COVID-19
ជាតិ
កម្ពុជា ដាក់ចេញវិធានការ៩ចំណុចដើម្បីបន្តទប់ស្កាត់ការរាលដាលជំងឺកូវីដ-១៩
× ភ្នំពេញ៖ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានបើកកិច្ចប្រជុំជាមួយទីភ្នាក់ងារអង្គការសហប្រជាជាតិប្រចាំកម្ពុជា កាលពីថ្ងៃទី៣០ មេសា ដើម្បីពិនិត្យស្ថានការណ៍បច្ចុប្បន្ន ចែករំលែកព័ត៌មាន ក្នុងការត្រៀមរៀបចំ និងឆ្លើយតបនឹងជំងឺកូវីដ-១៩។ កិច្ចប្រជុំដែលដឹកនាំដោយរដ្ឋមន្ត្រីក្រសួងសុខាភិបាលនេះ ក៏រៀបចំឡើងដើម្បីពិភាក្សា និងកំណត់ការគាំទ្រជាអាទិភាពនាពេលអនាគត ដោយអង្គការសហប្រជាជាតិចំពោះរាជរដ្ឋាភិបាលកម្ពុជាក្នុងការប្រយុទ្ធនឹងជំងឺកូវីដ-១៩។
បើតាមសេចក្ដីជូនដំណឹងរបស់ក្រសួងសុខាភិបាល ក្នុងកិច្ចប្រជុំនេះភាគីកម្ពុជា សម្រេចដាក់ចេញចំណុចអាទិភាពចំនួន៩ ដើម្បីប្រយុទ្ធនឹងជំងឺកូវីដ-១៩ ដែលរួមមានការបន្តអនុវត្តផែនការមេ និងបន្តពង្រឹងប្រព័ន្ធសុខាភិបាល បណ្ដុះបណ្ដាល និងពង្រឹងសមត្ថភាពក្រុមការងារឆ្លើយតបបន្ទាន់។ វាយតម្លៃ និងពិនិត្យលើវិធានការចាំបាច់នានា, ការពារ និងគាំទ្រដល់ជនងាយរងគ្រោះ, ពង្រឹងយន្តការដឹកនាំ និងសម្របសម្រួលជាមួយភាគីពាក់ព័ន្ធ, ជំរុញការចូលរួមរបស់សហគមន៍ និងបុគ្គលគ្រប់រូប, ប្រើប្រាស់បច្ចេកវិទ្យាសម្រាប់គ្រប់គ្រង តាមដាន និងស្វែងរកជំងឺ, ការគៀរគរធនធានដើម្បីអនុវត្តតាមដាន និងវាយតម្លៃ និងបន្តកិច្ចសហការជាមួយដៃគូ UN និងវិស័យឯកជន លើការប្រយុទ្ធនឹងជំងឺឆ្លងនៅក្នុងប្រទេស»។
ក្រៅពីគាំទ្រចំណុចអាទិភាពដែលដាក់ចេញដោយកម្ពុជា ទីភ្នាក់ងារអង្គការសហប្រជាជាតិប្រចាំកម្ពុជា ក៏បានបញ្ជាក់ពីចំណុចអាទិភាពដែលខ្លួនជំរុញឲ្យផ្ដោតការគាំទ្រដែរ ដែលរួមមានការពារសេវា និងប្រព័ន្ធសុខាភិបាល, កិច្ចការពារសង្គម និងសេវាជាមូលដ្ឋាន កិច្ចការពារការងារ សហគ្រានធុនតូច និងមធ្យម, ម៉ាក្រូសេដ្ឋកិច្ច និងកិច្ចសហការពហុភាគី និងការត្រៀមលក្ខណៈរួចជាស្រេច និងការចូលរួមរបស់សហគមន៍ក្នុងការប្រយុទ្ធនឹងជំងឺឆ្លង។
សូមជម្រាបថា គិតត្រឹមថ្ងៃទី២ ឧសភានេះ កម្ពុជារកឃើញអ្នកមានកូវីដ-១៩ ចំនួន១២២នាក់ ក្នុងនោះមាន១២០នាក់ហើយដែលបានជាសះស្បើយ ឬស្មើនឹង ៩៩.៣៦ ភាគរយ។ អ្នកជំងឺនៅសល់តែ២នាក់ទៀតប៉ុណ្ណោះ។ អ្នកសះស្បើយទាំង១២០នាក់ មានស្រី៣៧នាក់ និងប្រុស ៨៣នាក់ ក្នុងនោះមានជនជាតិចិន ចំនួន៣នាក់ , អង់គ្លេស៥នាក់ , អាមេរិកាំង២នាក់ , បែលហ្សិក១នាក់, បារាំង៤០នាក់ , ម៉ាឡេស៊ី១៣នាក់ , កាណាដា២នាក់ , វៀតណាម៣នាក់, ឥណ្ឌូណេស៊ី២នាក់ និងជនជាតិខ្មែរ៤៩នាក់៕
Tag:
COVID-19
សុខភាព
ម៉ម ប៊ុនហេង
© រក្សាសិទ្ធិដោយ thmeythmey.com