ជាតិ
សង្គមជាតិ
លោក ណុប វី៖ អ្នកសារព័ត៌មាន នឹងមានហានិភ័យខ្ពស់ បើសិនជាយកក្រមព្រហ្មទណ្ឌមកចោទប្រកាន់
× ភ្នំពេញ៖ អ្នកសារព័ត៌មានកំពុងប្រឈមនឹងការគំរាមកំហែងសិទ្ធសេរីភាព តាមរយៈការប្រើប្រាស់ក្រមព្រហ្មទណ្ឌ ពីសំណាក់រដ្ឋាភិបាល និងអាជ្ញាធរ។ នេះជាការយល់ឃើញរបស់លោក ណុប វី នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា។
លោក ណុប វី បានមើលឃើញថា ស្ថានភាពសេរីភាពសារព័ត៌មានចុងក្រោយនេះ ត្រូវបានរងការគំរាមកំហែងដោយផ្ទាល់ និងដោយប្រយោល ក្រោយពីរដ្ឋាភិបាល ក៏ដូចជាអាជ្ញាធរប្រើប្រាស់ច្បាប់ព្រហ្មទណ្ឌមកអនុវត្តលើពួកគេ។ សម្រាប់លោក ណុប វី ការប្រើប្រាស់ច្បាប់ព្រហ្មទណ្ឌនេះ ហាក់ដូចជាមិនត្រឹមត្រូវឡើយ ខណៈដែលកម្ពុជា ក៏មានច្បាប់ស្តីពីរបបសារព័ត៌មាន។ ត្រង់ចំណុចនេះលោក ណុប វី បានសង្កត់ធ្ងន់ថា ការប្រើប្រាស់ច្បាប់ស្តីពីរបបសារព័ត៌មាន មកអនុវត្តលើអ្នកសារព័ត៌មាននោះ វាជារូបភាពល្អប្រសើរជាងការចោទប្រកាន់ និងចាប់ឃុំខ្លួនពួកគេ។
សូមស្ដាប់កិច្ចសម្ភាសរបស់លោក រំដួល ចិត្រា អ្នកសារព័ត៌មានថ្មីៗ ជាមួយលោក ណុប វី នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា ដូចតទៅ៖
«រឿងមួយដែលយើងមានការព្រួយបារម្ភ បើសិនជាក្រមព្រហ្មទណ្ឌត្រូវបានយកមកចោទប្រកាន់ ប្រើប្រាស់ទៅលើអ្នកសារព័ត៌មាន ដូចជាប្រជាពលរដ្ឋផ្សេងៗទៀត ខ្ញុំគិតថា អ្នកសារព័ត៌មាននឹងមានហានិភ័យធំជាងប្រជាពលរដ្ឋផ្សេងៗ ដោយសារតែពួកគាត់ជាផ្នែកយ៉ាងសំខាន់ អាចថាជាអ្នកនាំសារ អាចថាជាស្ពានចម្លងនូវព័ត៌មានផ្សេងៗ។ គាត់ចុះជួបប្រជាពលរដ្ឋ គាត់ចុះជួបប្រភពរបស់គាត់ ជាងប្រជាពលរដ្ឋធម្មតា ដូច្នេះហើយធ្វើឱ្យគាត់មានបញ្ហាប្រឈមជាងពលរដ្ឋធម្មតា»។ នេះជាការមើលឃើញរបស់លោក ណុប វី។
និយាយបែបនេះ មិនមែនមានន័យថា លោក ណុប វី មិនចង់ឱ្យរដ្ឋាភិបាល ឬអាជ្ញាធរ ប្រើច្បាប់អនុវត្តលើអ្នកសារព័ត៌មាននោះទេ ។ ប៉ុន្តែលោកគ្រាន់តែចង់ឃើញការអនុវត្តច្បាប់មកលើអ្នកសារព័ត៌មាននោះ វាស្របតាមច្បាប់ស្តីពីរបបសារព័ត៌មានប៉ុណ្ណោះ។ បើតាមលោក ណុប វី ការគំរាមកំហែងដល់មន្ត្រីសិទ្ធិមនុស្ស និងប្រភពនានា ក៏ធ្វើឱ្យប៉ះពាល់ដល់សេរីភាពសារព័ត៌មានដែរ។
ក្រៅពីផលលំបាកអ្នកសារព័ត៌មាននេះ នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ក៏មើលឃើញពីចំណុចខ្វះខាតរបស់អ្នកសារព័ត៌មានខ្លះដែរ ទាក់ទងនឹងកង្វះក្រមសីលធម៌ វិជ្ជាជីវៈជាដើម។ ត្រង់ចំណោទបញ្ហានេះ លោក ណុប វី ស្នើឱ្យអ្នកសារព័ត៌មាន ដែលនៅមានចំណុចខ្វះលើផ្នែកសីលធម៌ និងវិជ្ជាជីវៈ ពង្រឹងសមត្ថភាព និងការទទួលខុសត្រូវខ្លួនវិញ តាមរយៈការចុះផ្សាយអត្ថបទ ប្រកបដោយមានគុណភាពខ្ពស់ ការអនុវត្តការងារឱ្យបានត្រឹមត្រូវ ដើម្បីកុំឱ្យប៉ះពាល់ដល់តម្លៃអ្នកសារព័ត៌មានដទៃទៀត។ ចំណែករដ្ឋាភិបាល និងអាជ្ញាធរវិញ គប្បីសហការជាមួយអ្នកកាសែតឱ្យបានល្អ ចៀសវាងការចោទប្រកាន់គ្នាទៅវិញទៅមក ដែលឈានដល់ការប្ដឹងផ្ដល់ជាដើម។
ថ្ងៃទី៣ ឧសភានេះ ជាទិវាសេរីភាពសារព័ត៌មានពិភពលោក លើកទី២៧ ។ ឆ្នាំនេះ អ្នកសារព័ត៌មានក្នុងពិភពលោក អបអរសាទរ ឬទាមទារសេរីភាព ក្នុងការប្រកបវិជ្ជាជីវៈរបស់ខ្លួន ក្រោមប្រធានបទ«សារព័ត៌មានដោយគ្មានភាពភ័យខ្លាច និងភាពទោរទន់» (Journalism without fear and favor)៕
Tag:
សេរីភាពសារព័ត៌មាន
ណុប វី
© រក្សាសិទ្ធិដោយ thmeythmey.com