COVID-19
អន្តរជាតិ
ទីប្រឹក្សាលោក ត្រាំ ចោទចិនថា នាំចូលឧបករណ៍ធ្វើតេស្តរក COVID-19 ក្លែងក្លាយទៅអាមេរិក លោក Peter Navorra ទីប្រឹក្សាប្រចាំសេតវិមាន-AFP
× លោក Peter Navarro ទីប្រឹក្សាពាណិជ្ជកម្មរបស់សេតវិមាន នៅពីថ្ងៃទី២៧ ខែមេសា បានចោទចិនថា បានបញ្ជូនប្រដាប់ធ្វើតេស្ត COVID-19 ដែលមានគុណភាពអន់ និងក្លែងក្លាយមកអាមេរិក។ លោក Navarro ថែមទាំងអះអាងថា សំងំកើបផលចំណេញក្នុងពេលមានជំងឺរាតត្បាតសកល COVID-19 ផងដែរ។
យោងតាមទីភ្នាក់ងារសារព័ត៌មាន Reuters លោក Peter Navarro ដែលត្រូវបានលោក ដូណាល់ ត្រាំ ចាត់តាំងអ្នកទទួលបន្ទុកផ្គត់ផ្គង់សម្ភារទាក់ទងនឹងជំងឺCOVID-19 និយាយថា ប្រដាប់ធ្វើតេស្តស្វែងរកវីរុស និងតេស្តស្វែងរកប្រព័ន្ធភាពស៊ាំ មានសារៈសំខាន់ណាស់សម្រាប់អាមេរិក ដើម្បីឲ្យមនុស្សអាចចេញទៅធ្វើការវិញ។
នៅក្នុងកិច្ចសម្ភាសជាមួយកម្មវិធី Fox and Friend លោក Navarro និយាយថា ការធ្វើតេស្តអាចឲ្យយើងរកឃើញមនុស្សដែលមានភាពស៊ាំ ហើយដែលអាចទៅធ្វើការនៅកន្លែងមានសុវត្ថិភាពបាន ប៉ុន្តែបញ្ជាក់ថា អាមេរិកមិនអាចប្រើឧបករណ៍ឡើយ។ លោកនិយាយចំៗថា៖« តែជាឧទាហរណ៍ យើងមិនអាចឲ្យចិននាំចូលឧបករណ៍ធ្វើតេស្តក្លែងក្លាយ ឬរបស់បន្លំបានឡើយ ព្រោះវាអាចឲ្យមានបញ្ហារំខានកើតឡើង»។
លោក Navarro ដែលជាអ្នករិះគន់ចិនមិនសំចៃមាត់ សង្កត់ធ្ងន់ទៀតថា ពេលនេះមានឧបករណ៍ធ្វើតេស្តស្វែងរកអង់ទីករនាំចូលមកពីចិនជាច្រើន តែមានគុណភាពអន់ និងចេញសញ្ញាមិនត្រឹមត្រូវជាដើម។
បន្ថែមពីនេះ ទីប្រឹក្សាពាណិជ្ជកម្មសេតវិមានរូបនេះបានចោទចិនថា ធ្វើវីរុសសាយភាពជុំវិញពិភពលោក ដោយសារតែបានលាក់ព័ត៌មានអស់រយៈពេល៦សប្តាហ៍។ លោក Navarro លើកឡើងថា ចិនអាចនឹងរាំងខ្ទប់ជំងឺនេះត្រឹមក្រុងវូហាន តែបានមិនធ្វើបែបនោះឡើយ តែឲ្យមេរោគនេះឆ្លងជុំវិញពិភពលោក ដោយឲ្យជនជាតិចិនរាប់សែននាក់ឡើងយន្តហោះទៅអ៊ីតាលី អាមេរិក និងកន្លែងដទៃទៀត។
គួររំលឹកផងដែរថា កាលពីសប្តាហ៍មុន លោក Navarro ក៏ទើបបានចោទប្រកាន់ចិនថា លាក់ព័ត៌មានដើម្បីប្រកួតប្រជែងជាមួយអាមេរិក ក្នុងការបង្កើតវ៉ាក់សាំង។ ក្នុងកិច្ចសម្ភាសមួយ លោកបាននិយាយថា នៅពេលដែលចិនពន្យារពេលមិនប្រាប់ពិភពលោក ចិនបានប្រមូលស្តុកឧបករណ៍ការពារខ្លួន ដែលត្រូវការសម្រាប់បុគ្គលិកពេទ្យ។
ចំណែកឯចិនវិញ បានបដិសេធរាល់ការចោទប្រកាន់ដែលថា ខ្លួនលាក់បាំងព័ត៌មានពីការផ្ទុះមេរោគ។ ទាក់ទងគុណភាពទំនិញ ក្រសួងពាណិជ្ជកម្មចិន បានរឹតត្បិតការអនុញ្ញាតការនាំចេញផលិតផលមួយចំនួន ដរាបណាផលិតផលនោះមិនទាន់ទទួលការអនុញ្ញាតពីប្រទេសនាំចូល៕
© រក្សាសិទ្ធិដោយ thmeythmey.com