អន្តរជាតិ
ចិន ហៅបាតុករហុងកុងជា «វីរុសនយោបាយ» ហើយព្រមានកម្ចាត់ចោល រូបភាព ប៉ូលិសហុងកុង នាពេលចុះបង្ក្រាបបាតុករ កាលពីខែកក្កដា ឆ្នាំ២០១៩ (AFP)
× ការិយាល័យទទួលបន្ទុកកិច្ចការហុងកុងរបស់ចិន នៅថ្ងៃទី៦ ខែឧសភា បានថ្កោលទោសក្រុមបាតុករថា «វីរុសនយោបាយ» ដែលចង់បានឯករាជ្យ។ រដ្ឋាភិបាលក្រុងប៉េកាំង ព្រមានថា ទីក្រុងហុងកុងនឹងពុំអាចស្ងប់ស្ងាត់ឡើយ ប្រសិនបើបាតុករហិង្សាអាវខ្មៅ ពុំទាន់ត្រូវកម្ចាត់ចោលទាំងអស់ទេនោះ។
ការិយាល័យចិនទទួលបន្ទុកកិច្ចការហុងកុង និងម៉ាកាវ បានព្រមានថា រដ្ឋាភិបាលមជ្ឈិម នឹងមិនឈរឱបដៃនៅស្ងៀមចំពោះទង្វើឆ្គួតឡប់ដែលបាតុករហុងកុងប្រព្រឹត្ត ហើយរដ្ឋធានីប៉េកាំង មានទំនួលខុសត្រូវខ្ពស់ក្នុងការធានារក្សាសណ្ដាប់ធ្នាប់និងការពារសន្តិសុខជាតិ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
«ទង្វើបំផ្លិចបំផ្លាញរបស់ក្រុមបាតុករហិង្សាអាវខ្មៅ គឺជាវីរុសនយោបាយក្នុងសង្គមហុងកុង និងសត្រូវដ៏ធំសម្រាប់គោលការណ៍ប្រទេសមួយ ប្រព័ន្ធពីរ»។ ការិយាល័យចិន បញ្ជាក់បែបនេះក្នុងសេចក្តីថ្លែងការណ៍នៅថ្ងៃទី ៦ ខែឧសភា ដោយព្រមានថា ដរាបណាក្រុមបាតុករទាំងនោះពុំទាន់កម្ចាត់ចោលទាំងស្រុង ហុងកុង នឹងពុំអាចស្ងប់ស្ងាត់ឡើយ។
មជ្ឈមណ្ឌលហិរញ្ញវត្ថុអាស៊ីមួយនេះ បានរង្គោះរង្គើខ្លាំងក្នុងឆ្នាំ២០១៩ ដោយសារបាតុករទ្រង់ទ្រង់ធំរាប់ខែ ហើយពេលខ្លះ មានចរិតហិង្សា និងនយោបាយ។ ហេតុការណ៍នេះកើតឡើងក្រោយពីមានការប៉ុនប៉ងបង្កើតសំណើច្បាប់បត្យាប័នដ៏ចម្រូងចម្រាសដែលបើកផ្លូវដល់ការបញ្ជូនជនសង្ស័យហុងកុងទៅកាត់ក្ដីនៅចិនដីគោក។
បាតុករវ័យក្មេងភាគច្រើនស្លៀកពាក់អាវខ្មៅ ប្រឈមមុខជាមួយប៉ូលិសហុងកុង ដោយពួកគេស្រែកថា ក្រុងប៉េកាំងព្យាយាមលុបបំបាត់គោលការណ៍អភិបាលកិច្ច «ប្រទេសមួយ ប្រព័ន្ធពីរ» ដែលធានាសេរីភាពពលរដ្ឋហុងកុង ចាប់តាំងពីត្រូវប្រគល់ឲ្យចិនដឹកនាំក្នុងឆ្នាំ១៩៩៧មក។ យ៉ាងណាមិញ ក្រុងប៉េកាំង ទាត់ចោលការរិះគន់នេះ៕
Tag:
ចិន
ហុងកុង
បាតុកម្ម
© រក្សាសិទ្ធិដោយ thmeythmey.com