នាយករដ្ឋមន្ត្រីជប៉ុន ស៊ិនហ្សូ អាបេ នៅថ្ងៃទី៤ ខែឧសភានេះ បានប្រកាសបន្តដាក់ប្រទេសទាំងមូលក្នុងស្ថានភាពអាសន្នរហូតដល់ថ្ងៃទី៣១ ខែឧសភា។ ក្នុងដំណាក់ពេលនេះ ជប៉ុនត្រូវត្រៀមប្រយុទ្ធប្រឆាំងនឹងជំងឺ COVID-19 ដែលមានរយៈពេលវែងទៅមុខទៀត។
លោកនាយករដ្ឋមន្ត្រីជប៉ុន ស៊ិនហ្សូ អាបេ បានប្រកាសដាក់ប្រទេសក្នុងស្ថានភាពអាសន្នរហូតដល់ថ្ងៃទី៣១ ខែឧសភា បន្ទាប់ពីលោកបានជួបប្រឹក្សាយោបល់ជាមួយអ្នកជំនាញជំងឺឆ្លង។ ការបន្តដាក់ប្រទេសជប៉ុនទាំងស្រុងក្នុងស្ថានភាពអាសន្ននេះ ធ្វើឡើងមុនការផុតរលត់ការប្រកាសលើកមុនដែលមានសុពលភាពត្រឹមថ្ងៃទី៦ ខែឧសភា។
«ខ្ញុំនឹងបន្តរយៈពេលស្ថានភាពអាសន្នដែលបានប្រកាសពីថ្ងៃទី៧ ខែមេសា រហូតដល់ថ្ងៃទី៣១ ខែឧសភា។» លោក អាបេ ប្រកាសបែបនេះក្រោយកិច្ចប្រជុំជាមួយមន្ត្រីលើវិធានការឆ្លើយតបជំងឺ COVID-19 ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
កាលពីថ្ងៃទី៧ ខែមេសា លោកស៊ិនហ្សូ អាបេ នាយករដ្ឋមន្ត្រីជប៉ុនបានដាក់ត្រឹមតែដាក់ទីក្រុងតូក្យូ និងតំបន់ចំនួន៦ក្នុងស្ថានភាពអាសន្នប៉ុណ្ណោះ។ ក្រោយមក លោក អាបេ ក៏ដាក់ប្រទេសជប៉ុនទាំងមូលក្នុងស្ថានភាពនៅថ្ងៃទី១៦ មេសា។ មុនការប្រកាសរបស់លោក អាបេ រដ្ឋមន្ត្រីទទួលបន្ទូកការឆ្លើយតប COVID-19 ព្រមានថា ករណីឆ្លងនៅកើន ហើយកិច្ចការសហប្រតិបត្តិការជាមួយប្រជាជន នៅត្រូវការ។
តាមពិតទៅ ការដាក់ប្រទេសក្នុងស្ថានភាពអាសន្ននៅជប៉ុន មានលក្ខណៈរឹតត្បិតតិចជាងនៅអឺរ៉ុប និងអាមេរិក។ ក្នុងនោះ អភិបាលតំបន់បានត្រឹមតែទទូចឲ្យមនុស្សនៅផ្ទះ និងបិទអាជីវកម្មតែប៉ុណ្ណោះ ហើយអាជ្ញាធរក៏ពុំអាចបង្ខំឲ្យប្រជាពលរដ្ឋអនុវត្តតាម ឫពិន័យឡើយ។
ជាមួយនឹងការប្រកាសបន្តរយៈពេលអាសន្ននេះ អាជ្ញាធរក្នុងតំបន់ចំនួន១៣ និងទីក្រុងតូក្យូដែលប្រឈមនឹងការឆ្លងខ្ពស់ នឹងអំពាវនាវឲ្យប្រជាជនកាត់បន្ថយការទាក់ទងផ្ទាល់ឲ្យបាន៨០ភាគរយ និងអនុវត្តគម្លាតសុវត្ថិភាពឲ្យបានត្រឹមត្រូវ។ ចំណែកឯសារមន្ទីរ និងបណ្ណាល័យ ក៏ដូចជាកន្លែងផ្សេងៗទៀតអាចបន្តឲ្យបើក បើសិនជាចាត់វិធានការសម្លាប់មេរោគ។
ករណីឆ្លង COVID-19 នៅជប៉ុន មានលើសពី១៥,០០០ករណី និងស្លាប់ចំនួន៥១០នាក់។ ប៉ុន្តែសមាគមគ្រូពេទ្យជប៉ុនព្រមានថា មន្ទីរពេទ្យមានលទ្ធភាពតិចក្នុងការយកចិត្តទុកដាក់លើអ្នកជំងឺ។
ក្នុងន័យកាត់បន្ថយបន្ទុកលើមន្ទីរពេទ្យ អាជ្ញាធរជប៉ុន បានបញ្ជូនអ្នកដែលឆ្លងជំងឺ COVID-19 តែមិនចេញរោគសញ្ញាទៅធ្វើចត្តាឡីស័កក្នុងសណ្ឋាគារ ជៀសជាងក្នុងមន្ទីរពេទ្យដែលមានមនុស្សណែនស្រាប់។ រដ្ឋាភិបាលជប៉ុន ក៏បានបង្កើនសមត្ថភាពធ្វើតេស្តផងដែរ ប៉ុន្តែបន្តររងការរិះគន់ដោយសារការធ្វើតេស្តមានចំនួនតិច ព្រោះលក្ខខណ្ឌមានភាពតឹងតែងពេក៕