COVID-19
អន្តរជាតិ
COVID-19៖ កូរ៉េខាងត្បូង បង្កើនការប្រុងប្រយ័ត្នក្រោយរកឃើញ១៥ករណីថ្មីនៅក្លិបកម្សាន្ត
ប្រជាជនកូរ៉េខាងត្បូង ដើរកម្សាន្តនៅក្នុងទៅក្រុងសេអ៊ូល។ រូបភាព Bloomberg
×![]()
ដោយ: តន ចាន់រិទ្ធារ៉ា
កូរ៉េខាងត្បូង បានបង្កើនការប្រុងប្រយ័ត្នរបស់ខ្លួន ខណៈករណីឆ្លង COVID-19 ប្រចាំបានកើនឡើងដល់ចំនួនពីរខ្ទង់ក្រោយការបន្ធូរបន្ថយការររឹតត្បិត និងការអនុវត្តគម្លាតសុវត្ថិភាព។ អាជ្ញាធរសុខាភិបាលប្រទេសនេះ នៅថ្ងៃទី៨ ខែឧសភា ក៏បានប្រកាសពីបណ្ដុំករណីឆ្លង COVID-19 ថ្មីដែលកើតមានក្នុងកន្លែងក្លិបកម្សាន្តក្នុងទីក្រុងសេអ៊ូល។ បណ្ដុំករណីឆ្លងថ្មីនេះ មានអ្នកឆ្លង១៥នាក់ ហើយអាជ្ញាធររំពឹងថា ចំនួននេះអាចកើនឡើងថែមទៀត។
មជ្ឈមណ្ឌលបង្ការ និងគ្រប់គ្រងជំងឺឆ្លងកូរ៉េ (KCDC) បានប្រកាសនៅថ្ងៃទី៨ ខែឧសភា ពីករណីជំងឺ COVID-19 ចំនួន១២នាក់ទៀត ដែលភាគច្រើនជាករណីនាំចូល។ តួលេខឆ្លងសរុបនៅប្រទេសនេះ ឡើងដល់១០៨២២នាក់។ អ្វីដែលធ្វើឲ្យគេបារម្ភនោះ អាជ្ញាធរសុខាភិបាលកូរ៉េខាងត្បូង ក៏ប្រកាសពីករណីឆ្លងថ្មីចំនួន១៣នាក់ទៀត ដែលជាបណ្ដុំឆ្លងថ្មី។
ករណីឆ្លងទាំងអស់នៅថ្ងៃទី៨ ខែឧសភានេះ ជាប់ទាក់ទងនឹងបុរសម្នាក់ដែលត្រូវបានរកឃើញថា មានផ្ទុក COVID-19 ។ ទីភ្នាក់ងារព័តមាន Yonhap ផ្សាយថា បុរសវ័យ២៩ឆ្នាំម្នាក់នេះ ចូលទៅកម្សាន្តក្នុងក្លិបចំនួន៣ ក្នុងតំបន់ពហុវប្បធម៌ Itaewon ដ៏ល្បីឈ្មោះប្រចាំរដ្ឋធានីសេអ៊ូល នៅមុនប៉ុន្មានថ្ងៃដែលរដ្ឋាភិបាលសម្រេចចិត្តបន្ធូរបន្ថយការរឹតត្បិត។ មកទល់ពេលនេះ មនុស្ស១៥នាក់ហើយដែលរកឃើញថា មាន COVID-19 ក្រោយទៅកាន់ទីតាំងកម្សាន្តនោះ។
បើតាមអាជ្ញាធរកូរ៉េខាងត្បូង មនុស្សយ៉ាងហោចណាស់១៥០០នាក់ បានទៅកម្សាន្តក្នុងក្លិប និងបារដែលបុរសខាងលើមានវត្តមាន ខណៈបុរសដដែលនេះ ក៏មិនបានពាក់ម៉ាស់ការពារទៅទៀត។ អនុរដ្ឋមន្ត្រីសុខាភិបាលកូរ៉េខាងត្បូង Kim Gang-lip ព្រមានថា ចំនួនករណីឆ្លងទាក់ទំនងបណ្ដុំថ្មីនេះ ទំនងកើនឡើងថែមទៀត។ លោកបានទទូចឲ្យអ្នកដែលទៅកម្សាន្តនៅទីតាំងទាំងនោះ ដាក់ខ្លួនឯងនៅដោយឡែកតាមផ្ទះរៀងៗខ្លួន ហើយទាក់ទងទៅកាន់មន្ត្រីសុខាភិបាល។
លើសពីនោះ ប្រតិបត្តិការតាមរកអ្នកដែលទៅកាន់ក្លិបខាងលើ ក៏ធ្វើឡើងជាប្រញាប់ផងដែរ ដោយប្រើប្រាស់ការចាយវាយតាមកាតអេឡិចត្រូនិច និងកាមេរ៉ាដើម្បីចាប់ទិសដៅធ្វើដំណើរផងដែរ។ ការរកឃើញបណ្ដុំករណីឆ្លងថ្មី ក៏បង្ខំឲ្យអាជ្ញាធរកូរ៉េខាងត្បូង ត្រូវបង្កើនការប្រយ័ត្នមួយកម្រិតវិញក្រោយការបន្ធូរបន្ថយ នៅពេលដែលនិន្នការឆ្លងថ្មីធ្លាក់ចុះ។
ជាវិធានការថ្មី រដ្ឋាភិបាលកូរ៉េខាងត្បូង ក៏ដាក់ចេញការណែនាំថ្មីមួយ ដោយលើកទឹកចិត្តឲ្យទីតាំងកម្សាន្តទាំងអស់នៅទូទាំងបន្តបិទទ្វារមួយខែទៀត។ ប៉ុន្តែវិធានការនេះ មិនមែនជាការដាក់កំហិតឡើយសម្រាប់ស្ថានភាពបច្ចុប្បន្ន៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com
