COVID-19
អន្តរជាតិ
ប្រធានគណៈកម្មការអឺរ៉ុប អឺស៊ុឡា វ៉ុន ដឺ លៃអេន ។ រូបភាព AFP
×![]()
ដោយ: តន ចាន់រិទ្ធារ៉ា
តារាជួរមុខរបស់ពិភពលោក, មេដឹកនាំប្រទេសធំៗ និងសប្បុរសជននានា បានសន្យាផ្ដល់លុយសរុបចំនួន៧,៤ពាន់លានអឺរ៉ូ ដែលស្មើនឹង៨,១ពាន់លានដុល្លារ ដើម្បីប្រយុទ្ធនឹងជំងឺ COVID-19 ។ ទឹកប្រាក់ដែលត្រូវបានរៃអង្គាសក្នុងសន្និសីទសារព័ត៌មានថ្ងៃទី៤ ខែឧសភា ដែលដឹកមុខដោយសហភាពអឺរ៉ុប នឹងត្រូវប្រើដើម្បីការស្រាវជ្រាវរកវ៉ាក់សាំង ការព្យាបាល និងការធ្វើតេស្ត។ ប៉ុន្តែអាមេរិក មិនមានវត្តមានក្នុងជំនួបអនឡាញនេះទេ។
ប្រធានគណៈកម្មការអឺរ៉ុប អ្នកស្រី អឺស៊ុឡា វ៉ុន ដឺ លៃអេន ដែលដឹកនាំជំនួបអនឡាញ និយាយថា ការបង្កើតវ៉ាក់សាំងប្រឆាំង COVID-19 គឺជាឱកាសល្អបំផុតដើម្បីកម្ចាត់ជំងឺនេះ។ គិតត្រឹមថ្ងៃទី៤ ខែឧសភា ចំនួនអ្នកស្លាប់ដោយសារ COVID-19 កើនដល់២៥ម៉ឺននាក់ ហើយការឆ្លងទូទាំងពិភពលោកមានលើស៣,៥លាននាក់ឯណោះ។
ប្រទេសមហាអំណាចធំៗ បូករួមនឹងជប៉ុន និងកាណាដាជាដើម សុទ្ធតែជាប្រទេសបានសន្យាបញ្ចេញលុយច្រើនជាងគេដើម្បីដោះស្រាយវិបត្តិសុខាភិបាលសកលមួយនេះ។ អ្នកមាននៅអាមេរិកជាច្រើន រួមទាំងតារាល្បីឈ្មោះដូចជាតារាងចម្រៀងម៉ាដូណា ក៏ប្រកាសផ្ដល់លុយផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ទឹកប្រាក់ដែលរៃអង្គាសបានចំនួន៧,៤ពាន់លានអឺរ៉ូ គឺតិចជាងគោលដៅបន្តិច ដែលគ្រោងនឹងប្រមូលឲ្យបានចំនួន៧,៥ពាន់លានអឺរ៉ូ។ ជាសរុបប្រទេសប្រមាណ៤០ អង្គការសហប្រជាជាតិ វិទ្យាស្ថានស្រាវជ្រាវ និងមូលនិធិសប្បុរសធម៌នានាតួយ៉ាងមូលនិធិ Bill and Melinda Gate បានប្រកាសផ្ដល់លុយ បន្ថែមពីលើបុគ្គលល្បីឈ្មោះ។
យ៉ាងណាមិញ ទំហំទឹកប្រាក់នេះ ក៏នៅមិនទាន់គ្រប់គ្រាន់ឡើយ។ អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស អះអាងថា ទឹកប្រាក់ដែលត្រូវមានច្រើន ដែលអាចឡើងដល់ជិត៣៨ពាន់លានដុល្លារឯណោះក្នុងការអនុវត្តការងារស្រាវជ្រាវរកវ៉ាក់សាំងប្រឆាំង COVID-19 ។ បើតាមលោក ហ្គូតេរ៉េស គេត្រូវការលុយច្រើនជាងការរៃអង្គាសនេះ៥ដងឯណោះ។
យ៉ាងណាមិញ ជំនួបតាម Videoconference មិនមានតំណាងរដ្ឋាភិបាលអាមេរិកឡើយ។ អវត្តមានរដ្ឋាភិបាលអាមេរិក ធ្វើឲ្យមានការបារម្ភពីការខ្វះខាតកិច្ចសហប្រតិបត្តិការលើការស្រាវជ្រាវ អភិវឌ្ឍ និងផលិតវ៉ាក់សាំង។ ការនៅក្រៅសាច់រឿងរបស់អាមេរិក ទំនងប៉ះពាល់គំនិតផ្ដួចផ្ដើមដែលដឹកនាំដោយអឺរ៉ុប ខណៈអាមេរិកឯណោះប្រឹងស្រាវជ្រាវវ៉ាក់សាំងដោយខ្លួនឯង។ ប្រធានាធិបតី ដូណាល់ ត្រាំ បង្ហាញទំនុកចិត្តថា អាមេរិកអាចមានវ៉ាក់សាំងនៅចុងឆ្នាំ២០២០នេះ៕
Tag:
អឺរ៉ុប
COVID-19
អាមេរិក
© រក្សាសិទ្ធិដោយ thmeythmey.com
