អន្តរជាតិ
លោក ត្រាំ វ៉េតូការសម្រេចរបស់សភាដែលកំហិតអំណាចធ្វើសង្គ្រាមប្រឆាំងអ៊ីរ៉ង់
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ បានប្រើអំណាចវ៉េតូប្រឆាំងការសម្រេចចិត្តរបស់សភាដែលកំហិតអំណាចធ្វើសង្គ្រាមរបស់លោក ដោយផ្ដោតលើសង្គ្រាមប្រឆាំងអ៊ីរ៉ង់តែម្ដង។ លោក ត្រាំ ហៅការរឹតត្បិតអំណាចរបស់លោក ជារឿងមិនត្រឹមត្រូវ និងជាការយល់ខុសលើរដ្ឋធម្មនុញ្ញពីសំណាក់សមាជិកសភា។ ក្រោយការសម្រេចចិត្តរបស់លោក ត្រាំ សភាអាមេរិក ទំនងជាពិបាករកសំឡេងគ្រប់គ្រាន់ដើម្បីលុបចោលអំណាចវ៉េតូនេះវិញ។
សេចក្ដីស្នើច្បាប់របស់សភាដែលរឹតត្បិតអំណាចប្រធានាធិបតី ដូណាល់ ត្រាំ ក្នុងការធ្វើសង្គ្រាមជាមួយអ៊ីរ៉ង់ មិនទាន់អាចក្លាយជាច្បាប់ឡើយ ក្រោយត្រូវបានលោក ត្រាំ ជំទាស់។ នៅក្នុងសេចក្ដីប្រកាសរបស់សេតវិមាន លោក ត្រាំ បានហៅការសម្រេចចិត្តរបស់សភានេះ ជាការមាក់ងាយ និងជាយុទ្ធសាស្ត្ររបស់បក្សប្រជាធិបតេយ្យដើម្បីយកឈ្នះការបោះឆ្នោតប្រធានាធិបតីខែវិច្ឆិកាដោយបំបែកសំឡេងបក្សសាធារណរដ្ឋ។
តាមពិតទៅ សេចក្ដីស្នើច្បាប់នេះ សុទ្ធតែត្រូវបានអនុម័តដោយសភាទាំងពីររបស់អាមេរិក។ សភាតំណាង អនុម័តនៅខែមីនា ហើយព្រឹទ្ធសភាយល់ព្រមនៅខែកុម្ភៈ។ នេះជារឿងកម្រមួយដែលបក្សធំទាំងពីររបស់អាមេរិកយល់ស្របគ្នាលើបញ្ហាណាមួយ។ ប៉ុន្តែលោក ត្រាំ បានឆ្លើយវិញថា ការសម្រេចចិត្តរបស់សភាទាំងពីរ គឺជាការយល់ខុសលើការពិត និងផ្នែកច្បាប់ផងដែរ។
វិធានការរបស់សភានេះ មានគោលដៅទប់ស្កាត់លោក ត្រាំ ពីការអូសអាមេរិកឲ្យប្រឡូកក្នុងសង្គ្រាមជាមួយអ៊ីរ៉ង់ ដែលមួយរយៈមុនភាពតានតឹងរវាងប្រទេសទាំងពីរកើនឡើងខ្លាំង។ ទាំងបក្សប្រជាធិបតេយ្យ ទាំងបក្សសាធារណរដ្ឋ សុទ្ធតែបារម្ភថា ជម្លោះជាមួយអ៊ីរ៉ង់អាចផ្ទុះឡើង បើមិនអាចទប់ស្កាត់លោក ត្រាំ បាននោះ។ ក្នុងសេចក្ដីសម្រេចរបស់ខ្លួន លោក ត្រាំ មិនអាចធ្វើសង្គ្រាម ឬប្រើយោធាប្រឆាំងរដ្ឋាភិបាល ឬយោធាអ៊ីរ៉ង់ឡើយ បើគ្មានការអនុញ្ញាតពីសភា។
ក្នុងសេចក្ដីថ្លែងការណ៍ដដែល លោក ត្រាំ លើកឡើងថា ជារឿងមិនត្រឹមត្រូវឡើយ បើសភាគិតថា អំណាចរបស់ប្រធានាធិបតី គឺកំណត់ត្រឹមការការពារអាមេរិកពីការគំរាមកំហែងណាមួយនោះ។ លោកបន្តថា៖ «យើងរស់នៅក្នុងពិភពលោកដែលមានការគំរាមកំហែង ហើយរដ្ឋធម្មនុញ្ញទទួលស្គាល់ថា ប្រធានាធិបតីត្រូវតែដឹងពីជំហានបន្ទាប់របស់សត្រូវ ហើយចាត់វិធានការរហ័ស និងម៉ឺងម៉ាត់។ នេះជាអ្វីដែលខ្ញុំធ្វើ។»
នេះជាលើកទី៧ ដែលលោក ត្រាំាំ ប្រើអំណាចវ៉េតូ និងជាអំណាចវ៉េតូលើកទីពីរពាក់ព័ន្ធបញ្ហាយោធា។ លើកទីមួយ គឺលោក ត្រាំ ប្រឆាំងសំណើរបស់សភាដែលចង់ផ្ដាច់ការគាំទ្ររបស់អាមេរិកលើអារ៉ាប៊ីសាអូឌីតក្នុសង្គ្រាមនៅយេម៉ែន។ យ៉ាងណាមិញ គេមិនរំពឹងថា សភាអាមេរិកអាចបោះឆ្នោតជំទាស់សិទ្ធិវ៉េតូពេលនេះឬយ៉ាងណាឡើយ ព្រោះសំឡេងដែលត្រូវការមានពីរភាគបីក្នុងចំណោមសមាជិកសភាទាំងពីរ៕
Tag:
អាមេរិក
អ៊ីរ៉ង់
ដូណាល់ ត្រាំ
© រក្សាសិទ្ធិដោយ thmeythmey.com
