COVID-19
អន្តរជាតិ
បុគ្គលិកវេជ្ជសាស្ត្រ និងបុគ្គលិកជំនួយ ៦៦នាក់នៅសិង្ហបុរីឆ្លង COVID-19 បុគ្គលិកវេជ្ជសាស្រ្តកំពុងយកសំណាកពីប្រជាជន ដើម្បីធ្វើតេស្តរកមើលកូរ៉ូណាវីរុស។ រូបភាព៖ AFP
× ចាប់គិតពីថ្ងៃទី២៦ ខែមេសាកន្លងមក បុគ្គលិកវេជ្ជសាស្ត្រ និងបុគ្គលិកជំនួយផ្នែកវេជ្ជសាស្ត្រ (Support Staff) ចំនួន ៦៦នាក់ ត្រូវបានគេរាយការណ៍ថា មានផ្ទុកជំងឺរលាកសួត ដែលបង្កដោយកូរ៉ូណាវីរុស(COVID-19)។ នេះបើតាមការបញ្ជាក់របស់រដ្ឋមន្ត្រីសុខាភិបាលសិង្ហបុរី លោកGan Kim Yong នៅក្នុងសភានាថ្ងៃទី៤ ខែឧសភា។
មិនមែនតែប្រជាជនឡើយ សូម្បីតែបុគ្គលិកសុខាភិបាលក៏ឆ្លង COVID-19 ដែរ។ លោក Gan Kim Yong រដ្ឋមន្ត្រីសុខាភិបាលសិង្ហបុរីបានលើកឡើងថា បុគ្គលិកសុខាភិបាល៦៦នាក់ ឆ្លងជំងឺ COVID-19 ហើយក្នុងនោះមានបុគ្គលិកវេជ្ជសាស្ត្រចំនួន៤៦នាក់។
ថ្លែងក្នុងកិច្ចប្រជុំសភា រដ្ឋមន្ត្រីសុខាភិបាលបានអះអាងដោយយោងតាមការស៊ើបអង្កេតនាពេលកន្លងមក ថា គេមិនបានរកឃើញករណីឆ្លង មានទាក់ទងនឹងការបំពេញកាតព្វកិច្ច ឬមើលថែអ្នកជំងឺនោះឡើយ។ ប៉ុន្តែលោក Gan ថា មានករណីមួយដែលទំនងជាឆ្លងអំឡុងពេលបំពេញភារកិច្ច គឺករណីឆ្លង COVID-19 លើវេជ្ជបណ្ឌិតម្នាក់នៅក្នុងកន្លែងថែទាំសុខភាពឯកជនមួយកន្លែង។
លោក Gan បានបន្តទៀតថា ភាគច្រើននៃករណីឆ្លងលើបុគ្គលិកវេជ្ជសាស្ត្រនេះ គឺជាករណីឆ្លងមកពីបរទេស, ករណីឆ្លងមកពីគ្រួសារ និងករណីឆ្លងជាចង្កោមនៅក្នុងព្រះវិហារសាសនាជាដើម។ បុគ្គលិកសុខាភិបាលចំនួន ៤៦នាក់ គឺជាមានប្រវត្តិទាក់ទងដោយផ្ទាល់ជាមួយអ្នកជំងឺ COVID-19 ។ នេះបើតាមការចុះផ្សាយរបស់ទូរទស្សន៍ Channel News Asia។
យ៉ាងណាក៏ដោយ រដ្ឋាភិបាលសិង្ហបុរី នឹងព្យាយាមព្យាបាលអ្នកជំងឺ COVID-19 ដែលជាបុគ្គលិកវេជ្ជសាស្ត្រឲ្យល្អបំផុត ដើម្បីការពារអ្នកទាំងនោះ និងក្រុមគ្រួសារពីជំងឺឆ្លងសកលថ្មីមួយនេះ។
សូមបញ្ជាក់ថា នាថ្ងៃទី៤ ខែឧសភានេះ សិង្ហបុរី ត្រូវបានគេរាយការណ៍ថា មានករណីឆ្លងថ្មីនៃ COVID-19 ចំនួន៥៧៣ករណី។ តួលេខសរុបនៃកូរ៉ូណាវីរុសរបស់សិង្ហបុរីមានចំនួន ១៨៧៧៨ករណី អ្នកស្លាប់ចំនួន ១៨នាក់ និងអ្នកជាសះស្បើយមានចំនួន ១៤០៨នាក់។ ភាគច្រើននៃករណីឆ្លងនៅប្រទេសអាស៊ីអាគ្នេយ៍មួយនេះ គឺជាករណីឆ្លងជាចង្កោមដែលរកឃើញនៅតាមបន្ទប់ស្នាក់នៅរបស់ពលករបរទេស៕
Tag:
សិង្ហបុរី
COVID-19
© រក្សាសិទ្ធិដោយ thmeythmey.com