ជាតិ
ទិវាពលកម្មឆ្នាំនេះ ប្រព្រឹត្តទៅក្រោមរូបភាព សម្រាកនៅផ្ទះ ខណៈកម្មករជាង១៤ម៉ឺននាក់កំពុងគ្មានការងារ
កម្មករធ្វើដំណើរចេញពីរោងចក្រតាមរថយន្តដឹកកម្មកររួម (ThmeyThmey )
×![]()
ដោយ: ឡាយ សុភាវតី
ភ្នំពេញ៖ ទិវាពលកម្មឆ្នាំនេះ គឺប្រព្រឹត្តក្រោមរូបភាព សម្រាកនៅផ្ទះ គឺដើម្បីទប់ស្កាត់ការរាតត្បាតជំងឺកូវីដ-១៩។ ជាមួយគ្នាដែរ ក៏លេចរូបភាពនិងបញ្ហាប្រឈមជាច្រើនចំពោះកម្មករ ពោលគឺការបាត់បង់ការងារជាង១៤ម៉ឺននាក់ រួមទាំងពលរដ្ឋអ្នកធ្វើការសេដ្ឋកិច្ចក្រៅប្រព័ន្ធកំពុងរងផលប៉ះពាល់ចំពោះការរកចំណូលប្រចាំថ្ងៃប្រមាណ២លាននាក់។ 
នៅឆ្នាំនេះ សម្ដេច ហ៊ុន សែន បានចេញសារាចរណែនាំ ឱ្យក្រសួង រដ្ឋបាលថ្នាក់ក្រោមជាតិ គ្រឹះស្ថានអង្គការ និងកម្មករនិយោជិតត្រូវរៀបចំ ទិវាពលកម្មនេះ ក្រោមរូបភាពសម្រាកនៅផ្ទះ។ ចំណែកមេសហជីពប្រមាណ១០នាក់នៅព្រឹកថ្ងៃទី១០ មេសានេះ បានធ្វើការជួបជុំគ្នា ដើម្បីផ្សាយលើបណ្ដាញសង្គម ដើម្បីឱ្យកម្មករបានទស្សនានិងលើកកម្ពស់សិទ្ធិការងារ។ ជាមួយគ្នាដែរ ក្រុមសហជីព ក៏នឹងយកញត្តិទៅដាក់ ដាក់ជូនស្ថាប័នពាក់ព័ន្ធដូចរាល់ឆ្នាំដដែល ដើម្បីទាមទារអត្ថប្រយោជន៍ផ្សេងៗជូនកម្មករ-កម្មការិនី។
កម្មករនិយោជិតវិស័យកាត់ដេរនៅកម្ពុជា មានជាង១០ម៉ឺននាក់ ដែលរងផលប៉ះពាល់ការងារ ដោយសាររោងចក្រជាង១៣០ បានព្យួរការងារ ព្រោះការរាតត្បាតនៃជំងឺកូវីដ-១៩។ ភាគច្រើននៃរោងចក្រដែលព្យួរការងារ គឺមានបំណងចង់បិទទ្វាររោងចក្រតែម្ដង ប៉ុន្តែដោយសារមានការពិភាក្សាពីរដ្ឋាភិបាល ទើបម្ចាស់រោងចក្រសម្រេច ព្យួរការងារនិងផ្ដល់អន្ថប្រយោជន៍ខ្លះដល់កម្មករ។
ចំពោះអាជីវកម្មក្នុងវិស័យទេសចរណ៍នៅកម្ពុជា ដែលផ្អាកដំណើរការនិងបញ្ចាក់អាជីវកម្ម ដោយសារតែការរាតត្បាតនៃជំងឺកូវីដ-១៩ មានជាង២៨០០ទីតាំង ដែលបណ្ដាលឲ្យប៉ះពាល់បុគ្គលិកជាង៤,៦ម៉ឺននាក់។ ការបិទទ្វារអាជីវកម្មនេះ ស្មើជិត៣០ភាគរយ បើធៀបនឹងអាជីវកម្មទេសចរណ៍សរុបជាង៩៦០០ទីតាំង ក្នុងនោះមានសណ្ឋាគារ ផ្ទះសំណាក់ ភោជនីដ្ឋាន ខារ៉ាអូខេ ម៉ាស្សា ស្ប៉ា...ជាដើម។ នេះបើតាមបើតាមរបាយការណ៍ក្រសួងទេសចរណ៍។
រីឯ អ្នកធ្វើការក្រៅប្រព័ន្ធប្រមាណ២លាននាក់ ពោលគឺអ្នកធ្វើការដែលគ្មានថៅកែគ្រប់គ្រង ដូចជាអាជីវករលក់ដូរតាមដងផ្លូវ អ្នករត់ម៉ូតូ រ៉ឺម៉ក ឡាន កំពុងរងផលប៉ះពាល់ពីការរកចំណូលប្រចាំថ្ងៃ។ មេសហជីពសេដ្ឋកិច្ចក្រៅប្រព័ន្ធលោក វន់ ពៅ ថ្លែងប្រាប់សារព័ត៌មានថ្មីៗតាមទូរស័ព្ទនៅថ្ងៃទី១ ឧសភា នេះថា៖ «កម្មករធ្វើការសេដ្ឋកិច្ចក្រៅប្រព័ន្ធប្រហែល២លាននាក់ កំពុងរងផលប៉ះពាល់ពីការរកចំណូលប្រចាំថ្ងៃ ដោយធ្លាក់ចុះជាង៦០ទៅ៧០ភាពរយ»។ លោក វន់ ពៅ បន្ថែមថា បញ្ហាប្រឈមរបស់អ្នកធ្វើការក្រៅប្រព័ន្ធ គឺសេដ្ឋកិច្ចគ្រួសារខ្វះស្បៀងអាហារ បំណុលធនាគារ និងប្រឈមនឹងការឆ្លងជំងឺខ្ពស់ដោយសារគ្មានម៉ាស់ ទឹកអាល់កុលជាដើម។
ដោយឡែក ពលករត្រឡប់ពីក្រៅប្រទេសនៅមុនចូលឆ្នាំខ្មែរ មានជាង៨ម៉ឺននាក់ ត្រូវបានហាមឃាត់មិនឱ្យត្រឡប់ទៅក្រៅប្រទេស ដើម្បីទប់ស្កាត់ការរាលដាលជំងឺកូវីដ-១៩៕
អត្ថបទទាក់ទង
Tag:
កម្មករ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
