COVID-19
កីឡាអន្តរជាតិ
អន្តរជាតិ
Aguero៖ កីឡាករនៅ Premier League ភាគច្រើនខ្លាច COVID-19 ពេលលីគត្រឡប់មកវិញ
× Sergio Aguero ខ្សែប្រយុទ្ធឆ្នើមក្រុម Manchester City ជឿជាក់ថាកីឡាករភាគច្រើនមានការភ័យបារម្ភនៅពេលក្របខណ្ឌ Premier League វិលត្រឡប់មកវិញអំឡុងពេលជំងឺ COVID-19 កំពុងរាតត្បាត។
លីគកីឡាបាល់ទាត់កំពូលអង់គ្លេសទំនងជាអាចនឹងចាប់ផ្តើមឡើងវិញនៅដើមខែមិថុនា បន្ទាប់ពីប្រកាសផ្អាកកាលពីថ្ងៃទី១៣ ខែមីនា។ លទ្ធភាពដែលអង់គ្លេស ចាប់ផ្ដើមនៅមាន ស្របពេលដែលស្ថានការណ៍ COVID-19 ហាក់ធូរស្រាលបន្តិច។ កិច្ចប្រជុំដើម្បីរកវិធីសាស្ត្រឲ្យមានការប្រកួតឡើងវិញគ្រោងនឹងធ្វើឡើងនៅថ្ងៃទី១ ខែឧសភានេះ។
យ៉ាងណាក៏ដោយ Aguero ខ្សែប្រយុទ្ធអន្តរជាតិអាហ្សង់ទីនមើលឃើញថា កីឡាករដែលប្រកបអាជីពនៅ Premier League ភាគច្រើនមានការភ័យខ្លាចចំពេលមានវិបត្តិ COVID-19 ដែលនាំឲ្យមានអ្នកស្លាប់ជាង ២៣ម៉ឺននាក់នៅជុំវិញពិភពលោក និងឆ្លងលើសពី៣លានករណីមកទល់ពេលនេះ។
Aguero បានប្រាប់ទូរទស្សន៍ El Chiringuito ថា កីឡាករភាគច្រើនភ័យខ្លាច COVID-19 ដោយសារតែពួកគេមានគ្រួសារ និងមានកូនដ៏គួរឲ្យស្រឡាញ់។
«នៅពេលយើងត្រឡប់ទៅការប្រកួតវិញ ខ្ញុំស្រមៃថា យើងនឹងតឹងតែងណាស់ យើងនឹងប្រុងប្រយ័ត្នហើយនៅពេលមាននរណាម្នាក់ឈឺអ្នកនឹងគិតថា តើមានអ្វីកើតឡើងនៅទីនោះ? វាពិតជាធ្វើឲ្យខ្ញុំភ័យខ្លាចណាស់»។ នេះជាការរៀបរាប់របស់ខ្សែប្រយុទ្ធ Man City ប៉ុន្តែរូបគេក៏អះអាងដែរថា មានកីឡាករខ្លះទៀតក៏ពួកគេមិនព្រួយបារម្ភអំពីជងឺនេះទេ ហើយចង់ឲ្យមានការប្រកួតវិលមកវិញឆាប់ៗទៀតផង។
ចក្រភពអង់គ្លេស ក៏ជាតំបន់រងគ្រោះខ្លាំងដោយសារជំងឺឆ្លងបង្កដោយកូរ៉ូណាវីរុសប្រភេទថ្មីនេះផងដែរ ដោយគិតត្រឹមថ្ងៃទី១ ខែឧសភានេះមានករណីឆ្លងជាង១៧ម៉ឺននាក់ ក្នុងនោះអ្នកស្លាប់លើសពី ២៦០០០ នាក់។
ក្រុមម្ចាស់ជើងឯករដូវកាលមុន Man City បានដេញតាមពីក្រោយក្រុមកំពូលតារាង Liverpool ចំនួន ២៥ពិន្ទុ មុនពេលក្របខណ្ឌ Premier League ត្រូវសម្រេចឲ្យផ្អាកដោយសារតែជំងឺរាតត្បាតសកល COVID-19 នេះ៕
Tag:
COVID-19
Sergio Aguero
Premier League
© រក្សាសិទ្ធិដោយ thmeythmey.com