឯការធ្វើដំណើរអាចធ្វើបាន តែនៅក្នុងខេត្តប៉ុណ្ណោះ ហើយរោងចក្រ សហគ្រាសអាចបើកឡើងវិញបាន ប៉ុន្តែត្រូវបានវិធានការពារអនាម័យ។ បន្ថែមពីលើនេះ ជើងហោះហើរនៅក្នុងប្រទេសនៅតែបន្តផ្អាក និងផ្អាកការផ្តល់ទិដ្ឋាការដល់ជនបរទេសមកពីបណ្តាប្រទេសមួយចំនួនជាដើម។

ការលុបចោលបម្រាមបិទប្រទេសនេះ នឹងអនុញ្ញាតឲ្យការងារមួយចំនួនអាចធ្វើនៅការិយាល័យវិញ សាលាមត្តេយ្យ បឋមសិក្សា អនុវិទ្យាល័យ នឹងបើកទ្វារឡើងវិញ ប្រជាជនអាចចាកចេញពីផ្ទះ ប៉ុន្តែត្រូវពាក់ម៉ាស់ឲ្យបានត្រឹមត្រូវ។

សូមបញ្ជាក់ថា គិតមកត្រឹមពេលនេះ ឡាវមានករណីCOVID-19 សរុបចំនួន ១៩ ករណី និងជាសះស្បើយចំនួន ៧ករណី៕