COVID-19
អន្តរជាតិ
WHO ព្រមានថា អ្នកស្លាប់នៅអាហ្វ្រិកអាចមានរហូត១៩ម៉ឺននាក់ បើមិនអាចទប់ស្កាត់ COVID-19
×![]()
មនុស្សរហូតដល់ ១៩ម៉ឺននាក់ក្នុងទ្វីបអាហ្វ្រិក អាចបាត់បង់ជីវិតដោយសារជំងឺ COVID-19 ក្នុងពេលមួយឆ្នាំ ប្រសិនបើចំណាត់ការទប់ស្កាត់ទទួលបរាជ័យ។ អង្គការសុខភាពពិភពលោក (WHO) ព្រមានបែបនេះ នៅថ្ងៃទី៧ ខែឧសភា។ 
ទីភ្នាក់ងារសុខភាពរបស់អង្គការសហប្រជាជាតិនេះ បានដកស្រង់ការសិក្សាថ្មីមួយ ដែលរៀបចំឡើងដោយការិយាល័យតំបន់ខ្លួនប្រចាំសាធារណរដ្ឋកុងហ្កោ។ ការសិក្សានេះ រកឃើញថា មនុស្សចន្លោះពី៨៣ ០០០នាក់ និង១៩០ ០០០នាក់ អាចស្លាប់ ហើយ ២៨ ទៅ ៤៤លាននាក់ អាចឆ្លង COVID-19 អំឡុងពេលត្រឹមមួយឆ្នាំ។
ក្នុងសេចក្តីថ្លែងការណ៍របស់ខ្លួន អង្គការសុខភាពពិភពលោក គូសបញ្ជាក់ថា ការស្រាវជ្រាវនេះ គឺផ្អែកលើការទម្រង់ព្យាករណ៍ និងគ្របដណ្ដប់៤៧ប្រទេស ជាមួយប្រជាជនសរុប១ពាន់លាននាក់។ ការសិក្សានេះ ព្យាករថា ក្នុងទ្វីបអាហ្វ្រិកមានអត្រាចម្លងជំងឺយឺត អាយុអ្នកជំងឺមានអាការៈធ្ងន់ធ្ងរទាប និងអត្រាស្លាប់ទាប បើប្រៀបធៀបនឹងបណ្ដាប្រទេសផ្សេងទៀតដែលរងគ្រោះខ្លាំងនៅជុំវិញពិភពលោក។
តាមការចុះផ្សាយរបស់ទីភ្នាក់ងារព័ត៌មាន AFP នាយក WHO ទទួលបន្ទុកតំបន់អាហ្វ្រិក លោក Matshidiso Moeti អះអាងថា ខណៈជំងឺ COVID-19 ទំនងជាពុំរីករាលដាលខ្លាំងក្នុងតំបន់អាហ្វ្រិក បើធៀបនឹងកន្លែងផ្សេងលើពិភពលោក វាទំនងនឹងឆ្លងយឺតៗក្នុងតំបន់រងគ្រោះខ្លាំង។ លោកសង្កត់ធ្ងន់ថា COVID-19 អាចក្លាយជាផ្នែកមួយនៃជីវិតរបស់ពលរដ្ឋអាហ្វ្រិកក្នុងពេលប៉ុន្មានឆ្នាំខាងមុខ ប្រសិនបើរដ្ឋាភិបាលក្នុងតំបន់ពុំចាត់ចំណាត់ការសកម្មទេនោះ។លោកអះអាងថា៖ «យើងត្រូវធ្វើតេស្ត តាមដាន និងព្យាបាល»។
ទាំងប្រទេសតូច និងប្រទេសធំក្នុងតំបន់អាហ្វ្រិក គឺសុទ្ធតែប្រឈមហានិភ័យខ្ពស់ ប្រសិនបើចំណាត់ការទប់ស្កាត់ ពុំត្រូវអនុវត្តទេនោះ ។ WHO ព្រមានបែបនេះ។ កន្លងទៅ អ្នកជំនាញ ព្រមានដូចគ្នានេះ ដោយលើកហេតុផលថា បណ្ដាប្រទេសក្នុងតំបន់នេះ មានប្រព័ន្ធសុខាភិបាលខ្សោយ អត្រាភាពក្រីក្រខ្ពស់ និងជម្លោះប្រដាប់អាវុធ ជាដើម។
គិតត្រឹមថ្ងៃទី ៧ ខែឧសភា តំបន់អាហ្វ្រិកទាំងមូល មានករណីឆ្លងCOVID-19សរុប ៥៣ ៣៣៣ករណី និងអ្នកស្លាប់មាន ២០៦៥នាក់ ។ នេះបើតាមការតាមដានរបស់ទីភ្នាក់ងារព័ត៌មាន AFP ៕
Tag:
WHO
អាហ្វ្រិក
COVID-19
© រក្សាសិទ្ធិដោយ thmeythmey.com
