COVID-19
អន្តរជាតិ
ប្រមុខការទូតឥណ្ឌូណេស៊ី ជំរុញឲ្យភាគីជម្លោះនៅសមុទ្រចិនខាងត្បូង រក្សាភាពស្ងប់ស្ងាត់ រូបភាព៖ Straits Times Graphics
× ប្រមុខការទូតឥណ្ឌូណេស៊ី លោកស្រី Retno Marsudi បានបង្ហាញក្តីបារម្ភជុំវិញបញ្ហាភាពតានតឹងនៅក្នុងតំបន់សមុទ្រចិនខាងត្បូង ដែលបានកើតឡើងសារជាថ្មី ក្នុងរយៈពេលចុងក្រោយនេះ។ លោកស្រីរដ្ឋមន្ត្រី បានស្នើឲ្យប្រទេសទាំងអស់គោរពទៅតាមច្បាប់អន្តរជាតិ រក្សាស្ថិរភាព និងសន្តិភាពនៅក្នុងតំបន់។ ភាពតានតឹងនៅក្នុងតំបន់សមុទ្រចិនខាងត្បូងនេះ កើតឡើងខណៈពេលពិភពលោកកំពុងជាប់ដៃប្រយុទ្ធប្រឆាំងនឹងជំងឺ COVID-19 ។
តំបន់សមុទ្រចិនខាងត្បូង បានកើនឡើងកម្តៅសារជាថ្មី ចាប់តាំងពីចិនបង្កើតដែនរដ្ឋបាលរបស់ខ្លួននៅប្រជុំកោះ Paracel និង Spratly មក។ ប៉ុន្មានថ្ងៃបន្ទាប់ពីបង្កើតដែនរដ្ឋបាល វៀតណាម បានចេញសេចក្តីថ្លែងការណ៍មួយតវ៉ាជុំវិញបញ្ហានេះ។ មិនត្រឹមតែប៉ុណ្ណោះនាវាអាមេរិក USS Barry ក៏បានបើកក្បែរប្រជុំកោះ Paracel ផងដែរ ដោយផ្អែកលើ «ប្រតិបត្តិការសេរីភាពនៃនាវាចរណ៍»។ ទាក់ទងនឹងបញ្ហានេះ ចិនបានចេញមុខជំទាស់យ៉ាងខ្លាំង និងថា អាមេរិកចូលចិត្តនាំរឿងមកក្នុងតំបន់សមុទ្រចិនខាងត្បូង។
ដោយមើលឃើញពីបញ្ហានេះ ឥណ្ឌូណេស៊ី ដែលត្រូវបានគេចាត់ទុកជាមេដឹកនាំបងធំអាស៊ាន បានចេញមុខទទូចឲ្យប្រទេសជម្លោះទាំងអស់រក្សាភាពស្ងប់ស្ងាត់ជាជាងបង្ហាញកម្លាំងដាក់គ្នា។ ថ្លែងក្នុងសន្និសីទកាសែតថ្ងៃទី៦ ខែឧសភា លោកស្រី Retno Marsudi រដ្ឋមន្ត្រីក្រសួងការបរទេស បានទទូចឲ្យភាគីជម្លោះទាំងអស់រក្សាសន្តិភាព និងស្ថិរភាពនៅក្នុងតំបន់ដើម្បីធានាសេរីភាពនាវាចរណ៍ និងការហោះហើរ ជាពិសេសគោរពតាមច្បាប់អន្តរជាតិ ឬអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ ។
ក្នុងន័យនេះ ឥណ្ឌូណេស៊ី ស្នើឲ្យភាគីពាក់ព័ន្ធទាំងអស់ ជៀសវាងប្រើប្រាស់កម្លាំងដាក់គ្នា ដែលនាំឲ្យបំផ្លាញដល់ទំនាក់ទំនង និងទំនុកចិត្តរបស់ប្រទេសទាំងអស់ និងបង្កឲ្យការរីកសាយនៃភាពតានតឹងនៅក្នុងតំបន់។ លោកស្រី Marsudi បាននិយាយបែបនេះ ដោយបន្ថែមថា ឥណ្ឌូណេស៊ី កំពុងឃ្លាំមើលស្ថានការណ៍ នៅក្នុងតំបន់សមុទ្រចិនខាងត្បូងយ៉ាងម៉ត់ចត់បំផុត។
បន្ថែមពីលើនេះ លោកស្រីរដ្ឋមន្ត្រីការបរទេសឥណ្ឌូណេស៊ី ក៏បានលើកឡើងពីក្រមប្រតិបត្តិស្តីពីតំបន់សមុទ្រចិនខាងត្បូង (Code of Conduct) ផងដែរ។ ត្រង់ចំណុច លោកស្រីអះអាងថា ឥណ្ឌូណេស៊ី នៅតែបន្តការប្តេជ្ញារបស់ខ្លួន ដើម្បីបញ្ចប់ក្រមប្រតិបត្តិនេះ។ ប៉ុន្តែការចរចានៃក្រមប្រតិបត្តិនេះ គឺយឺតណាស់។
នាខែមេសាកន្លងទៅ រដ្ឋមន្ត្រីការបរទេសម៉ាឡេស៊ី ក៏បានចេញសេចក្តីប្រកាសឲ្យភាគីជម្លោះមានភាពស្ងប់ស្ងាត់ និងរក្សាសន្តិភាពផងដែរ បន្ទាប់ពីនាវាស្រាវជ្រាវរបស់ចិន ដេញតាមនាវារុករករបស់ម៉ាឡេស៊ី។ ភាពតានតឹងនៅក្នុងតំបន់សមុទ្រចិនខាងត្បូង បានកើតឡើង ខណៈពេលភាគីជម្លោះ ក៏ដូចជាពិភពលោកទាំងមូល កំពុងជាប់ដៃប្រយុទ្ធប្រឆាំងជាមួយ COVID-19 ៕
Tag:
ឥណ្ឌូណេស៊ី
ចិន
អាមេរិក
© រក្សាសិទ្ធិដោយ thmeythmey.com