COVID-19
អន្តរជាតិ
អនុរដ្ឋមន្ត្រីសុខាភិបាលម៉ាឡេស៊ី ជាប់ពិន័យ២២៨ដុល្លារក្រោយល្មើសបញ្ជាបិទប្រទេស អនុរដ្ឋមន្ត្រីសុខាភិបាលម៉ាឡេស៊ី លោក Azmi Ghazali (malay mail)
× អនុរដ្ឋមន្ត្រីសុខាភិបាលម៉ាឡេស៊ី លោក Azmi Ghazali និងសមាជិកក្រុមប្រឹក្សាប្រតិបត្តិនៃរដ្ឋ Perak លោក Razman Zakaria នៅថ្ងៃទី២៨ ខែមេសា ត្រូវបានតុលាការរកឃើញមានទោសកំហុស ល្មើសបទបញ្ជាគ្រប់គ្រងការចល័ត (MCO) របស់ប្រទេស។
មន្ត្រីជាន់ខ្ពស់របស់ម៉ាឡេស៊ីទាំងពីរនាក់នេះ រងប្រាក់ពិន័យចំពោះកំហុសនេះ ចំនួន ២២៨ដុល្លារ។ នេះបើតាមទីភ្នាក់ងារព័ត៌មាន Bernama។ ទាំងលោក Azmi និងលោក Razman ត្រូវសម្រេចចោទប្រកាន់ ពីបទល្មើសបម្រាមបង្ការ និងគ្រប់គ្រងជំងឺឆ្លងឆ្នាំ២០២០ ដែលអាចជាប់គុកមិនឲ្យលើសពី៦ខែ ឬប្រាក់ពិន័យ២២៨ដុល្លារ ឬទាំងពីរ។
បើតាមប្រភពព័ត៌មានដដែល អ្នកទាំងពីរនេះ ត្រូវបានថតរូបរួមគ្នា ដោយកំពុងបរិភោគអាហារ ជាមួយមនុស្សមួយក្រុមនៅសាលាសាសនាមួយ ក្នុងរដ្ឋ Perak កាលពីថ្ងៃទី១៨ ខែមេសា បន្ទាប់ពីលោកអនុរដ្ឋមន្ត្រីសុខាភិបាលម៉ាឡេស៊ី បានធ្វើទស្សនកិច្ចទៅកាន់មន្ទីរពេទ្យមួយកន្លែងនៅទីនោះ។
រូបភាពទាំងនេះ ត្រូវបានបង្ហោះលើទំព័រហ្វេសប៊ុករបស់លោកអនុរដ្ឋមន្ត្រី Azmi ហើយក្រោយមកត្រូវបានលុបចោលវិញ។ ទង្វើនេះ គឺល្មើសនឹងបទបញ្ជាបិទប្រទេស ដែលរដ្ឋាភិបាលម៉ាឡេស៊ីបានដាក់ចេញ រួមមាន បម្រាមការប្រមូលផ្ដុំសាធារណៈ ក៏ដូចជាផ្អាកការធ្វើដំណើរ ទាំងក្នុងប្រទេសនិងអន្តរជាតិ ជាដើម ក្នុងគោលដៅទប់ស្កាត់ COVID-19 ។ ការអនុវត្តចំណាត់ការនេះ បានចូលធរមានតាំងពីថ្ងៃទី១៨ ខែមីនា និងបានពន្យារពេល៣ដងហើយ ពោលគឺនឹងបញ្ចប់នាថ្ងៃទី១២ ខែឧសភាខាងមុខ។
ទោះជាបែបនេះក្តី អនុរដ្ឋមន្ត្រីសុខាភិបាល លោក Azmi Ghazali នាពេលថ្មីៗនេះ បានចេញមុខសុំទោសជាសាធារណៈ ចំពោះរឿងហេតុអកុសលនេះ។ តាមការចុះផ្សាយរបស់ទូរទស្សន៍សិង្ហបុរី Channel News Asia លោក បញ្ជាក់ទៀតថា លោកគោរពដឹងគុណ ដល់ការលះបង់របស់ក្រុមជួរមុខ ដូចជា ប៉ូលិស កងកម្លាំងយោធា បុគ្គលិកសុខាភិបាល និងភ្នាក់ងាររដ្ឋាភិបាលដទៃទៀត ដែលប្រឹងប្រែងក្នុងបុព្វហេតុប្រឆាំងCOVID-19។
គិតត្រឹមថ្ងៃទី២៩ ខែមេសា ប្រទេសម៉ាឡេស៊ី មានករណីឆ្លងសរុប ៥,៨៥១ករណី ក្នុងនោះអ្នកជំងឺ៤,០៣២នាក់ជាសះស្បើយ។ អ្នកស្លាប់ដោយសារ COVID-19 សរុបមាន១០០នាក់ ខណៈអ្នកជំងឺធ្ងន់ធ្ងរមាន ៣៦ករណី។ នេះបើតាមវេបសាយ worldometers.info ដែលតាមដាន COVID-19 នៅទូទាំងពិភពលោក៕
Tag:
ម៉ាឡេស៊ី
Azmi Ghazali
COVID-19
© រក្សាសិទ្ធិដោយ thmeythmey.com