COVID-19
អន្តរជាតិ
អង់គ្លេស មានអ្នកស្លាប់ដោយសារ COVID-19 ច្រើនជាងគេនៅអឺរ៉ុបនិងទីពីរលើពិភពលោក ប្រជាជនពាក់ម៉ាស់នៅក្នុងទីក្រុងឡុងដ៍។ រូបភាព៖ AP
× គិតមកត្រឹមថ្ងៃទី៥ ខែឧសភា អង់គ្លេស ត្រូវបានគេរាយការណ៍ថាមានអ្នកស្លាប់ ដោយសារជំងឺរលាកសួត ដែលបង្កដោយកូរ៉ូណាវីរុស (COVID-19) ច្រើនជាងគេនៅតំបន់អឺរ៉ុប ពោលគឺកើនលើសអ៊ីតាលីទៅទៀត។ អង់គ្លេស ក្លាយជាប្រទេសលំដាប់ទី២ បន្ទាប់ពីអាមេរិក ដែលមានអ្នកស្លាប់ច្រើនជាងគេនៅលើពិភពលោកដែរ។
តាមរយៈការចេញផ្សាយតួលេខអ្នកឆ្លង និងអ្នកស្លាប់ប្រចាំថ្ងៃរបស់ការិយាល័យស្ថិតិជាតិ (ONS) នាថ្ងៃទី៥ ខែឧសភា អង់គ្លេស មានការឆ្លងថ្មីរហូតដល់ ៤៤០៦នាក់ និងអ្នកស្លាប់ចំនួន ៦៩៣នាក់ ដោយសារ COVID-19។ តួលេខសរុបនៃអ្នកឆ្លងកូរ៉ូណាវីរុសរបស់អង់គ្លេស បានកើនដល់ចំនួនជាង ១៩ម៉ឺននាក់ ខណៈអ្នកស្លាប់បានកើនដល់ ២៩៤២៧។
ជាមួយតួលេខការកើនឡើងនៃចំនួនអ្នកស្លាប់នៅក្នុងថ្ងៃទី៥ ខែឧសភា អង់គ្លេសក្លាយជាប្រទេសមានអ្នកស្លាប់ដោយសារ COVID-19 ច្រើនជាងគេបំផុតនៅក្នុងតំបន់អឺរ៉ុប ខណៈអ៊ីតាលី ដែលធ្លាប់ឈរនៅលំដាប់ទី១ បានធ្លាក់មកទីពីរវិញ ដោយចំនួនអ្នកស្លាប់សរុបរបស់អ៊ីតាលី មានចំនួន ២៩៣១៥ករណី។ លើសពីនេះ អង់គ្លេសក៏បានក្លាយជាប្រទេសឈរនៅលំដាប់ទីពីរ ដែលមានចំនួនអ្នកស្លាប់ច្រើនជាងគេនៅលើពិភពលោក បន្ទាប់ពីអាមេរិកផងដែរ។
ពាក់ព័ន្ធនឹងករណីស្លាប់ដ៏ច្រើនបែបនេះ រដ្ឋមន្ត្រីការបរទេសអង់គ្លេស លោក Dominic Raab បានលើកឡើងថា អង់គ្លេស បានចេញផ្សាយតួលេខអ្នកស្លាប់ទាំងអស់ ហើយមិនប្រាកដថាប្រទេសទាំងអស់ អាចធ្វើបានដូចអង់គ្លេសឡើយ។ ដោយមានតួលេខស្លាប់បែបនេះ លោករដ្ឋមន្ត្រីបានហៅស្ថានភាពនៅអង់គ្លេសថាជា «សោកនាដកម្មដ៏ធំ» ដែលមិនធ្លាប់ដែលឃើញមានពីមុនមក។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
សូមបញ្ជាក់ថា ក្នុងពេលឆាប់ៗខាងមុខនេះ អង់គ្លេស នឹងបញ្ចេញគម្រោងបន្ធូរបន្ថយការរឹតត្បិតប្រទេស បន្ទាប់ពីបិទប្រទេសតាំងពីចុងខែមីនាកន្លងមក។ តាមរយៈវិធានការរឹតត្បិតនេះ ហាងលក់ទំនិញ សហគ្រាស បារ តៀមស្រា សាលារៀនត្រូវបិទទាំងអស់ ចំណែកប្រជាជនក៏ត្រូវសំងំនៅតែក្នុងផ្ទះដែរ៕
© រក្សាសិទ្ធិដោយ thmeythmey.com