ជាតិ
×![]()
ភ្នំពេញ៖ កែប ជាតំបន់ទេសចរណ៍បែបស្ងាត់ស្ងាត់ ហើយគ្មានករណីជួញដូរផ្លូវភេទឡើយ។ នេះជាការអះអាងរបស់លោក កែន សត្ថា អភិបាលខេត្តកែប នៅក្នុងសន្និសីទកាសែតជុំវិញវឌ្ឍនភាពខេត្ត នាព្រឹកថ្ងៃទី៥ ឧសភា។
លោក កែន សត្ថា បានអះអាងថា ខេត្តកែបជាកន្លែងសម្រាប់ភ្ញៀវទេសចរជាតិ និងអន្តរជាតិ ដែលចូលចិត្តស្រាវជ្រាវ សរសេរសៀវភៅ និងបែបផ្អែមល្អែមជាលក្ខណៈគ្រួសារ តាំងពីសម័យក្រោមអាណានិគមបារាំងមកម្ល៉េះ។
បើតាមលោក កែន សត្ថា ខេត្តកែប គឺជាតំបន់ទេសចរណ៍«កម្រិតជាលក្ខណៈថ្លៃថ្នូរតែម្ដង»។ ឆ្លើយតបនឹងសំនួរអ្នកកាសែតជុំវិញទេសចរណ៍តំបន់ជាប់មាត់សមុទ្រមួយនេះ លោកអភិបាលខត្តកែប បានអះអាងថា តំបន់ទេសចរណ៍នៅក្នុងខេត្ត គ្មានកន្លែងជួញដូរផ្លូវភេទ ដូចការសង្ស័យនោះទេ។ ប៉ុន្តែលោក ទទួលស្គាល់ថា ករណីគ្រឿងញៀនកើតមាននៅក្នុងតំបន់ ហើយអាជ្ញាធរកំពុងដោះស្រាយជាបន្តបន្ទាប់។
បច្ចុប្បន្នខេត្តកំពុងអភិវឌ្ឍន៍ជាលំដាប់ ដោយក្នុងនោះរដ្ឋបាលខេត្តកំពុងរៀបចំផែនការ អភិវឌ្ឍកោះចំនួន១៣ តំបន់ភ្នំ និងរមណីយដ្ឋានសំខាន់ៗផ្សេងទៀត ក្រៅពីមាត់ឆ្នេរសមុទ្រផងដែរ។ កែប ត្រូវបានបង្កើតឡើងនៅថ្ងៃទី២៣ ខែកុម្ភៈ ឆ្នាំ១៩៩៣។
ក្រសួងទេសចរណ៍ ក៏កំពុងរៀបចំផែនការមេ ដោយត្រូវគិតគូរជាអន្តរវិស័យ ដូចជាវិស័យរៀបចំដែនដី នគរូបនីយកម្ម និងសំណង់ បរិស្ថាន គមនាគមន៍ កសិកម្ម ប្រព័ន្ធទឹកស្អាត អគ្គិសនី ការគ្រប់គ្រងសំណល់រឹង-រាវ ការបង្កើតផលិតផលទេសចរណ៍ថ្មីៗ ដែលចាំបាច់ត្រូវអនុលោមតាមសក្ដានុពល និងធនធាន។ ជាក់ស្ដែង ដូចជា ធនធានធម្មជាតិ ផ្នែកសាសនា វប្បធម៌ កសិកម្ម និងវិស័យជាច្រើនទៀតដែលមិនទាន់បានកែច្នៃ ធ្វើយ៉ាងណាឱ្យស្របតាមឯកសារបទដ្ឋានគតិយុត្ត និងឯកសារគាំទ្រដទៃទៀត។
ការរៀបចំផែនការមេអភិវឌ្ឍន៍ទេសចរណ៍ខេត្តកែបនេះ គឺមានគោលបំណង អភិវឌ្ឍខេត្តកែបឱ្យក្លាយជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់ និងពិភពលោក។ ជាពិសេសបង្កើនគុណភាពផលិតផលទេសចរណ៍ដែលមានស្រាប់ និងបង្កើតផលិតផលទេសចរណ៍ថ្មីៗថែមទៀត ដើម្បីពន្យារការស្នាក់នៅរបស់ទេសចរ នៅគ្រប់រដូវកាលឲ្យបានកាន់តែយូរ។ ការធ្វើពិពិធកម្មទីផ្សារទេសចរណ៍ ដោយផ្តោតលើផលិតផលទេសចរណ៍តាមគោលដៅ និងធានាដល់ចីរភាពនៃការអភិវឌ្ឍ និងធនធានធម្មជាតិ និងការរៀបចំដែនដី នគរូបនីយកម្ម និងសំណង់ ពិសេសធានាដល់កំណើនសេដ្ឋកិច្ចមូលដ្ឋាន។ ទាំងនេះគឺជាផែនការមេរបស់ក្រសួងទេសចរណ៍៕
Tag:
ទេសចរណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
