COVID-19
អន្តរជាតិ
លោក ត្រាំ ថាវិបត្តិ COVID-19 អាក្រក់ជាងការវាយប្រហារនៅភើល ហាប៊័រ ឬភេរវកម្ម ១១ កញ្ញា
ប្រធានាធិបតីត្រាំ និងប្រមុខការបរទេសម៉ៃ ប៉ុមប៉េអូ-រូបភាពAFP
×![]()
លោក ដូណាល់ ត្រាំ ប្រធានាធិបតីអាមេរិកនៅថ្ងៃទី៦ ខែឧសភា បាននិយាយថា ជំងឺរាតត្បាតសកលCOVID-19 មានសភាពអាក្រក់ខ្លាំងណាស់សម្រាប់អាមេរិក។ ដោយអាក្រក់ជាងការវាយប្រហារលើភើល ហារ៍ប៊័រ (Pearl Harbor) និងភេរវកម្មបុកអាគាពាណិជ្ជកម្មពិភពលោកទៅទៀត។ លោក ត្រាំ បន្តការរិះគន់ទៅលើចិន ដោយថា ជំងឺឆ្លងគួរតែបានបញ្ឈប់ក្នុងទឹកដីចិន។
«នេះគឺជាការវាយប្រហារអាក្រក់បំផុត ដែលយើងពុំធ្លាប់មាន»។ នេះជាប្រសាសន៍របស់លោកប្រធានាធិបតីត្រាំ ប្រាប់អ្នកសារព័ត៌មានក្នុងសេតវិមាន ដោយសំដៅដល់ការរាតត្បាតជំងឺ COVID-19 នៅទឹកដីអាមេរិក។ លោក ត្រាំ អះអាងថា COVID-19 អាក្រក់ជាងហេតុការណ៍នៅភើល ហាប៊់័រ និងអាគាពាណិជ្ជកម្មពិភពលោកទៅទៀត។
លោក ត្រាំ សង្កត់ធ្ងន់ផងដែរថា ផលប៉ះពាល់បណ្តាលមកពីជំងឺ COVID-19 គឺអាក្រក់ជាងការវាយប្រហារទម្លាក់គ្រាប់បែករបស់ជប៉ុន លើមូលដ្ឋាននាវាអាមេរិកនៅភើល ហាប៊័ររដ្ឋហាវ៉ៃ និងអំពើភេរវកម្មដោយ អាល់កៃដា ដោយបើកយន្តហោះបំបុកអាគាពាណិជ្ជកម្មពិភពលោក នៅទីក្រុងញូវយ៉ក និងរដ្ឋធានីវ៉ាស៊ីនតោន។
ការវាយប្រហាររបស់ជប៉ុនលើមូលដ្ឋាននាវាភើល ហាប៊័រ កាលពីថ្ងៃទី៧ ខែធ្នូ ឆ្នាំ១៩៤១ បានទាញអាមេរិកចូលសង្គ្រាមលោកលើកទី២។ ចំណែកឯអំពើភេរវកម្មបំបុកអាគាពាណិជ្ជកម្មពិភពលោក កាលពីថ្ងៃទី១១ ខែកញ្ញា ឆ្នាំ២០០១ បានបណ្តាលឲ្យមនុស្សជាង៣ពាន់នាក់ស្លាប់ និងនាំឲ្យមានសង្គ្រាម និងការបើកប្រតិបត្តិការប្រឆាំងភេរវកម្ម រយៈពេលជាង២០ឆ្នាំ នៅអ៊ីរ៉ាក់ អាហ្វហ្គានីស្ថាន និងប្រទេសដទៃទៀត។
ក្រៅពីប្រៀបធៀបការរាលដាល COVID-19 និងមហន្តរាយកន្លងមក លោក ត្រាំ ក៏ឆ្លៀតបន្តសង្គ្រាមពាក្យសម្តីជាមួយចិន ដោយលើកឡើងពីប្រភពដើមនៃវីរុសទៀត។ លោកនិយាយថា រឿងនេះមិនគួរកើតមានឡើយ ដោយចិនគួរណាស់តែបញ្ឈប់ការឆ្លង នៅកន្លែងផ្ទុះជំងឺនៅទីក្រុងវូហាន ឬគួរតែបញ្ឈប់ការឆ្លងក្នុងប្រទេសចិន។
ក្នុងរយៈពេលថ្មីៗនេះ លោក ត្រាំ ក៏ដូចជាប្រមុខការបរទេសអាមេរិក ម៉ៃ ប៉ុមប៉េអូ បានបង្កើនការវាយប្រហារទៅលើចិន ដោយលើកឡើងថាប្រភពជំងឺCOVID-19 ចេញមកពីមន្ទីរពិសោធន៍នៅវូហាន។
នៅថ្ងៃទី៦ ខែឧសភា របាយការណ៍របស់មជ្ឈមណ្ឌលប្រយុទ្ធនឹងជំងឺឆ្លង (CDC) បានបង្ហាញថា នៅអាមេរិក ចំនួនឆ្លងមាន១,១៩៣,៨១៣ ករណី និងស្លាប់ចំនួន៧០,៨០៣នាក់។ CDC ក៏បានព្យាករណ៍ផងដែរថា ចំនួនអ្នកស្លាប់នៅអាមេរិក នឹងកើនដល់១សែននាក់ នៅដំណាច់ខែឧសភានេះ។
លោកវេជ្ជបណ្ឌិត Tom Frieden ដែលជាអ្នកជំនាញជំងឺឆ្លង បានព្រមានតំណាងរាស្ត្រអាមេរិក ថា ត្រូវត្រៀមសម្រាប់សមរភូមិដ៏យូរ និងលំបាកមួយនេះ ហើយបានទទូចឲ្យពង្រីកសមត្ថភាពធ្វើតេស្ត ដើម្បីយកឈ្នះលើជំងឺឆ្លង។ លោក Frieden បន្ថែមទៀតថា បើគ្មានវ៉ាក់សាំងដែលមានប្រសិទ្ធភាពទេ យើងនឹងរស់នៅជាមួយជំងឺនេះរាប់ខែឆ្នាំ ទៅមុខទៀត។
គិតត្រឹមថ្ងៃទី៧ ខែឧសភានេះ ចំនួនអ្នកឆ្លងនៅលើពិភពលោក កើនដល់៣,៨លានករណី និងស្លាប់ចំនួន២៦៥,០៨៤នាក់៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
