COVID-19
អន្តរជាតិ
នៅផ្ទះទប់ស្កាត់ COVID-19 នាំឲ្យពលរដ្ឋបារាំងឡើងទម្ងន់ជាមធ្យម២.៥គីឡូ
× ការរស់នៅក្នុងផ្ទះដើម្បីចូលរួមក្នុងយុទ្ធនាការទប់ស្កាត់ការរាលដាល COVID-19 នាំឲ្យពលរដ្ឋបារាំងជួបនូវស្ថានភាពថ្មីមួយទៀតទាក់ទងនឹងសុខភាព។ វិទ្យាស្ថានស្ទង់មតិសាធារណៈ Ifop បានសិក្សាឃើញថា ពលរដ្ឋបារាំងកើនទម្ងន់ជាមធ្យម២.៥គីឡូក្រាមបន្ថែមទៀត នៅពេលដែលពួកគេមិនបានចេញទៅណាក្រៅពីផ្ទះរបស់ខ្លួន។
ការសិក្សាដែលបង្ហាញនៅលើគេហទំព័រ Darwin Nutrition បានបង្ហាញថា ជនជាតិបារាំង៥៧ភាគរយដែលត្រូវបានសម្ភាសសុទ្ធតែអះអាងពីការឡើងទម្ងន់បន្ថែមរបស់ខ្លួន ខណៈ២៩ភាគរយ និយាយថា ពួកគេបានមានឱកាសសម្រករាង។
បើតាមលទ្ធផល អ្នកដែលឡើងទម្ងន់មានបុរស៥៦ភាគរយ ដែលឡើងជាមធ្យម ២.៧គីឡូក្រាម រីឯស្ត្រី៥៨ភាគរយ ឡើងជាមធ្យម ២.៣គីឡូក្រាម។ ស្របពេលដែលការសិក្សាបង្ហាញពីពលរដ្ឋបារាំង៦៦ភាគរយ ឡើងទម្ងន់ក្រោម២គីឡូក្រាម ក៏មាន១៣ភាគរយ ឡើងលើស៥គីឡូក្រាមផងដែរ នារយៈបេល៧សប្តាហ៍ចុងក្រោយនេះ។
លទ្ធផលនៃការឡើងទម្ងន់របស់ពលរដ្ឋបារាំងនោះ បានបង្ហាញថា ៤២ភាគរយចូលចិត្តញ៉ាំអាហារផ្សេងៗមុនពេលបាយ។ ជាមួយគ្នានោះ ២៣ភាគរយញ៉ាំសូកូឡា និង២០ភាគរយ បរិភោគច្រើនជាងពេលធម្មតា។
ទោះបីជាយ៉ាងណាក៏ដោយ ការបន្តរស់នៅក្នុងផ្ទះនាអំឡុងពេល COVID-19 ហាក់មិនបានផ្លាស់ប្តូរទម្លាប់ក្នុងគ្រួសារបារាំងនោះឡើយ ដោយស្ត្រីប្រមាណ៦០ភាគរយនៅតែបន្តភារកិច្ចជាមេចុងភៅ ហើយបុរសតែ២១ភាគរយប៉ុណ្ណោះដែលជួយសម្រាលបន្ទុកភរិយា៕
© រក្សាសិទ្ធិដោយ thmeythmey.com