ជាតិ
អ្នកទោស៨៤នាក់ ត្រូវបានស្នើលើកលែង និងបន្ធូរបន្ថយទោស រូបពីហ្វេសប៊ុករបស់លោក នុត សាវនា អ្នកនាំពាក្យពន្ធនាគារ
× ភ្នំពេញ៖ អ្នកទោស៨៤នាក់ ត្រូវបានស្នើលើកលែង និងបន្ធូរបន្ថយទោសពីព្រះមហាក្សត្រ ។ អង្គប្រជុំនៃគណៈកម្មការជាតិ បានសម្រេចស្នើសុំទៅរដ្ឋាភិបាល ដើម្បីពិនិត្យ មុននឹងថ្វាយព្រះមហាក្សត្រព្រះរាជទានលើកលែងទោស នៅក្នុងថ្ងៃពិសាខបូជា ។ នេះបើតាមរបាយការណ៍របស់ក្រសួងយុត្តិធម៌។
ក្រសួងយុត្តិធម៌ បានបញ្ជាក់ថា ការអនុគ្រោះទោស ដល់ទណ្ឌិតទាំង៨៤នាក់នេះ មានបន្ថយទោស៦ខែដល់ទណ្ឌិត៣៤នាក់ (ស្រី៣នាក់), បន្ថយទោស៩ខែដល់ទណ្ឌិត២១នាក់ (ស្រី១នាក់), បន្ថយទោស១២ខែដល់ទណ្ឌិត១៩នាក់ (ស្រី២នាក់) និងការលើកលែងទោសដល់ទណ្ឌិត១០នាក់ (ស្រី២នាក់)។
លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានប្រាប់សារព័ត៌មានថ្មីៗថា គណៈកម្មការ បានបញ្ជូនសំណើរទៅរដ្ឋាភិបាលពិនិត្យហើយ។
កាលពីទី២៨មេសា ឆ្នាំ២០២០ រដ្ឋមន្ត្រីក្រសួងយុត្តិធម៌ លោក កើត រិទ្ធ បានដឹកនាំកិច្ចប្រជុំគណៈកម្មការជាតិ ដើម្បីពិនិត្យបញ្ជីស្នើសុំបន្ធូរបន្ថយទោសនិងលើកលែងទោសដល់ទណ្ឌិត២៧៣នាក់ ក្នុងឱកាសពិធីបុណ្យពិសាខបូជា នៅថ្ងៃទី៦ឧសភានេះ។ បញ្ជីស្នើអនុគ្រោះទោសនេះ គឺមកពីពន្ធនាគាររាជធានី-ខេត្តចំនួន២០ និងពីមណ្ឌលអប់រំកែប្រែចំនួន៤។ ក្រោយប្រជុំពិនិត្យរួច ក្រសួងក៏សម្រេចរៀបចំសំណើលើកលែងទោសទណ្ឌិត៨៤នាក់នេះ។
ជារៀងរាល់ឆ្នាំរាជរដ្ឋាភិបាលកម្ពុជា បានរៀបចំឲ្យមានការបន្ធូរបន្ថយនិងលើកលែងទោសដល់ទណ្ឌិត៣ដងក្នុង១ឆ្នាំ។ ក្នុងនោះមានបុណ្យចូលឆ្នាំ បុណ្យពិសាខបូជា និងបុណ្យអុំទូក។ កាលពីចូលឆ្នាំខ្មែរកន្លងទៅ ទណ្ឌិត១៥៥នាក់ ត្រូវបានព្រះមហាក្សត្របន្ថូរបន្ថយ និងលើកលែងទោសតាមសំណើររបស់រដ្ឋាភិបាល៕
© រក្សាសិទ្ធិដោយ thmeythmey.com