COVID-19
អន្តរជាតិ
COVID-19៖ អូស្ត្រាលី បាត់បង់លុយ២,៥ពាន់លានដុល្លារក្នុងមួយសប្ដាហ៍ពេលបិទប្រទេស
×![]()
ដោយ: តន ចាន់រិទ្ធារ៉ា
សេដ្ឋកិច្ចអូស្ត្រាលី បាត់បង់លុយ២,៥ពាន់លានដុល្លារនៅរៀងរាល់មួយសប្ដាហ៍អំឡុងពេលបិទប្រទេសដោយសារជំងឺ COVID-19 ។ នេះបើតាមរបាយការណ៍របស់រតនាគារជាតិអូស្ត្រាលីចេញនៅថ្ងៃទី៥ ខែឧសភា។ បន្ថែមពីលើការបាត់បង់ទឹកប្រាក់ដែលបណ្ដាលពីការគ្មានសកម្មភាពសេដ្ឋកិច្ច ចំនួនអត្រាអ្នកគ្មានការធ្វើនៅប្រទេសក៏កើនឡើងផងដែរ។ 
អូស្ត្រាលី រងផលប៉ះពាល់ខ្លាំងលើសេដ្ឋកិច្ចរបស់ខ្លួនដោយសារជំងឺ COVID-19 ។ វិធានការរឹតត្បិតសកម្មភាពសេដ្ឋកិច្ចក្នុងប្រទេស ធ្វើឲ្យប្រទេសមួយបាត់បង់លុយកាក់ច្រើនសន្ធឹកសន្ធាប់។ បើទោះវិធានការរឹតបន្តឹងខ្លះ ត្រូវបានលើកលែងក្ដី ការបន្តអនុវត្តដែលនៅសល់ នឹងធ្វើឲ្យសេដ្ឋកិច្ចកាន់តែខាតបង់ច្រើនដែរ។
ប្រធានរតនាគារអូស្ត្រាលី លោក Josh Frydenberg និយាយចំៗថា វិធានការបិទប្រទេស បានបង្កផលប៉ះពាល់យ៉ាងខ្លាំងដល់សេដ្ឋកិច្ច ហើយផលិតផលក្នុងស្រុកសរុប (GDP) នឹងធ្លាក់១០ភាគរយក្នុងខែមិថុនាខាងមុខ។ លោកបញ្ជាក់ថា៖ «រាល់សប្ដាហ៍ដែលស្ថានភាពបច្ចុប្បន្នបន្តទៅមុខ រតនាគារប៉ាន់ស្មានថា លុយជិត៤ពាន់លានដុល្លារអូស្ត្រាលី (២,៥ពាន់លានដុល្លារអាមេរិក) នឹងត្រូវកាត់បន្ថយពីសកម្មភាពសេដ្ឋកិច្ច ដោយបណ្ដាលមកពីការបាត់បង់ការចូលរួមកម្លាំងការងារ ការកាត់បន្ថយផលិតកម្ម និងការធ្លាក់ចុះការប្រើប្រាស់។»
ទន្ទឹមនឹងការប៉ាន់ស្មានពីការបាត់បង់ទឹកប្រាក់ក្នុងវិស័យសេដ្ឋកិច្ច អូស្ត្រាលីក៏បាត់បង់កម្លាំងពលកម្មដែរ។ បើតាមការិយាល័យស្ថិតិជាតិ អូស្ត្រាលី បាត់ការងារ៧,៥ភាគរយដែលស្មើនឹងប្រហែល៧សែននាក់ក្នុងចំណោមកម្លាំងពលកម្មសកម្មរបស់ប្រទេសចំនួនជាង១៣លាននាក់។ តួលេខនេះ គិតក្នុងពេល៥សប្ដាហ៍មុនថ្ងៃទី១៨ ខែមេសា។ ពោល គឺអំឡុងពេលដែលរដ្ឋាភិបាលអនុវត្តវិធានការបិទប្រទេសតឹងរ៉ឹងក្រោយ COVID-19 ផ្ដើមរាតត្បាតខ្លាំង។
លោក Frydenberg បានហៅតួលេខនេះថា ជាការតម្រូវឲ្យរដ្ឋាភិបាលចាត់វិធានការដើម្បីប្រជាជនឲ្យប្រជាជនមានការងារ និងអាចត្រឡប់ទៅធ្វើការវិញបាន។ យ៉ាងណាមិញ បើតាមទីភ្នាក់ងារព័ត៌មានAFP លោកក៏ទទួលស្គាល់ដែរថា អូស្ត្រាលីមិនទាន់ឈានដល់លក្ខខណ្ឌដែលអាចបើកប្រទេសទាំងស្រុងនៅឡើយទេ។
តាមពិតទៅ រដ្ឋាភិបាលក្រុងកង់បេរ៉ា បានបន្ធូរការរឹតត្បិតបណ្ដើរផងដែរដើម្បីអនុញ្ញាតឲ្យអាជីវកម្ម និងសកម្មភាពមួយចំនួនដែលមានហានិភ័យទាប ឬងាយស្រួលអនុវត្តវិធានការគ្រប់គ្រង ដំណើរការឡើងវិញ។ នាយករដ្ឋមន្ត្រី ស្កុត ម៉ូរីសុន ក៏រំពឹងថា នឹងប្រកាសផែនការមួយនៅក្នុងសប្ដាហ៍នេះដែលនឹងអនុញ្ញាតឲ្យក្រុមហ៊ុននានាបើកទ្វារផងដែរ៕
Tag:
អូស្ត្រាលី
COVID-19
© រក្សាសិទ្ធិដោយ thmeythmey.com
