អន្តរជាតិ
ហ្វីលីពីន ថ្លែងការណ៍ជំទាស់ជាថ្មី ក្រោយចិនប្រកាសតំបន់ត្រួតស៊ីគ្នានៅសមុទ្រចិនខាងត្បូង ជាមជ្ឈមណ្ឌលរដ្ឋបាលរបស់ខ្លួន ប្រជាជនហ្វីលីពីនតវ៉ាប្រឆាំងសកម្មភាពចិននៅសមុទ្រចិនខាងត្បូងកាលពីឆ្នាំ ២០១៩ (រូបភាព៖ Bernar News)
× រដ្ឋាភិបាលក្រុងម៉ានីល បានចេញសេចក្តីថ្លែងការណ៍ជំទាស់ជាថ្មីម្តងទៀត ចំពោះសកម្មភាពឯកតោភាគីរបស់រដ្ឋាភិបាលក្រុងប៉េកាំងនៅលើតំបន់ ដែលភាគីពាក់ព័ន្ធនៃជម្លោះសមុទ្រចិនខាងត្បូង មិនទាន់ដោះស្រាយដាច់ស្រឡះជាមួយគ្នានៅឡើយ។ ក្រុងម៉ានីល ដែលកន្លងមកចាត់ទុកក្រុងប៉េកាំង ជាមិត្តជិតស្និទ្ធជារហូតនោះ បានចាត់ទុកសកម្មភាពបែបនេះ គឺជាសកម្មភាពខុសច្បាប់សុទ្ធសាធ។
មួយសប្តាហ៍ក្រោយ នៃការធ្វើកំណត់ទូតជំទាស់ លើការប្រកាសបង្កើតរដ្ឋបាលថ្មីចំនួនពីររបស់រដ្ឋាភិបាលចិន ក្នុងសមុទ្រចិនខាងត្បូង ក្រសួងការបរទេសហ្វីលីពីន នៅថ្ងៃ២៨ មេសាកន្លងទៅ បានចេញសេចក្តីថ្លែងការណ៍ជំទាស់ថ្មីមួយទៀត តបទៅនឹងសកម្មភាពរបស់រដ្ឋាភិបាលចិន ដែលបានប្រកាសតំបន់ថ្មប៉ប្រះទឹក Fiery Cross Reef នៃសមុទ្រចិនខាងត្បូង ជាមជ្ឈមណ្ឌលរដ្ឋបាលរបស់ខ្លួន។
តាមការចុះផ្សាយរបស់សារព័ត៌មាន South China Morning Post ក្រសួងការបរទេសហ្វីលីពីន បានទទូចឲ្យចិនអនុវត្តតាមច្បាប់អន្តរជាតិ និងរម្លឹកដល់ចិន អំពីកិច្ចព្រមព្រៀងឆ្នាំ២០០២ ដែលជាយន្តការធ្វើឡើងរវាងចិន និងអាស៊ាន ក្នុងការគ្រប់គ្រងសកម្មភាពរបស់ខ្លួន ក្នុងសមុទ្រចិនខាងត្បូង ជាពិសេសការចៀសវាងធ្វើសកម្មភាពណាមួយ ដែលបង្កឲ្យកើតមានជាជម្លោះ និងគំរាមកំហែងដល់ស្ថិរភាពក្នុងតំបន់។
មិនត្រឹមតែប៉ុណ្ណោះ ក្រុងម៉ានីល ក៏បានពន្លេចសាលក្រមឆ្នាំ២០១៦ របស់តុលាការមជ្ឈត្តការអន្តរជាតិក្រុងឡាអេ ដែលបានប្រកាសចាត់ទុកសកម្មភាពទាមទាររបស់ចិន នៅក្នុងសមុទ្រចិនខាងត្បូង ដោយយោងតាមការអំណះអំណាងប្រវត្តិសាស្ត្រ ថាគ្មានសុពលភាព នៅក្នុងសេចក្តីថ្លែងការណ៍នោះផងដែរ។ សាលក្រមនេះ គឺជាលិខិតូបករណ៍អន្តរជាតិ ដែលចិនស្អប់បំផុត និងថែមទាំងប្រកាសដាច់ខាតមិនទទួលឡើយ។
នេះ គឺជាជំហរការទូតថ្មីចុងក្រោយហើយ របស់ហ្វីលីពីន ដែលថ្មីៗនេះ ទើបតែប្រកាសចាត់ទុកចិន ជាដៃគូដែលមិនអាចខ្វះបាន។ គិតចាប់ពីរដ្ឋបាលលោកប្រធានាធិបតី រ៉ូឌ្រីហ្គោ ឌូទើតេ ឡើងកាន់អំណាចឆ្នាំ២០១៦មក ហ្វីលីពីន បានប្រកាសជំហរទន់ភ្លន់ជាមួយចិន ក្នុងការដោះស្រាយជម្លោះអធិបតេយ្យសមុទ្រចិនខាងត្បូង ដោយហ្វីលីពីន ជ្រើសរើសយកការចរចាសន្តិវិធី ជាមធ្យោបាយចម្បង។
គួរជម្រាបផងដែរថា ជម្លោះសមុទ្រចិនខាងត្បូង ហាក់ចាប់ផ្តើមឡើងកំដៅជាថ្មី នាពេលចុងក្រោយនេះ បន្ទាប់ពីមានការចុះផ្សាយជាបន្តបន្ទាប់ ពីសកម្មភាពរបស់ចិន ក្នុងការពង្រីកទឹកដីនៅតំបន់មានវិវាទនោះ ខណៈដែលប្រទេសអាស៊ាន និងចិន កំពុងតែស្ថិតក្នុងដំណាក់កាលចរចា បង្កើតបទដ្ឋានមួយសម្រាប់គ្រប់គ្រងសកម្មភាពនៅទីនោះ៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com