បេក្ខជនប្រធានាធិបតីតំណាងបក្សប្រជាធិបតេយ្យ ចូ បៃឌិន (Joe Biden) នៅថ្ងៃទី២ ខែឧសភាបានបង្ហាញការគាំទ្រដល់ក្រុមកីឡាបាល់ទាត់ស្ត្រីអាមេរិក ជុំវិញការប្តឹងតវ៉ារបស់ពួកគេក្នុងការទាមទាប្រាក់ឈ្នួលស្មើគ្នានឹងក្រុមបុរស។ ការគាំទ្ររបស់លោក បៃឌិន ធ្វើឡើងបន្ទាប់ពីតុលាការអាមេរិកច្រានចោលការទាមទាររបស់ក្រុមកីឡាការិនីអាមេរិកលើតម្លៃប្រាក់ឈ្នួលនេះ។
ការទាមទារររបស់ក្រុមជម្រើសជាតិស្ត្រីអាមេរិកសម្រាប់ប្រាក់ឈ្នួលស្មើគ្នាខាងលើនេះ ត្រូវតុលាការច្រានចោលកាលពីថ្ងៃទី១ ខែឧសភាដោយប្រគល់ជ័យជម្នះទៅឲ្យសហព័ន្ធកីឡាបាល់ទាត់អាមេរិក (USSF)។
ពាក្យបណ្ដឹងទៅតុលាការដើម្បីប្តឹងទៅ USSF របស់ក្រុមម្ចាស់ជើងឯក World Cup ស្ត្រីនេះធ្វើឡើងដោយកីឡាការនីជម្រើសជាតិចំនួន២៨នាក់កាលពីឆ្នាំ២០១៩។ ពួកគេបានប្ដឹងទារសំណងទឹកប្រាក់ ៦៦លានដុល្លារអាមេរិក ដោយយកច្បាប់ស្ដីពីការផ្ដល់ប្រាក់ឈ្នួលស្មើគ្នា (Equal Pay Act) ជាសំអាង។
ក្រោយការប្រកាសរបស់តុលាការបែបនេះ លោក បៃឌិន បានសម្តែងការគាំទ្រទៅកាន់ក្រុមកីឡាការិនីអាមេរិកដោយផ្តល់កម្លាំងចិត្តថា កុំបោះបង់ការទាមទារនេះ ដ្បិតអ្វីៗមិនទាន់ចប់នោះទេ។
បេក្ខជនប្រធានាធិបតីតំណាងបក្សប្រជាធិបតេយ្យរូបនេះបន្ថែមថា៖« ប្រាក់ខែស្មើរគ្នានៅពេលនេះ ឬថ្ងៃក្រោយទៀត នឹងអាចកើតឡើងនៅពេលខ្ញុំជាប្រធានាធិបតី។ អ្នកអាចទៅកន្លែងផ្សេងទៀតសម្រាប់ការផ្តល់មូលនិធិ World Cup»។
លោក លោក បៃឌិន ដែលជាអតីតអនុប្រធានាធិបតីអាមេរិកកំពុងប្រជែងកៅអីប្រធានាធិបតីជាមួយលោក ដូណាល់ ត្រាំ ដែលកំពុងកាន់តំណែងក្នុងការបោះឆ្នោតប្រធានាធិបតីអាមេរិកនៅខែវិច្ឆិកា ឆ្នាំ២០២០ ខាងមុខ។
យ៉ាងណាក៏ដោយ គេមិនដឹងច្បាស់ថាការលើកឡើងរបស់លោក បៃឌិនដូច្នេះជាការទាញប្រយោជ៍នយោបាយ ឬក៏អត់នោះទេ ខណៈពេលកំពុងត្រៀមការបោះឆ្នោត។ កន្លងទៅ ក្រុមជម្រើសជាតិនារីអាមេរិកនេះធ្លាប់មានរឿងចម្រូងចម្រាសជាមួយលោក ត្រាំ ផងដែរ។
អំឡុងពេល ក្រុមកីឡាបាល់ទាត់ជម្រើសជាតិអាមេរិកផ្នែកនារី ប្រកួតប្រជែងរហូតដណ្តើមបានជើងឯកបាល់ទាត់ពិភពលោក Women’s World Cup ឆ្នាំ ២០១៩ ដែលជាការឈ្នះលើកទី ៤ លោក ត្រាំ បានបង្កជម្លោះជាមួយប្រធានក្រុម Megan Rapinoe តាមរយៈពាក្យសម្តី។
ការឆ្លើយឆ្លងរិះគន់គ្នារវាងកីឡាការិនីទល់ប្រធានាធិបតីបានកើតឡើងតាំងពីវគ្គ៨ក្រុមចុងក្រោយរហូតដល់ឈ្នះជើងឯកតែម្តង៕