COVID-19
អន្តរជាតិ
COVID-19 សរុបនៅសិង្ហបុរី កើនលើស២ម៉ឺនករណី រូបភាព៖ ST FILE
× ករណីឆ្លង COVID-19 នៅសិង្ហបុរី មានការកើនឡើងដល់ជាង ២ម៉ឺន បើគិតត្រឹមថ្ងៃទី៦ ខែឧសភា។ នេះគឺជា ចំនួនដ៏ច្រើនជាងបំផុតនៅក្នុងតំបន់អាស៊ាន។
ក្នុងថ្ងៃទី៦ ខែឧសភា សិង្ហបុរី បានបង្ហាញតួលេខឆ្លង COVID-19 ថ្មី ចំនួន ៧៨៨ករណី និងមិនមានអ្នកស្លាប់។ តួលេខកូរ៉ូណាវីរុសសរុបរបស់សិង្ហបុរី មានចំនួន ២០១៩៨ អ្នកស្លាប់ចំនួន ១៨នាក់ និងអ្នកជាសះស្បើយចំនួន ១៥១៩នាក់។ អ្នកជំងឺ ដែលកំពុងស្នាក់នៅមន្ទីរពេទ្យមានចំនួន ១៨៦៦១នាក់។ ចំនួនករណីសរុបនេះ ជាចំនួនដ៏ច្រើនជាងគេបំផុតនៅក្នុងតំបន់អាស៊ាន។ នេះបើតាមវេបសាយ Worldometer ។
តាមពិតទៅ រយៈពេលចុងក្រោយនេះ សិង្ហបុរី មានចំនួនអ្នកឆ្លងលើសពី ៥០០ករណី រៀងរាល់ថ្ងៃ ហើយថ្ងៃខ្លះសិង្ហបុរី បានរាយការណ៍ថា មានករណីអ្នកផ្ទុកCOVID-19 រហូតដល់ជាង ១ពាន់ករណីឯណោះ បើគិតចាប់ពីថ្ងៃទី១៥ ខែមេសាមក។ លើកលែងតែថ្ងៃទី២ ខែឧសភា តែមួយគត់ ដែលសិង្ហបុរីមានចំនួន ៤៤៧ករណី។
ករណីឆ្លងភាគច្រើន កើតឡើងក្នុងចំណោមពលករបរទេសដែលរស់នៅក្នុងបន្ទប់តូចចង្អៀត។ ការឆ្លងក្នុងចំណោមប្រជាជនក្នុងស្រុក បានធ្លាក់ចុះដែលនាំឲ្យរដ្ឋាភិបាលសម្រេចចិត្តបន្ធូរបន្ថយការរឹតត្បិតខ្លះវិញដូចជាអាជីវកម្មតាមផ្ទះជាដើម ខណៈសាលារៀន ក៏បើកទ្វារវិញដែរ។
សូមបញ្ជាក់ថា ក្នុងតំបន់អាស៊ាន សិង្ហបុរី(លេខ១) មានចំនួនCOVID-19 សរុបចំនួន ២០១៩៨ករណី, ឥណ្ឌូណេស៊ី(លេខ២) មានចំនួន ១២០៧១ករណី, ហ្វីលីពីន(លេខ៣) មាន ៩៦៨៤ករណី, ម៉ាឡេស៊ី(លេខ៤) មានចំនួន ៦៣៨៣ករណី, ថៃ(លេខ៥) មានករណី ២៩៨៩ករណី, វៀតណាម(លេខ៦) មានចំនួន ២៧១ករណី, មីយ៉ាន់ម៉ា(លេខ៧) មាន ១៦១ករណី, ព្រុយណេ(លេខ៨) មានចំនួន ១៣៨ករណី, កម្ពុជា(លេខ៩) មានចំនួន ១២២ករណី និងឡាវ(លេខ១០) មានចំនួន ១៩ករណី៕
Tag:
សិង្ហបុរី
COVID-19
© រក្សាសិទ្ធិដោយ thmeythmey.com