ម្ចាស់ហាងម៉ាស្សាម្នាក់នៅសិង្ហបុរី ប្រឈមមុខជាប់ពន្ធនាគារ ព្រោះបន្តរកស៊ីអំឡុងពេលរឹតបន្ដឹង

COVID-19

អន្តរជាតិ

ម្ចាស់ហាងម៉ាស្សាម្នាក់នៅសិង្ហបុរី ប្រឈមមុខជាប់ពន្ធនាគារ ព្រោះបន្តរកស៊ីអំឡុងពេលរឹតបន្ដឹង

30, Apr 2020 , 8:39 am

រូបភាព

ហាងម៉ាស្សារបស់ស្ត្រីសិង្ហបុរី Jin Yin - រូបភាពទូរទស្សន៍សិង្ហបុរី Channel News Asia

ដោយ: ថ្មីៗ

ខណៈពេលដែលអាជីវកម្មដែលពុំចាំបាច់ភាគច្រើន ត្រូវបានបញ្ជាឲ្យបិទទ្វារ ស្ត្រីសិង្ហបុរីម្នាក់បានផ្គើនបន្តបើកទ្វារហាងម៉ាស្សាខ្លួន ហើយថែមទាំងអនុញ្ញាតឲ្យបុរសម្នាក់ ចូលទៅម៉ាស្សា និងទទួលសេវាកម្មសម្រេចកាមទៀតផង។

ស្ត្រីជាម្ចាស់ហាងម៉ាស្សារូបនេះ ឈ្មោះថា Jin Yin នៅថ្ងៃទី២៩ ខែមេសា ត្រូវបានតុលាការសម្រេចចោទប្រកាន់ ក្រោយមិនព្រមបិទទ្វារហាងម៉ាស្សាខ្លួន កាលពីថ្ងៃទី១០ ខែមេសា ពោលគឺ៣ថ្ងៃក្រោយបម្រាមរឹតបន្តឹងរបស់រដ្ឋាភិបាលសិង្ហបុរីទប់ស្កាត់COVID-19 បានចូលជាធរមានរួច។

តាមការចុះផ្សាយរបស់ទូរទស្សន៍សិង្ហបុរី Channel News Asia ស្ត្រីអាយុ៥៥ឆ្នាំរូបនេះ ក៏ត្រូវបានចោទប្រកាន់ពាក់ព័ន្ធការអនុញ្ញាតឲ្យបុរសវ័យ៦៧ឆ្នាំ ដែលជាភ្ញៀវចូលទទួលសេវាកម្មម៉ាស្សា និងសម្រេចកាម ក្នុងតម្លៃ១០៦ដុល្លារ ចន្លោះពីម៉ោង១រសៀលដល់២៖៣០នាទីរសៀល នៅថ្ងៃនោះ។ ទន្ទឹមនេះ ស្ត្រីរូបនេះក៏ត្រូវរងបទចោទប្រកាន់២ករណីផ្សេងទៀតដែរ ជុំវិញការបើកអាជីវកម្មម៉ាស្សា ដោយគ្មានអាជ្ញាបណ្ណត្រឹមត្រូវ។

អ្នកស្រី Jin បានប្រាប់តុលាការទាំងទឹកភ្នែកថា នាងព្រមទទួលទោសកំហុសនេះ។ តាមទូរទស្សន៍សិង្ហបុរីដដែល ស្ត្រីរូបនេះ អះអាងថា នាងត្រូវការប្រាក់កាក់បន្ទាន់ ខណៈម្ដាយនាង ដែលទើបតែស្លាប់កាលពីថ្មីៗនេះ ដោយសារពីជំងឺមហារីក។ អ្នកស្រី Jin នឹងវិលមកកាន់តុលាការ ដើម្បីទទួលទោសកំហុសនាថ្ងៃទី១៣ ខែឧសភាខាងមុខ។

សម្រាប់ការបន្តបើកដំណើរការអាជីវកម្ម ទោះក្រោមបម្រាមរឹតបន្តឹង COVID-19 ស្ត្រីសិង្ហបុរីរូបនេះ អាចជាប់គុករហូតដល់៦ខែ ឬពិនិយជាប្រាក់ រហូតដល់ជាង៧ពាន់ដុល្លារ ឬទាំងពីរ។ ចំណែកបទចោទប្រកាន់ ពាក់ព័ន្ធការបើកអាជីវកម្មគ្មានអាជ្ញាបណ្ណត្រឹមត្រូវនោះ នាងអាចជាប់គុករហូតដល់២ឆ្នាំ ឬពិន័យជាប្រាក់រហូតដល់ជាង៧ពាន់ដុល្លារ ឬទាំងពីរ។

គិតត្រឹមថ្ងៃទី២៩ ខែមេសា ប្រទេសសិង្ហបុរី មានករណីឆ្លងCOVID-19សរុប ១៥៦៤១ករណី ក្នុងនោះករណីរកឃើញថ្មី៦៩០នាក់បន្ថែម។ អ្នកជាសះស្បើយមាន១១២៨នាក់ ខណៈអ្នកស្លាប់មាន១៤នាក់។ នេះបើតាមវេបសាយ worldmeters.info ដែលតាមដានតួលេខ COVID-19 ទូទាំងពិភពលោក៕