Pieter Buist ដាក់គោលដៅជួបកីឡាករខ្លាំងៗលើសង្វៀន ONE
08, May 2020 , 8:59 am
រូបភាព
×
អត្ថបទ៖ស៊ីធី
Pieter Buist ឬ គេស្គាល់ថា «The Archangel» ជាកីឡាករមិនទាន់ស្គាល់ចាញ់ទាល់តែសោះតាំងពីរូបគេចូលប្រឡូកលើសង្វៀន ONE Championship ដែលប្រកួតក្នុងប្រទេសទម្ងន់ lightweight កាលឆ្នាំមុន។ ឥឡូវនេះរូបគេរឹតតែចង់ឡើងប្រកួតប៉ះដៃគូកម្រិតខ្ពស់ៗថែមទៀត។ ជើងខ្លាំងមកពីហូឡង់រូបនេះប៉ងជួបកីឡាករកំពូលដើម្បីធ្វើឲ្យរូបគេបង្កើនសមត្ថភាព ក្រោយពីឈ្នះបីលើកនៅសង្វៀនធំបំផុតក្នុងប្រវត្តិសាស្ត្រអាស៊ី។
ក្នុងការប្រកួតដំបូង “The Archangel” បានផ្ដួល Kota “Kong” Shimoishi ឲ្យសន្លប់នៅក្នុងកម្មវិធី ONE: WARRIORS OF LIGHT កាលខែឧសភា ឆ្នាំ ២០១៩។ បន្ទាប់មកទៀត រូបគេបានយកឈ្នះ Antonio “Spartan” Caruso និងវីរបុរសហ្វីលីពីន Eduard “Landslide” Folayang រៀងគ្នាកាលខែតុលា ឆ្នាំ ២០១៩ និង ខែមករា ឆ្នាំ ២០២០។
អ្នកលេងគុនចម្រុះសញ្ជាតិហូឡង់ មកពីក្រុង Breda កត់ចំណាំថា ៖«Christian Lee គឺជាជើងឯក World Champion នាពេលនេះ។ ដូច្នេះគោលដៅចម្បងរបស់ខ្ញុំគឺរូបគេ។ ខ្ញុំពិតជាមិនខ្វល់ថានរណាទេ មិនខ្វល់ពេលណា ឬ កន្លែងណានោះទេ...ឲ្យតែមានពេលសមស្របខ្ញុំច្បាស់ជាចង់ប្រកួតមិនខាន»។
កីឡាករដដែលបញ្ជាក់ថា ៖«ការប្រកួតលើកទី២ ខ្ញុំប្រើពេល៣សប្ដាហ៍ដើម្បីម៉ិកគូប្រកួត ហើយការប្រកួតចុងក្រោយ ខ្ញុំប្រើពេល ២សប្ដាហ៍ដើម្បីពិនិត្យមើលគូប្រជែងពេលជួបអតីតម្ចាស់ខ្សែក្រវាត់ World Champion និងជាជើងខ្លាំងម្នាក់របស់ហ្វីលីពីន»។
ដោយសារជ័យជម្នះ៨ លើកជាប់គ្នារួមទាំងការឈ្នះនៅសង្វៀន The Home Of Martial Arts(ONE) ផង Buist កំពុងតែស្វែងរកចំណុចខ្លាំងបំផុតក្នុងទម្ងន់ lightweight ។ រូបគេជឿជាក់ថានឹងអាចផ្ដួលកីឡាករកំពូលៗជាច្រើនទៀតក្នុងទម្ងន់នេះ។
ទោះជាបែបណាក្ដីតារាជើងខ្លាំងមកពីហូឡង់ចាត់ទុក Lee ជាដៃគូកំពូលដែលចង់ជួបបំផុតរបស់ខ្លួន។ កីឡាករមកពីក្លិប Combat Brothers គិតតែម្យ៉ាង គឺ ចង់បានឱកាសដណ្ដើមខ្សែក្រវាត់ ONE Lightweight World Champion។ នៅពេល “The Archangel” ទទួលបានឱកាស រូបគេធានាយកខ្សែក្រវាត់ឲ្យខាងតែបាននិងចាកចេញពីសង្វៀនដោយភាពរីករាយអមដោយខ្សែក្រវាត់។
“The Archangel” បង្ហាញការតាំងចិត្តទៀតថា ៖«ខ្ញុំចង់បានជើងឯក។ ខ្ញុំចង់គ្រងខ្សែក្រវាត់។ ខ្ញុំមានអារម្មណ៍ថាខ្ញុំអាចធ្វើបាន។ វ័យខុសគ្នា តែខ្ញុំមានប្រៀបលើអាយុ។ យ៉ាងណាយើងជាកីឡាករប្រកួតបានល្អបំផុតដូចគ្នា។ តែខ្ញុំមានប្រៀបលើជំនាញជាច្រើន។ សូមជឿខ្ញុំចុះ។ យ៉ាងណា Lee គឺជាជើងឯកពិតប្រាកដ ហើយខ្ញុំក៏មិនមើលងាយគេដែរ។ ប៉ុន្តែរឿងធំ គឺ ត្រូវយកឈ្នះរូបគេឲ្យបាន»៕