ជាតិ
សង្គមជាតិ
ភិក្ខុ ឡុង ចន្ថា យល់ព្រមលាចាកសិក្ខាបទ
× ព្រះតេជគុណ ឡុង ចន្ថា ដែលរងការរិះគន់ខ្លាំង ពីរឿងដែលព្រះអង្គ លួចទាក់ទងនិងប្រើពាក្យលែបខាយក្នុងន័យស្នេហាជាមួយនារីម្នាក់ បានធ្វើកិច្ចសន្យាជាមួយមន្រ្តីសង្ឃថា ព្រះអង្គ នឹងលាចាកសិក្ខាបទ (សឹក) នៅថ្ងៃទី១៤ ខែឧសភា ឆ្នាំ២០២០ខាងមុខ។
ព្រះអង្គ ឡុង ចន្ថា ប្រាប់សារព័ត៌មានថ្មីៗតាមទូរស័ព្ទ នៅល្ងាចថ្ងៃទី៤ ខែឧសភាថា មន្រ្តីសង្ឃ ពុំបានបង្ខំឲ្យព្រះអង្គ សឹកឡើយ តែវា ជាការយល់ព្រមដោយព្រះអង្គឯង។ ព្រះអង្គ មានសង្ឃដីកាដូច្នេះថា៖«កុំឲ្យប៉ះពាល់ដល់តម្លៃព្រះពុទ្ធសាសនា កុំឲ្យរឿងវែងឆ្ងាយ អាត្មា សុខចិត្តសឹក»។
នៅថ្ងៃទី៤ ខែឧសភានេះ សម្តេចគណៈសង្ឃនាយក នន្ទ ង៉ែត បានស្នើឲ្យព្រះមេគណខេត្តតាកែវ និមន្តព្រះអង្គ ឡុង ចន្ថា ចូលទៅដោះស្រាយក្នុងរឿងអាស្រូវនេះ។ ក្រោយឆ្លងកាត់ការដោះស្រាយជាមួយគ្នា ព្រះអង្គ ឡុង ចន្ថា ក៏សរសេរកិច្ចសន្យាពីការលាចាកសិក្ខាបទ។
យ៉ាងណា ក្នុងកិច្ចសម្ភាសជាមួយសារព័ត៌មានថ្មីៗ ព្រះអង្គ ឡុង ចន្ថា បដិសេធថា ព្រះអង្គ ពុំត្រូវអាបត្តិបារាជិកនោះទេ (អាបត្តិធ្ងន់ជាងគេបំផុតក្នុងវិន័យព្រះពុទ្ធសាសនា ដែលទាមទារឲ្យភិក្ខុ ដែលត្រូវអាបត្តិនេះ ត្រូវលាចាកសិក្ខបទ)។
ការប្រព្រឹត្តខុសឆ្គង៤យ៉ាង ដែលនាំឲ្យភិក្ខុ ត្រូវអាបត្តិបារាជិក រួមមាន ការសេពសន្ថវៈជាមួយស្ត្រី ការលួចទ្រព្យរបស់គេ ការសម្លាប់មនុស្ស និង ការអួតពីឧត្តរិមនុស្សធម្ម។ ការអួតពីឧត្តរិមនុស្សធម្ម គឺជាការអួតថាខ្លួន ជាមនុស្សមានគុណវិសេសលើសលែង ជាងមនុស្សធម្មតា ហើយបានសម្រេចធម៌វិសេស ដើម្បីទទួលបានលាភសក្ការ ពីបរិស័ទ ដែលមានជំនឿពីការអួតនោះ។
ព្រះអង្គ ឡុង ចន្ថា អះអាងថា ព្រះអង្គ គ្រាន់ប្រើពាក្យសម្តីបែបលេងសើចជាមួយនារីម្នាក់នោះប់ុណ្ណោះ តែពុំ ធ្លាប់បានប៉ះពាល់រាងកាយនាងឡើយ។ បច្ចុប្បន្ន ព្រះអង្គ គង់នៅវត្តមួយ ក្នុងខេត្តតាកែវ៕
© រក្សាសិទ្ធិដោយ thmeythmey.com