គុណភាពបាល់ទាត់កម្ពុជានឹងមានការផ្លាស់ប្តូរគួរឲ្យកត់សម្គាល់ ប្រសិនបើការឈប់សម្រាកដោយសារការរីករាលដាលនៃជំងឺរលាកសួតបង្កឡើងដោយកូរ៉ូណាវីរុសប្រភេទថ្មី(កូវីដ-១៩)បន្តអូសបន្លាយពេលវេលា។ ដ្បិតគម្រោងនិងយុទ្ធសាស្ត្រមួយចំនួនរបស់គ្រូបង្វឹកនឹងមានការផ្លាស់ប្តូរខ្លាំង ដែលទាមទារឲ្យគ្រូបង្វឹកត្រូវសម្របខ្លួនឲ្យបានលឿន និងស្វែងរកវិធីសាស្ត្រថ្មីក្នុងការបង្វឹក។ នេះជាការយល់ឃើញរបស់លោក Oriol Segura គ្រូបង្វឹកក្រុមអង្គរថាយហ្គឺរ។
មកទល់ពេលនេះ ពេលវេលាចាប់ផ្តើមប្រកួតឡើងវិញនៃពានរង្វាន់ក្របខណ្ឌមិត្តហ្វូនខេមបូឌានលីគ និងពានសម្តេច ហ៊ុន សែន ស្ថិតក្នុងភាពស្រពេចស្រពិលនៅឡើយ ក្រោយឈប់សម្រាកអស់រយៈពេលជាង១ខែ ដោយសាររីករាលដាលនៃជំងឺកូវីដ។ កត្តានេះ បានបង្ខំឲ្យក្លិបបាល់ទាត់ទាំងអស់បន្តរំសាយការប្រមូលផ្តុំហ្វឹកហាត់ជាក្រុម ដោយដាក់កាលវិភាគឲ្យកីឡាករហ្វឹកហាត់នៅតាមផ្ទះរៀងៗខ្លួន។
ការអនុវត្តតាមវិធីសាស្ត្រនេះជាមធ្យោបាយមួយដ៏ល្អក្នុងការបង្ការនិងទប់ស្កាត់ការរីករាលដាលនៃជំងឺកូវីដ-១៩ តែវាបានជះឥទ្ធិពលមិនល្អដល់ការអភិវឌ្ឍគុណផលបាល់ទាត់នៅកម្ពុជា។ ដ្បិតការហ្វឹកហាត់ដោយខ្លួនឯងនៅតាមផ្ទះពុំសូវទទួលបានលទ្ធផលល្អដូចការហ្វឹកហាត់ជាក្រុម ដែលមានការចង្អុលបង្ហាញពីគ្រូបង្វឹកនោះទេ។ ហើយការហ្វឹកហាត់របស់កីឡាករទៀតសោត ពួកគេបានត្រឹមតែហាត់កម្លាំងកាយតែប៉ុណ្ណោះ។
លោក Oriol Segura គ្រូបង្វឹកក្រុមអង្គរថាយហ្គឺរ
លោក Oriol Segura គ្រូបង្វឹកក្រុមអង្គរថាយហ្គឺរបានបង្ហាញក្តីកង្វល់ចំពោះគុណភាពបាល់ទាត់នៅកម្ពុជាថា អាចនឹងមានការធ្លាក់ចុះ ប្រសិនបើការឈប់សម្រាកបន្តអូសបន្លាយពេលវេលា។ ដ្បិតការឈប់សម្រាកដោយគ្មានការហ្វឹកហាត់ជាមួយបាល់នេះ ទាមទារឲ្យកីឡាករតាមក្លិបនីមួយៗត្រូវការពេលវេលាច្រើនក្នុងការសម្របខ្លួន និងហ្វឹកហាត់ពង្រឹងសមត្ថភាពលេងជាក្រុមឡើងវិញ។
សម្រាប់គ្រូបង្វឹកសញ្ជាតិអេស្ប៉ាញរូបនេះ ក្នុងកាលៈទេសបច្ចុប្បន្នទាមទារឲ្យគ្រូបង្វឹកទាំងអស់ខិតខំស្វែងរកវិធីសាស្ត្រថ្មីក្នុងការបង្វឹក និងបត់បែនឲ្យបានលឿនបំផុត។ «ការសាយភាយជាសកលនៃជម្ងឺកូវីដ-១៩ គឺជារឿងដ៏ថ្មីស្រឡាងមួយនិងមិនរំពឹងទុកនៅក្នុងជំនាន់របស់ពួកយើង ហើយគម្រោងនិងយុទ្ធសាស្ត្រនានាក្នុងពិភពបាល់ទាត់ គឺត្រូវបានផ្លាស់ប្ដូរជាលក្ខណៈទ្រង់ទ្រាយធំ។ ខ្ញុំគិតថាគ្រូបង្វឹក ត្រូវតែសម្របខ្លួនឲ្យបានលឿនបំផុត ហើយត្រូវផ្លាស់ប្ដូរមធ្យោបាយនៃការហ្វឹកហាត់ ឬបង្រៀន»។ នេះជាការឡើងរបស់លោក Oriol Segura។
លោក បានបន្ថែមថា៖«នេះជាពេលដែលសោកសៅ និងលំបាកបំផុតក្នុងអាជីពមួយនេះ ប៉ុន្តែក៏ជាការធ្វើតេស្តមួយដើម្បីឲ្យឃើញពីចំណុចខ្លាំងរបស់ក្រុម និងរបស់ខ្ញុំ និងភាពជាអ្នកអាជីពនៃបាល់ទាត់។ យើងមិនអាចរស់ដោយគ្មានបាល់ទាត់ ប៉ុន្តែយើងដឹង ហើយយើងនឹងប្រយុទ្ធប្រឆាំងវា(កូវីដ-១៩)ដើម្បីឲ្យបាល់ទាត់ត្រឡប់មកវិញក្នុងពេលឆាប់ៗនេះ»។
សហព័ន្ធកីឡាបាល់ទាត់កម្ពុជាកាលពីថ្ងៃទី១៩ ខែមីនា ឆ្នាំ២០២០ បានចេញសេចក្តីប្រកាសព័ត៌មានមួយដោយសម្រេចផ្អាកការរៀបចំពានរង្វាន់លីគកំពូល និងពានសម្តេច ហ៊ុន សែន ជាបណ្តោះអាសន្ន ដោយសារបារម្ភពីការរីករាលដាលនៃជំងឺកូវីដ-១៩។ ការផ្អាកនេះ បានបង្ខំឲ្យក្លិបនីមួយៗរំសាយការប្រមូលផ្តុំហ្វឹកហាត់ជាក្រុម ដោយដាក់កាលវិភាគឲ្យកីឡាករហ្វឹកហាត់នៅតាមផ្ទះរៀងៗខ្លួន។
គិតត្រឹមថ្ងៃទី២៨ ខែមេសា ឆ្នាំ២០២០ កម្ពុជានៅសល់អ្នកជំងឺកូវីដ-១៩ តែ៣នាក់ទៀតប៉ុណ្ណោះ ដែលបន្តសម្រាកព្យាបាល ក្រោយព្យាបាលជាសះស្បើយសរុបចំនួន១១៩នាក់ក្នុងចំណោមអ្នកជំងឺ១២២នាក់។ អ្វីដែលគួរឲ្យកត់សម្គាល់ក្នុងរយៈពេលពីរសប្តាហ៍ចុងក្រោយនេះ កម្ពុជាពុំបានរកឃើញអ្នកផ្ទុកជំងឺកូវីដ-១៩ថ្មីនោះទេ៕