អន្តរជាតិ
ហ្វីលីពីនបិទប្រព័ន្ធផ្សព្វផ្សាយធំមួយដែលធ្លាប់មានបញ្ហាជាមួយលោក ឌូទើតេ
× ស្ថាប័នទូរគមនាគមន៍របស់ហ្វីលីពីន បានបញ្ជាឲ្យក្រុមហ៊ុនប្រព័ន្ធផ្សព្វផ្សាយឈានមុខមួយរបស់ប្រទេសនេះ ABS-CBN Corp ផ្អាកប្រតិបត្តិការពួកគេ នៅថ្ងៃទី៥ ខែឧសភា បន្ទាប់ពីសភាហ្វីលីពីនដែលកាន់កាប់ដោយក្រុមអ្នកស្មោះស្ម័គ្ររបស់លោកប្រធានាធិបតី រ៉ូឌ្រីហ្គោ ឌូទើតេ ពុំផ្ដល់អាជ្ញាបណ្ណឲ្យក្រុមហ៊ុននេះជាថ្មី។
ជាច្រើនលើកមកហើយ លោក រ៉ូឌ្រីហ្គោ ឌូទើតេ បានគំរាមរាំងខ្ទប់ការផ្ដល់អាជ្ញាបណ្ណជាថ្មីជូនដល់ក្រុមហ៊ុន ABS-CBN ក្រោយប៉ុស្តិ៍ទូរទស្សន៍នេះធ្វើឲ្យលោកខឹង អំឡុងពេលការបោះឆ្នោតប្រធានាធិបតីឆ្នាំ២០១៦ ដោយបដិសេធចាក់ផ្សាយពាណិជ្ជកម្មស្តីពីយុទ្ធនាការបោះឆ្នោតលោក។
ក្នុងសេចក្តីថ្លែងការណ៍ ក្រុមហ៊ុន ABS-CBN បញ្ជាក់ថា ខ្លួននឹងបញ្ឈប់ប្រតិបត្តិការចាប់ពីយប់ថ្ងៃទី ៥ ខែឧសភាតទៅ ដើម្បីអនុលោមតាមបទបញ្ជារបស់គណៈកម្មការទូរគមនាគមន៍ជាតិ (NTC) ខណៈពួកគេក៏កំពុងស្នើសុំសមាជិកសភាជាន់ទាបដើម្បីផ្ដល់អាជ្ញាបណ្ណឡើងវិញផងដែរ ដែលអស់សុពលភាពនាថ្ងៃទី៤ ខែឧសភា។
«យើងជឿជាក់ថា រដ្ឋាភិបាលនឹងសម្រេចចិត្តលើការផ្ដល់អាជ្ញាបណ្ណឲ្យយើង ដោយគិតគូរពីផលប្រយោជន៍ប្រជាជនហ្វីលីពីនជាធំ និងទទួលស្គាល់កិច្ចប្រឹងប្រែងនិងនាទីរបស់ ABS-CBN ក្នុងការផ្ដល់ព័ត៌មាន និងដំណឹងចុងក្រោយ អំឡុងពេលដ៏លំបាកនេះ»។ ក្រុមហ៊ុននេះ សង្កត់ធ្ងន់បែបនេះក្នុងសេចក្តីថ្លែងការណ៍។ យ៉ាងណាមិញ ការវិវត្តចុងក្រោយ គឺសភាមិនផ្ដល់អាជ្ញាបណ្ណបន្តឡើយ។
តាមការចុះផ្សាយរបស់ទីភ្នាក់ងារព័ត៌មាន AFP អ្នកនាំពាក្យប្រធានាធិបតី លោក Harry Roque បញ្ជាក់ថា រដ្ឋាភិបាលពេញចិត្តសម្រាប់សេវាកម្មរបស់ប្រព័ន្ធផ្សព្វផ្សាយ ABS-CBN ក៏ប៉ុន្តែជោគវាសនារបស់ក្រុមហ៊ុន គឺសម្រេចលើដៃសភាជាន់ទាប។
ABS-CBN ដែលជាក្រុមហ៊ុនប្រព័ន្ធផ្សព្វផ្សាយចំណាស់៦៦ឆ្នាំ បានផ្ដល់ការងារដល់មនុស្សជិត៧០០០នាក់។ ពួកគេដំណើរការវិទ្យុ ប៉ុស្ត៍ទូរទស្សន៍ និងចែកចាយមាតិកាតាមអនឡាញ។ ទាក់ទិននឹងការផ្អាកដំណើរការប្រព័ន្ធផ្សព្វផ្សាយឈានមុខមួយក្នុងប្រទេសហ្វីលីពីនបែបនេះ លោក Carlos Conde នៃអង្គការឃ្លាំមើលសិទ្ធិមនុស្ស (HRW) ប្រាប់ AFP ដូច្នេះថា៖«នេះគឺជាការប៉ះពាល់ដ៏ធ្ងន់ធ្ងរចំពោះសិទ្ធិសេរីភាពសារព័ត៌មានក្នុងប្រទេសហ្វីលីពីន។ វាពិបាកនឹងគិតថា លោក ឌូទើតេ មិនចូលពាក់ព័ន្ធនឹងរឿងនេះណាស់»៕
Tag:
ហ្វីលីពីន
រ៉ូឌ្រីហ្គោ ឌូទើតេ
ប្រព័ន្ធផ្សព្វផ្សាយ
© រក្សាសិទ្ធិដោយ thmeythmey.com