ភ្នំពេញ៖ កាលពីព្រឹកថ្ងៃទី២៩ ខែមេសា លោក ថោង ខុន រដ្ឋមន្ត្រីក្រសួងទេសចរណ៍ បានដឹកនាំកិច្ចប្រជុំពិសេសរដ្ឋមន្ត្រីទេសចរណ៍អាស៊ាន ស្តីពីផលប៉ះពាល់នៃជំងឺកូវីដ-១៩ លើវិស័យទេសចរណ៍អាស៊ាន ដោយមានការចូលរួមពីរដ្ឋមន្ត្រីទេសចរណ៍អាស៊ានទាំង១០ប្រទេស និងអគ្គលេខាធិការអាស៊ាន តាមរយៈ Video Conference។ កិច្ចប្រជុំពិសេសនេះ រៀបចំឡើងដើម្បីរកដំណោះស្រាយ អំពីវិបត្តិកូវីដ-១៩ លើវិស័យទេសចរណ៍ក្នុងតំបន់អាស៊ាន។
តាមទំព័រហ្វេសប៊ុកក្រសួងទេសចរណ៍ កិច្ចប្រជុំបានចែករំលែកបទពិសោធន៍ ការអនុវត្តល្អៗស្ដីពីវិធានការទប់ស្កាត់កូវីដ-១៩ និងផលប៉ះពាល់ក្នុងប្រទេសសមាជិកនីមួយៗ ក៏ដូចជាផែនការយុទ្ធសាស្ត្រ និងសកម្មភាពជួយសង្គ្រោះវិស័យទេសចរណ៍នៅចំពោះមុខ ក្នុងដំណាក់កាលនៃការដោះស្រាយវិបត្តិ (Mitigation Phase) ឬដំណាក់កាលនៃត្រៀមងើបឡើងវិញ (Early Recovery) ក៏ដូចជាផែនការស្ដារឡើងវិញបន្ទាប់ពីវិបត្តិកូវីដ-១៩ ( Post Covid-19 Crisis Recovery Plan)។
លទ្ធផលនៃកិច្ចប្រជុំពិសេស រដ្ឋមន្ត្រីទេសចរណ៍អាស៊ាន បានសម្រេចដាក់ចេញនូវសេចក្តីប្រកាសរួម៧ចំណុច ដែលរួមមាន ការជំរុញការសម្របសម្រួលរបស់អាស៊ាន ក្នុងការពន្លឿនការផ្លាស់ប្តូរព័ត៌មានស្តីពីសុខភាព ទាក់ទងនឹងការធ្វើដំណើរ និងវិធានការចាំបាច់នានា ដែលអនុវត្តដោយរដ្ឋជាសមាជិកអាស៊ាន ក្នុងការគ្រប់គ្រងការរីករាលដាលនៃជំងឺកូវីដ-១៩។
កិច្ចប្រជុំ ក៏បានជំរុញឲ្យមានការពង្រឹងកិច្ចសហប្រតិបត្តិការ រវាងស្ថាប័នទេសចរណ៍ជាតិអាស៊ាន (NTOs) ជាមួយវិស័យអាស៊ានពាក់ព័ន្ធផ្សេងៗទៀត ជាពិសេសជាមួយវិស័យសុខាភិបាល ព័ត៌មាន ដឹកជញ្ជូន និងអន្តោប្រវេសន៍ ក៏ដូចជាដៃគូខាងក្រៅរបស់អាស៊ាន ព្រមទាំងអង្គការ និងសហគមន៍អន្តរជាតិនានា សំដៅឆ្លើយតបទាន់ពេលវេលា និងច្បាស់លាស់លើការដោះស្រាយ និងការកាត់បន្ថយផលប៉ះពាល់នៃជំងឺកូវីដ-១៩ ក៏ដូចជាវិបត្តិដទៃទៀតនាអនាគត។
រូបភាព៖ ទំព័រហ្វេសប៊ុកក្រសួងទេសចរណ៍
