COVID-19
ជាតិ
សម្តេច ស ខេង៖ កម្ពុជាមិនដោះលែងអ្នកទោសដោយបារម្ភបញ្ហាកូវីដ-១៩ ដូចប្រទេសមួយចំនួនឡើយ
សម្ដេច ស ខេង ក្នុងកិច្ចប្រជុំថ្ងៃទី៨ ឧសភា ឆ្នាំ២០២០ (រូបពីទំព័រហ្វេសប៊ុករបស់សម្ដេច ស ខេង)
×![]()
ដោយ: ឡាយ សុភាវតី
ភ្នំពេញ៖ សម្ដេចឧបនាយករដ្ឋមន្ត្រី ស ខេង រដ្ឋមន្រី្តក្រសួងមហាផ្ទៃ បានប្រជុំពិភាក្សារកដំណោះស្រាយពីបញ្ហាចង្អៀតណែនក្នុងពន្ធនាគារ និងសំណុំរឿងមួយចំនួនដែលមិនទាន់បានដោះស្រាយ ដើម្បីពន្លឿនការកកស្ទះសំណុំរឿង។ នេះបើតាមការចេញផ្សាយលើទំព័រហ្វេសប៊ុករបស់ក្រសួងមហាផ្ទៃ។ 
កិច្ចប្រជុំនៅទីស្តីការក្រសួងមហាផ្ទៃថ្ងៃទី៨ ឧសភានេះ សម្តេច ស ខេង បានដឹកនាំកិច្ចប្រជុំអន្តរក្រសួងដើម្បីពិភាក្សាដោះស្រាយបញ្ហាចង្អៀតណែនក្នុងពន្ធនាគារ ដោយមានការចូលរួមពីរដ្ឋមន្ត្រីក្រសួងយុត្តិធម៌ អ្នកជំនាញផ្នែកច្បាប់ ព្រមទាំងស្ថាប័នអង្គភាព ភាគីពាក់ព័ន្ធជាច្រើនផងដែរ។
សម្ដេច ស ខេង ថ្លែងថា៖ «តាមរយៈជំងឺកូវីដ-១៩ ដែលយើងកំពុងជួបប្រទះនេះ ប្រទេសមួយចំនួនបានដោះលែងអ្នកទោស ប៉ុន្ដែយើងមិនដល់ថ្នាក់នឹងទេ គឺនៅរក្សាបាន ប៉ុន្ដែទោះបីយ៉ាងណាក៏ដោយ គឺយើងបន្ដដោះស្រាយការកកស្ទះនេះ ទៅនឹងភាពចង្អៀតណែន»។
យុទ្ធនាការដោះស្រាយការកកស្ទះសំណុំរឿងនិងភាពចង្អៀតណែនក្នុងពន្ធនាគារ គឺជាកិច្ចសំខាន់មួយរបស់ក្រសួងមហាផ្ទៃ និងក្រសួងយុត្តិធម៌ រួមទាំងការយុទ្ធនាប្រយុទ្ធប្រឆាំងគ្រឿងញៀនខុសច្បាប់ផងដែរ។ ប៉ុន្មានឆ្នាំចុងក្រោយនេះ បទល្មើសគ្រឿងញៀនបានស្ថិតក្នុងភាគរយខ្ពស់ជាងគេ ធៀបនឹងបទល្មើសផ្សេងៗដែលបានបញ្ជូនទៅតុលាការ ខណៈបទល្មើសនេះក៏មិនត្រូវបានអនុញ្ញាតឱ្យស្នើសុំលើកលែង និងបន្ធូរបន្ថយទោសដែរ។ នេះបើតាមការលើកឡើងរបស់សម្ដេច ស ខេង។
ជាមួយគ្នាដែរ លោក កើត រិទ្ធ លើកឡើងថា ចំនួនអ្នកជាប់ឃុំខ្លួននៅក្នុងពន្ធនាគារ គឺបានកើនឡើង បើតាមរបាយការណ៍យុទ្ធនាការប្រយុទ្ធប្រឆាំងគ្រឿងញៀននាពេលកន្លងទៅ។ ជនល្មើសដែលត្រូវបានចាប់ខ្លួនពីបទល្មើសគ្រឿងញៀន មានប្រមាណ២ម៉ឺននាក់ ហើយសំណុំរឿងនេះ ត្រូវបានកើនឡើងជាគំហុកនៅតាមសាលាដំបូង។ ចំណែកអ្នកជាប់ឃុំ នៅតាមពន្ធនាគារក៏មានការកើនឡើងផងដែរ។
កន្លងមកអ្នកនាំពាក្យក្រសួងមហាផ្ទៃ លោក ខៀវ សុភ័គ បានលើកថា ក្រសួងមហាផ្ទៃកំពុងជំរុញគម្រោងសាងសង់និងជួសជុលកែលម្អអគារឃុំឃាំងនានាក្នុងពន្ធនាគារ ដើម្បីដោះស្រាយបញ្ហាចង្អៀតណែននេះ។ គម្រោងនេះ ធ្វើឡើងដោយសារកម្ពុជានាពេលបច្ចុប្បន្ន មានអ្នកជាប់ឃុំប្រមាណ៣,៨ម៉ឺននាក់ ក្នុងនោះស្ត្រីមានជាង២,៥ពាន់នាក់។ នេះបើតាមការលើកឡើងរបស់លោក ខៀវ សុភ័គ កាលពីថ្ងៃទី១២មីនា ឆ្នាំ២០២០ ក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅ ការងារបន្ដរបស់ក្រសួងមហាផ្ទៃ»៕
Tag:
ពន្ធនាគារ
© រក្សាសិទ្ធិដោយ thmeythmey.com
