COVID-19
កីឡាអន្តរជាតិ
អន្តរជាតិ
កីឡាករ Torino ម្នាក់ឆ្លង COVID-19 ស្របពេល Serie A ពិចារណាត្រឡប់រកការប្រកួតវិញ
× កីឡាករ Torino ម្នាក់ធ្វើតេស្តចេញលទ្ធផលវិជ្ជមានជំងឺ COVID-19។ ក្លិបនៃលីគកីឡាបាល់ទាត់កំពូលអ៊ីតាលី Serie A មួយនេះបញ្ជាក់ដូច្នេះនៅថ្ងៃទី៦ ខែឧសភា។
Torino បានតម្រូវឲ្យកីឡាកររបស់ខ្លួនដែលផ្ទុក COVID-19 (មិនបង្ហាញអត្តសញ្ញាណ) មានគម្លាតឆ្ងាយពីអ្នកដទៃ ហើយនឹងត្រូវទទួលការត្រួតពិនិត្យជាប្រចាំក្នុងរយៈពេលប៉ុន្មានថ្ងៃខាងមុខ។ ព័ត៌មានអំពីការឆ្លងជំងឺរលាកសួតបង្កដោយកូរ៉ូណាវីរុសប្រភេទថ្មីលើកីឡាករនេះ កើតឡើងនៅពេលដែលមន្ត្រីប្រចាំក្លិបនិមួយៗ ព្យាយាមឲ្យមានការចាប់ផ្តើមដំណើរការប្រកួតរដូវកាល ២០១៩-២០ នៃក្របខណ្ឌ Serie A ឡើងវិញ។
លីគកំពូលអ៊ីតាលី រួមទាំងលីគធំៗនៅអឺរ៉ុបភាគច្រើនត្រូវសម្រេចឲ្យផ្អាកការប្រកួតបណ្តោះអាសន្នដោយគ្មានកាលកំណត់កាលពីថ្ងៃទី១៣ ខែមីនា ដោយសារការកើនឡើងខ្លាំងនៃជំងឺ COVID-19 ដែលបានសម្លាប់មនុស្សជុំវិញពិភពលោកជាង ២៦ម៉ឺននាក់។
មកទល់បច្ចុប្បន្ន ក្រុមនៅ Serie A ភាគច្រើនកំពុងវិលត្រឡប់ទៅកាន់ការហ្វឹកហាត់វិញរៀងៗខ្លួន ប៉ុន្តែរដ្ឋមន្ត្រីកីឡាអ៊ីតាលីលោក Vincenzo Spadafora បានបញ្ជាក់ជាថ្មីថាការហ្វឹកហាត់ជាក្រុមនឹងមិនអាចធ្វើនៅមុនថ្ងៃទី១៨ ខែឧសភាឡើយ បើទោះជារដ្ឋាភិបាលអ៊ីតាលីអនុញ្ញាតឲ្យកីឡាករវិលត្រឡប់ទៅទីតាំងក្លិបវិញក៏ដោយ។
Serie A កំពុងស្ថិតក្នុងការពិចារណាដើម្បីវិលទៅកាន់ការប្រកួតលីគឡើងវិញ ខណៈ COVID-19 នៅតែបន្តឆ្លងក្នុងប្រទេសអ៊ីតាលីនៅឡើយ។ យ៉ាងក៏ដោយ រយៈពេលចុងក្រោយនេះអ៊ីតាលីបានធ្លាក់តួលេខចំនួនអ្នកឆ្លងច្រើន ក្នុងនោះករណីឆ្លងសរុបមានចំនួនជាង២សែនករណី និងអ្នកស្លាប់ជិត៣ម៉ឺននាក់៕
Tag:
Serie A
COVID-19
Torino
© រក្សាសិទ្ធិដោយ thmeythmey.com