ជាតិ
ឧត្តមសេនីយ ហ៊ឹម យ៉ាន៖ អ្នកទិញយានយន្តបង់រំលស់ ត្រូវមានឯកសារទិញលក់តាមខ្លួន
×![]()
ដោយ: ថ្មីៗ
នាយឧត្ដមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានណែទៅនគរបាលចរាចរណ៍ទូទាំងរាជធានី-ខេត្ត មិនត្រូវផាកពិន័យចំពោះប្រជាពលរដ្ឋ ដែលទិញរថយន្ត ម៉ូតូ ឬម៉ូតូកង់បី បង់រំលស់ ហើយកំពុងប្រើប្រាស់ប័ណ្ណសំគាល់យានយន្ត(កាតគ្រី)ថតចម្លងនោះទេ។ នេះបើយោងតាមការចុះផ្សាយរបស់គេហទំព័រអគ្គស្នងការនគរបាលជាតិ។ 
គេហទំព័រអគ្គស្នងការនគរបាលជាតិ ផ្សាយដូច្នេះ៖«ចំពោះយានយន្តទិញបង់រំលស់ ក្នុងជំហានដំបូងនេះ ស្នើអនុញ្ញាតឲ្យប្រើប្រាស់បណ្ណសម្គាល់យានយន្តថត ចម្លងដែលបញ្ជាក់ដោយក្រុមហ៊ុនសិន។ នាពេលខាងមុខ នឹងតម្រូវឲ្យប្រើប្រាស់បណ្ណសម្គាល់យានយន្តថត ចម្លង ដែលមានប្រថាប់ត្រាអាជ្ញាធរមូលដ្ឋាន»។
ការណែនាំនេះ គឺទំនងពីមានការត្អូញត្អែពីប្រជាពលរដ្ឋជាច្រើន ដែលបានទិញរថយន្ត ម៉ូតូ ឬម៉ូតូកង់បី បង់រំលស់។ ក្រៅពីករណីនេះ នាយឧត្ដមសេនីយ៍ ក៏បានបានប្រាប់ទៅនគរបាលចរាចរណ៍ទូទាំងប្រទេសដែរថា ករណីយានយន្តមានលិខិតបំពាក់ផ្លាកលេខ ក៏មិនត្រូវឃាត់ត្រួតពិនិត្យរកករណីល្មើសផ្សេងៗនោះដែរ។ ករណីឆៀកផុតសុពលភាព ក៏ដូចគ្នាដែរ គឺមិនត្រូវឃាត់នោះទេ។
កន្លងមក រដ្ឋមន្ត្រីក្រសួងមហាផ្ទៃ ធ្លាប់បានបញ្ជាក់ហើយថា នគរបាលចរាចរណ៍ នឹងឃាត់តែយានយន្តណាដែលបើកបរមិនគោរពច្បាប់តែប៉ុណ្ណោះ ចំណែកឯអ្នកបើកបរគោរពច្បាប់ត្រឹមត្រូវ នឹងមិនត្រូវបានហាមឃាត់ ដើម្បីសួររកឯកសារនោះទេ។
នគរបាលចរាចរណ៍ បានចាប់ផ្តើមរឹតបន្តឹងការអនុវត្តច្បាប់ចរាចរណ៍ ចាប់ពីថ្ងៃទី១ ខែឧសភា។ លោក ហ៊ឹម យ៉ាន អគ្គស្នងការរងនៃអគ្គស្នងការដ្ឋាននគរបាលជាតិ ធ្លាប់បានបញ្ជាក់នៅក្នុងសន្និសីទសារព័ត៌មាន នៅទីស្ដីការគណៈរដ្ឋមន្រី្ត កាលពីថ្ងៃទី៣០ មេសាថា នគរបាលបានកំណត់យកបទល្មើសចំនួនបទល្មើសសម្រាប់ម៉ូតូ និងរថយន្ត ចំនួន១៦ ដែលត្រូវរពិន័យមុនគេ ក្នុងពេលរឹតបន្តឹងការអនុវត្តច្បាប់។
សម្រាប់ទោចក្រយានុន្ត ត្រីចក្រយានយន្ត ត្រីចក្រយានយន្តសណ្តោងរ៉ឺម៉ក និងម៉ូតូកង់បួន មានបទល្មើស៧ចំណុច ក្នុងចំណោម៣៣ ដែលត្រូវត្រួតពិនិត្យមុនគេ ក្នុងនោះរួមមាន មិនពាក់មួកសុវត្ថិភាព,មិនគោរពភ្លើង និងផ្លាកសញ្ញាចរាចរណ៍, ល្មើសក្នុងការបត់ ការវ៉ាជែង, ការដឹកលើសចំណុះ,ស្រវឹង,គ្មានផ្លាកលេង និងប្រើទូរសព្ទពេលបើកបរដោយគ្មានឧបករណ៍ភ្ជាប់សំឡេង។
ចំណែកបទល្មើសរថយន្តមាន៩ ក្នុងចំណោម៤១ ដែលត្រូវត្រួតពិនិត្យ និងចាប់ផាកពិន័យមុនគេ គឺរួមមានល្មើសល្បឿន, ស្រវឹង, គ្មានបណ្ណបើកបរ, មិនគោរពភ្លើងសញ្ញា និងផ្លាកសញ្ញាចរាចរណ៍, ល្មើសក្នុងការបទ និងវ៉ាជែង, មិនពាក់ខ្សែក្រវាត់សុវត្ថិភាព, ដឹកលើសចំណុះ, គ្មានស្លាកលេខ និងបណ្ណសម្គាល់យានយន្ត និងនិយាយទូរស័ព្ទពេលបើកបរដោយគ្មានឧករណ៍ភ្ជាប់សំឡេង៕
© រក្សាសិទ្ធិដោយ thmeythmey.com
