COVID-19
កីឡាអន្តរជាតិ
អន្តរជាតិ
Barcelona តម្រូវឲ្យកីឡាករធ្វើតេស្តរក COVID-19 មុនចូលហ្វឹកហាត់ឡើងវិញ
× កីឡាកររបស់ក្រុម Barcelona ទាំងអស់ នឹងត្រូវធ្វើតេស្តរកជំងឺ COVID-19 នៅឯកន្លែងហ្វឹកហាត់របស់ក្លិបផ្ទាល់ នៅថ្ងៃទី៦ ខែឧសភានេះ មុនពេលពួកគេចូលហ្វឹកហាត់ជាថ្មី ក្រោយផ្អាកមួយរយៈ។
ក្រុមនៃលីគកីឡាបាល់ទាត់កំពូលអេស្ប៉ាញ La Liga បានផ្តល់ការអនុញ្ញាតឲ្យត្រឡប់ចូលហ្វឹកហាត់វិញនៅសប្តាហ៍នេះ បន្ទាប់ពីការបន្ធូរបន្ថយការរឹតបន្តឹងមួយចំនួន ពីសំណាក់រដ្ឋាភិបាលអេស្ប៉ាញ។
បន្ទាប់ពីការអនុញ្ញាតនេះ ក្រុមរហស្សនាមអ្នកមានបុណ្យ បានធ្វើឲ្យមានភាពប្រាកដប្រជាលើសុខភាពរបស់កីឡាករ គ្រូបង្វឹក និងបុគ្គលិករបស់ខ្លួន ដោយតម្រូវឲ្យពួកគេធ្វើតេស្ត រក COVID-19 ជាមុន និងត្រួតពិនិត្យទីតាំងនានានៅឯកន្លែងហ្វឹកហាត់។
អ្នករៀបចំការប្រកួតក្របខណ្ឌ La Liga មានបំណងចាប់ផ្តើមលីគឡើងវិញ នៅខែមិថុនាខាងមុខនេះ បន្ទាប់ពីផ្អាកដោយគ្មានកំណត់កាលពីនៅខែមីនា ដោយសារការរាតត្បាតខ្លាំងនៃជំងឺរលាកសួតបង្កដោយកូរ៉ូណាប្រភេទថ្មី។ កីឡាករទាំងអស់ ដែលមកពីលីគកំពូល និងទីពីរត្រូវធ្វើតេស្ត មុនពេលពួកគេត្រឡប់ទៅកន្លែងហ្វឹកហាត់វិញ ដោយមានការផ្ទៀងផ្ទាត់អាការជាមួយអាជ្ញាធរកីឡា និងសុខភាពអេស្ប៉ាញ ដែលធានាសុវត្ថិភាពដល់កីឡាករ និងបុគ្គលិក។
សេចក្តីប្រកាសរបស់ La Liga សរសេរថា វិធានការណ៍ខាងលើ ត្រូវអនុវត្តរយៈពេលប្រមាណ ៤ សប្តាហ៍ដោយមានដំណាក់កាលខុសៗគ្នា ហើយអ្វីៗអាចនឹងប្រែប្រួលតាមស្ថានភាពជាក់ស្តែង ទៅតាមការសម្រេចរបស់រដ្ឋាភិបាលអេស្ប៉ាញ។
មុនពេលផ្អាកលីគ Barcelona ជាក្រុមឈរកំពូលតារាង ដោយរកបាន៥៨ពិន្ទុ នាំមុខគូប្រជែង Real Madrid ដែលនៅលេខពីរចំនួន២ពិន្ទុ ក្រោយឆ្លងកាត់ការប្រកួត២៧លើករៀងខ្លួន។ La Liga រដូវកាលនេះ នៅសល់១១ប្រកួតទៀត នឹងត្រូវបញ្ចប់លីគដោយជោគជ័យ។
គិតត្រឹមថ្ងៃទី៦ ខែឧសភានេះ អេស្ប៉ាញនៅតែរក្សាចំនួនអ្នកឆ្លង COVID-19 លើសគេសម្រាប់ប្រទេសនៅតំបន់អឺរ៉ុប ក្នុងចំនួនជាង២៥ម៉ឺននាក់ ក្នុងនោះស្លាប់ជាង២៥ ០០០នាក់ និងសះស្បើយជាង១៥៤ ៧០០នាក់៕
Tag:
Barcelona
COVID-19
La Liga
© រក្សាសិទ្ធិដោយ thmeythmey.com