រដ្ឋមន្ត្រីទេសចរណ៍ ក៏បានព្រមព្រៀងបង្កើនកិច្ចសហប្រតិបត្តិការរវាងគ្នា និងដៃគូអាស៊ានដទៃទៀត ឱ្យកាន់តែជិតស្និទ្ធបន្ថែមទៀត ក្នុងការចែករំលែកព័ត៌មាន និងការផ្លាស់ប្តូរការអនុវត្តល្អៗ ស្តីពីការឆ្លើយតបចំពោះវិបត្តិ ការត្រៀមខ្លួនសម្រាប់ការទំនាក់ទំនង ការសម្របសម្រួលការតភ្ជាប់ កិច្ចខិតខំនិងវិធានការសង្គ្រោះផ្សេងៗ ដើម្បីគាំទ្រវិស័យទេសចរណ៍។ បន្ថែមពីនេះ ការបង្កើនទំនុកចិត្តភ្ញៀវទេសចរ និងការរៀបចំបង្កើតឱ្យមានស្តង់ដា ស្តីបរិយាកាសការងារប្រកបដោយសុវត្ថិភាព ក៏ស្ថិតនៅក្នុងការប្រកាសរួមនេះដែរ។
ទំព័រហ្វេសប៊ុករបស់ក្រសួងទេសចរណ៍ បានបញ្ជាក់ទៀតថា រដ្ឋមន្ត្រីទេសចរណ៍អាស៊ាន ក៏គាំទ្រដល់ការរៀបចំ និងការអនុវត្តផែនការស្តារឡើងវិញក្រោយវិបត្តិកូវីដ-១៩ ដែលមានដូចជាការកសាងសមត្ថភាពទេសចរណ៍អាស៊ាន ការចូលរួមជាមួយភាគីពាក់ព័ន្ធនានា ក្នុងការបង្កើតទំនុកចិត្តអ្នកប្រើប្រាស់ និងអាជីវកម្ម ស្វែងយល់ពីដំណោះស្រាយបែបច្នៃប្រឌិត និងនវានុវត្តន៍ក្នុងការពង្រឹង និងជំរុញវិស័យទេសចរណ៍អាស៊ាន តាមរយៈការប្រើប្រាស់បច្ចេកវិទ្យាឌីជីថលផងដែរ។
លើសពីនេះ អាជ្ញាធរ ត្រូវផ្តល់នូវការគាំទ្រផ្នែកបច្ចេកទេស និងការសម្រួលផ្នែកហិរញ្ញវត្ថុ ការបន្ធូរបន្ថយពន្ធ និងការកសាងសមត្ថភាពជាពិសេសលើជំនាញឌីជីថល ដល់ភាគីពាក់ព័ន្ធក្នុងវិស័យទេសចរណ៍ និងធ្វើដំណើរដោយផ្តោតការយកចិត្តទុកដាក់ ជាពិសេសលើសហគ្រាសខ្នាតតូចបំផុត តូច និងមធ្យម (MSMEs) ក្រុមជនដែលងាយរងគ្រោះ ព្រមទាំងសហគមន៍ដែលរងផលប៉ះពាល់នានា ក៏ដូចជាការបន្តកិច្ចសហប្រតិបត្តិការជាមួយដៃគូសន្ទនាអាស៊ាន អង្គការអន្តរជាតិនានា និងភាគីពាក់ព័ន្ធក្នុងវិស័យទេសចរណ៍ ដើម្បីកសាងតំបន់អាស៊ីអាគ្នេយ៍ទាំងមូលឱ្យមានភាពរឹងមាំ និងត្រៀមខ្លួនរួចជាស្រេច ក្នុងការគ្រប់គ្រងវិស័យទេសចរណ៍ប្រកបដោយចីរភាព និងបរិយាបន្ន បន្ទាប់ពីវិបត្តិផ្សេងៗ។ នេះជាខ្លឹមសារនៃសេចក្តីប្រកាសរួមដែលសម្រេចដោយរដ្ឋមន្ត្រីទេសចរណ៍អាស៊ាន៕
រូបភាព៖ ទំព័រហ្វេសប៊ុកក្រសួងទេសចរណ៍