COVID-19
ជាតិ
អ្នកនាំពាក្យ៖ បុណ្យវិសាខបូជាឆ្នាំនេះ នៅតែប្រារព្ធ តែមិនឲ្យជួបជុំទ្រង់ទ្រាយធំឡើយ ព្រះសង្ឃនិងពុទ្ធបរិស័ទ ក្នុងស្រុកស្អាង ខេត្តកណ្តាល ចូលរួមដង្ហែពិធីបុណ្យវិសាខបូជា កាលពីឆ្នាំ២០១៩
× កម្ពុជា នៅតែប្រារព្ធពិធីបុណ្យវិសាខបូជាដដែលក្នុងឆ្នាំនេះ តែព្រះសង្ឃនិងប្រជាពុទ្ធបរិស័ទ នឹងមិនប្រមូលផ្តុំគ្នាជាលក្ខណៈទ្រង់ទ្រាយធំ ដូចរាល់ឆ្នាំនោះទេ។ នេះបើតាមលោក សេង សុមុនី អ្នកនាំពាក្យក្រសួងធម្មការនិងសាសនា។
ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទ នាព្រឹកថ្ងៃទី៣០ ខែមេសា ឆ្នាំ២០២០ លោក សេង សុមុនី ថ្លែងថា រាល់ឆ្នាំ កម្ពុជា តែងជ្រើសរើសកន្លែងណាមួយ ដូចជានៅភ្នំឧត្តុង្គ (ព្រះរាជទ្រព្យ) ជាដើម ដើម្បីធ្វើជាទីតាំងប្រារព្ធពិធីបុណ្យវិសាខបូជាថ្នាក់ជាតិ តែសម្រាប់ឆ្នាំនេះ គណៈកម្មាធិការជាតិរៀបចំបុណ្យជាតិ-អន្តរជាតិ មិនអនុញ្ញាតឲ្យប្រាព្ធពិធីបុណ្យវិសាខបូជាថ្នាក់ជាតិឡើយ។
អ្នកនាំពាក្យ បញ្ជាក់ថា៖«ព្រះសង្ឃ អាចតុបតែងនិងរៀបចំប្រារព្ធតាមវត្តអារាម ហើយពុទ្ធបរិស័ទ ចូលរួមគោរពបូជា នៅតាមគេហដ្ឋានរៀងៗខ្លួន ដូចយើងធ្វើការចូលឆ្នាំខ្មែរអ៊ីចឹង មិនឲ្យជួបជុំធំទេ»។
ការមិនអនុញ្ញាតឲ្យរៀបចំពិធីបុណ្យវិសាខបូជាជាទ្រង់ទ្រាយធំ នៅភ្នំព្រះរាជទ្រព្យ គឺដើម្បីទប់ស្កាត់ការរាលដាលនៃជំងឺកូវីដ-១៩។ នេះបើតាមលោក ឈិន កេតនា អនុប្រធានអចិន្រៃ្តយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិ ដែលលើកឡើងក្នុងកិច្ចប្រជុំអន្តរក្រសួង កាលពីព្រឹកថ្ងៃទី២៩ ខែមេសា ឆ្នាំ២០២០ នៅគណៈកម្មាធិការជាតិរៀបចំបុណ្យជាតិ-អន្តរជាតិ ហើយត្រូវបានដកស្រង់សម្តីយកទៅចុះផ្សាយដោយទីភ្នាក់ងារសារព័ត៌មានជាតិកម្ពុជា (AKP)។
លោក អះអាងថា គ្រប់ក្រសួង-ស្ថាប័នទាំងអស់ ត្រូវបានអនុញ្ញាតឲ្យរៀបចំពិធីបុណ្យវិសាខបូជា តាមអង្គភាពរបស់ខ្លួន។ AKP សរសេរពីប្រសាសន៍របស់លោកថា៖«ក្នុងឆ្នាំ២០២០នេះ បុណ្យវិសាខបូជា អនុញ្ញតឲ្យធ្វើនៅគ្រប់ក្រសួង-ស្ថាប័ន និងនៅតាមទីវត្តអារាម ដោយគ្រាន់តែតុបតែងលម្អដោយទង់ជាតិ ទង់សាសនា ទង់ព្រះមហាក្សត្រ និងបដាពាក្យស្លោកនៅតាមក្រសួង ស្ថាប័នទាំងនោះ ឲ្យបានសមរម្យដូចរាល់ឆ្នាំ»។
បុណ្យវិសាខបូជាឆ្នាំនេះ នឹងប្រព្រឹត្តទៅថ្ងៃទី៦ ខែឧសភា។ ការប្រារព្ធពិធីបុណ្យវិសាខបូជា គឺដើម្បីរម្លឹកដល់ព្រឹត្តិការណ៍ដ៏ពិសេស៣ ដែលទាក់ទងនឹងព្រះសមា្មសម្ពុទ្ធ ការប្រសូត ការត្រាស់ដឹង និង ការចូលនិព្វាន៕
Tag:
វិសាខបូជា
COVID-19
សាសនា
© រក្សាសិទ្ធិដោយ thmeythmey.com