COVID-19
អន្តរជាតិ
អនុប្រធានាធិបតីអាមេរិក ម៉ៃ ផេន មិនពាក់ម៉ាស់ ពេលត្រួតពិនិត្យមន្ទីរពេទ្យ
លោកម៉ាយ ផេន អនុប្រធានាធិបតីអាមេរិក នៅមន្ទីរពេទ្យMayo Clinic-AP
×![]()
លោកម៉ៃ ផេន អនុប្រធានាធិបតីអាមេរិក នៅថ្ងៃទី២៨ ខែមេសា បានធ្វើទស្សនកិច្ចនៅមន្ទីពេទ្យមួយកន្លែងនៅអាមេរិក តែលោកបានពាក់ម៉ាស់ឡើយ បើទោះបីជាវិន័យរបស់មន្ទីរពេទ្យ តម្រូវឲ្យអ្នកមកកាន់ទីនោះ ពាក់ឧបករណ៍ការពារខ្លួនក៏ដោយ។ នេះបើតាមសារព័ត៌មាន BBC ។
លោកអនុប្រធានាធិបតី ម៉ៃ ផេន ដែលជាអ្នកដឹកនាំក្រុមការងារប្រឆាំងកូរ៉ូណាវីរុសរបស់សេតវិមាន បានធ្វើទស្សនកិច្ចទៅកាន់មន្ទីរពេទ្យ Mayo Clinic ក្នុងរដ្ឋមីនីសូតា។ នៅក្នុងទស្សនកិច្ចនៅមន្ទីរពេទ្យនោះ លោក ផេន គឺជាមនុស្សតែម្នាក់គត់ ដែលមិនមានឧបករណ៍បិទបាំងមុខ។
ក្នុងសារលើបណ្ដាញសង្គម Twitter របស់មន្ទីរពេទ្យដែលបន្ទាប់មកបានលុបចេញវិញ លោកអនុប្រធានាធិបតី ក៏ត្រូវបានប្រាប់ពីការណែនាំរឿងពាក់ម៉ាស់ដែរ។ វិន័យរបស់មន្ទីរពេទ្យ Mayo Clinic តម្រូវឲ្យអ្នកអ្នកជំងឺ និងអ្នកមកកាន់មន្ទីរពេទ្យពាក់ម៉ាស់ ឬបាំងមុខការពារ។
តាមពិតទៅ រដ្ឋាភិបាលអាមេរិក ក៏បានណែនាំឲ្យពលរដ្ឋគួរតែពាក់បាំងមុខ នៅតាមទីសាធារណៈ បើសិនជាគម្លាតសុវត្ថិភាពមិនអាចធ្វើទៅកើត។ លោក ផេន បានការពារការមិនពាក់ម៉ាស់របស់លោក ដោយថា «ចាំបាច់ក្នុងការប្រជុំជាមួយបុគ្គលិក និងអ្នកជំងឺ»។ ក្នុងទស្សនកិច្ចទៅមន្ទីរពេទ្យនោះ លោក ផេន ត្រូវបានអមដំណើរដោយ ស្នងការអាជ្ញាធរស្បៀង និងឱសថ លោកវេជ្ជបណ្ឌិត Stephen Hahn ដែលបានពាក់ម៉ាស់ដែរ។
នៅពេលចោទសួរដោយអ្នកសារព័ត៌មានរឿងម៉ាស់ លោក ផេន ពន្យល់ថា ហេតុផលដែលលោកមិនពាក់ម៉ាសក៏ដោយសារតែលោក និងមនុស្សជុំវិញខ្លួនលោក ត្រូវបានធ្វើតេស្តជាញឹកញយថា គ្មានជំងឺ COVID-19 ។
បើយោងតាម វេបសាយ Axios លោកអនុប្រធានាធិបតី ម៉ៃ ផេន មិនដែលពាក់ម៉ាស់សូម្បីតែម្តង តាំងតែពីមានការឆ្លងជំងឺរាតត្បាត COVID-19 មក។ មិនតែប៉ុណ្ណោះ លោកថែមទាំងធ្វើដំណើរជុំវិញប្រទេសទៅទៀត។ កន្លងទៅ មនុស្សស្និទ្ធរបស់លោក ផេន ដែលធ្វើការនៅសេតវិមាន ត្រូវបានធ្វើតេស្ត ហើយរកឃើញ COVID-19 មុនគេ៕
© រក្សាសិទ្ធិដោយ thmeythmey.com
