COVID-19
អន្តរជាតិ
អ្នកស្រី Morgan Ortagus អ្នកនាំពាក្យក្រសួងការបរទេសអាមេរិក (AFP)
×![]()
សហរដ្ឋអាមេរិក តាមរយៈក្រសួងការបរទេស បង្ហាញក្តីកង្វល់ជុំវិញ ក្រោយរដ្ឋាភិបាលហ្វីលីពីនបានសម្រេចបិទប្រព័ន្ធផ្សព្វផ្សាយធំមួយ ABS-CBN ដែលធ្លាប់មានបញ្ហាជាមួយប្រធានាធិបតី រ៉ូឌ្រីហ្គោ ឌូទើតេ អំឡុងពេលបោះឆ្នោត។
«យើង ព្រួយបារម្ភពីស្ថានការណ៍ពាក់ព័ន្ធ ABS-CBN »។ អ្នកនាំពាក្យក្រសួងការបរទេសអាមេរិក អ្នកស្រី Morgan Ortagus បញ្ជាក់បែបនេះ នៅថ្ងៃទី៧ ខែឧសភា។ អ្នកស្រី លើកឡើងទៀតថា៖«ប្រព័ន្ធផ្សព្វផ្សាយឯករាជ្យ ដើរតួនាទីយ៉ាងសំខាន់ក្នុងការសម្របសម្រួលការផ្ដោះប្តូរដំណឹង និងគំនិតដ៏បើកចំហ ដែលមានសារសំខាន់សម្រាប់សង្គមប្រជាធិបតេយ្យ វឌ្ឍនភាព និងសេរី»។
តាមការចុះផ្សាយរបស់ទីភ្នាក់ងារព័ត៌មាន AFP អ្នកស្រីអ្នកនាំពាក្យ Ortagus គូសបញ្ជាក់ថា ប្រព័ន្ធផ្សព្វផ្សាយសេរី គឺមានសារសំខាន់ក្នុងការលើកកម្ពស់សុខភាពសាធារណៈ ជាពិសេសក្នុងបរិយាកាសជំងឺរាតត្បាតសកល COVID-19 ។ ត្រង់ចំណុចនេះ អ្នកស្រី សង្កត់ធ្ងន់ដូច្នេះថា៖«នេះ គឺជារឿងពិតសម្រាប់សហរដ្ឋអាមេរិក ហ្វីលីពីន ក៏ដូចជា បណ្ដាប្រទេសនៅជុំវិញពិភពលោក»។
ABS-CBN ដែលជាក្រុមហ៊ុនប្រព័ន្ធផ្សព្វផ្សាយចំណាស់៦៦ឆ្នាំ ត្រូវបានបង្ខំឲ្យផ្អាកប្រតិបត្តិការ បន្ទាប់ពីសភាហ្វីលីពីនដែលកាន់កាប់ដោយក្រុមអ្នកស្មោះស្ម័គ្ររបស់លោក ឌូទើតេ ពុំផ្ដល់អាជ្ញាបណ្ណឲ្យក្រុមហ៊ុននេះជាថ្មី។ ជាច្រើនលើកមកហើយ មេដឹកនាំហ្វីលីពីនរូបនេះ បានគំរាមរាំងខ្ទប់ការផ្ដល់អាជ្ញាបណ្ណជាថ្មីជូនដល់ក្រុមហ៊ុន ABS-CBN ក្រោយប៉ុស្តិ៍ទូរទស្សន៍នេះធ្វើឲ្យលោកខឹង អំឡុងពេលការបោះឆ្នោតប្រធានាធិបតីឆ្នាំ២០១៦ ដោយបដិសេធចាក់ផ្សាយពាណិជ្ជកម្មស្តីពីយុទ្ធនាការបោះឆ្នោតលោក។
ក្រុមហ៊ុនប្រព័ន្ធផ្សព្វផ្សាយធំមួយ បានផ្ដល់ការងារដល់មនុស្សជិត៧០០០នាក់ ហើយពួកគេដំណើរការវិទ្យុ ប៉ុស្ត៍ទូរទស្សន៍ និងចែកចាយមាតិកាតាមអនឡាញ។ ទាក់ទិននឹងការផ្អាកដំណើរការប្រព័ន្ធផ្សព្វផ្សាយឈានមុខមួយក្នុងប្រទេសហ្វីលីពីនបែបនេះ លោក Carlos Conde នៃអង្គការឃ្លាំមើលសិទ្ធិមនុស្ស (HRW) ប្រាប់ AFP ដូច្នេះថា៖«នេះគឺជាការប៉ះពាល់ដ៏ធ្ងន់ធ្ងរចំពោះសិទ្ធិសេរីភាពសារព័ត៌មានក្នុងប្រទេសហ្វីលីពីន។ វាពិបាកនឹងគិតថា លោក ឌូទើតេ មិនចូលពាក់ព័ន្ធនឹងរឿងនេះណាស់»៕
Tag:
ហ្វីលីពីន
សហរដ្ឋអាមេរិក
សារព័ត៌មាន
ABS-CBN
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
