ជាតិ
សង្គមជាតិ
៦ថ្ងៃជាប់គ្នា ភ្នំពេញ គ្មានអ្នកស្លាប់ក្នុងគ្រោះថ្នាក់ចរាចរណ៍ ខណៈតាមខេត្ត ថយចុះ
× ដ្បិតពលរដ្ឋខ្លះ មិនសូវពេញចិត្តនិងរអ៊ូរទាំក្តី តែការអនុវត្តអនុក្រឹត្យថ្មី ដែលផាកពិន័យធ្ងន់ធ្ងរលើបទល្មើសចរាចរណ៍ ពិតជាបានកាត់បន្ថយគ្រោះថ្នាក់ចរាចរណ៍។ វា មានរយៈពេល៦ថ្ងៃហើយ គឺចាប់ពីថ្ងៃទី១ដល់ថ្ងៃទី៦ ខែឧសភា ឆ្នាំ២០២០ ដែលនគរបាលចរាចរណ៍ ចុះអនុវត្តអនុក្រឹត្យថ្មីនេះ។
របាយការណ៍ពីអគ្គស្នងការដ្ឋាននគរបាលជាតិ បង្ហាញថា រយៈពេល៦ថ្ងៃនេះ គ្រោះថ្នាក់ចរាចរណ៍នៅរាជធានីភ្នំពេញ បានថយចុះ ហើយពុំមានករណីស្លាប់ឡើយ។ នៅតាមបណ្តាខេត្តទាំង២៤ ក៏ថយចុះដែរ។
បើតាមអគ្គស្នងការដ្ឋាននគរបាលជាតិ រយៈពេល៦ថ្ងៃនេះ មានមនុស្ស១៨នាក់ ស្លាប់ និង៣៨នាក់ របួស ក្នុងគ្រោះថ្នាក់ចរាចរណ៍ នៅតាមបណ្តាខេត្ត។ គ្រោះថ្នាក់ចរាចរណ៍ទាំងនេះ បណ្តាលមកពីបើកបរលើសល្បឿនកំណត់ បើកបរក្នុងស្ថានភាពស្រវឹង និង បត់មិនប្រយ័ត្ន ជាដើម។
នៅតាមបណ្តាខេត្ត គ្រោះថ្នាក់ចរាចរណ៍ កើតឡើង៧លើក ស្លាប់៨នាក់ របួស៣នាក់ នៅថ្ងៃទី១ឧសភា, កើតឡើង៦លើក ស្លាប់១នាក់ របួស១២នាក់ នៅថ្ងៃទី២ឧសភា, កើតឡើង៧លើក ស្លាប់២នាក់ របួស៩នាក់ នៅថ្ងៃទី៣ឧសភា, កើតឡើង២លើក គ្មានករណីស្លាប់ របួស៤នាក់ នៅថ្ងៃទី៤ខែឧសភា, កើតឡើង៤លើក ស្លាប់៣នាក់ របួស៩នាក់ នៅថ្ងៃទី៥ឧសភា, កើតឡើង១០លើក ស្លាប់៥នាក់ របួស១៣នាក់ នៅថ្ងៃទី៦ឧសភា។ នេះបើតាមរបាយការណ៍ពីនគរបាលជាតិដដែល។
កិច្ចប្រតិបត្តិការរឹតបន្តឹងអនុក្រឹត្យថ្មីស្តីពីការផាកពិន័យបទល្មើសចរាចរណ៍ ក្នុងរយៈពេល៦ថ្ងៃមកនេះ សមត្ថកិច្ច ឃាត់បានម៉ូតូជាង៤,៤ពាន់គ្រឿង និងឃាត់បានរថយន្តគ្រប់តូច-ធំជិត៨គ្រឿង (គិតតែក្នុងរាជធានីភ្នំពេញ)។ ជាមួយគ្នានេះ សមត្ថកិច្ច បានឃាត់មនុស្ស៣នាក់ ដែលបានបង្ហោះសារវាយប្រហារ និងប្រមាថនគរបាលចរាចរណ៍។ មុនត្រូវបានអនុញ្ញាតឲ្យត្រឡប់ទៅផ្ទះវិញ អ្នកទាំង៣នាក់នោះ ទទួលបានការណែនាំពីសមត្ថកិច្ច ហើយធ្វើកិច្ចសន្យាបញ្ឈប់សកម្មភាព។
របាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកកាលពីឆ្នាំ២០១៩ បានឲ្យដឹងថា ជាមធ្យមមានមនុស្ស៥នាក់បានស្លាប់ និង១១នាក់រងរបួស ដោយគ្រោះថ្នាក់ចរាចរណ៍ក្នុង១ថ្ងៃ (មុនការអនុវត្តអនុក្រឹត្យថ្មី)។
ប្រជាពលរដ្ឋ អាចហៅទូរស័ព្ទទៅលេខ១១៧ បើមានចម្ងល់ពីការរឹតបន្តឹងច្បាប់ចរាចរណ៍៕
© រក្សាសិទ្ធិដោយ thmeythmey.com