ចិន នឹងធ្វើកំណែទម្រង់ប្រព័ន្ធគ្រប់គ្រងនិងបង្ការជំងឺ ក្រោយថ្លោះធ្លោយ COVID-19

COVID-19

អន្តរជាតិ

ចិន នឹងធ្វើកំណែទម្រង់ប្រព័ន្ធគ្រប់គ្រងនិងបង្ការជំងឺ ក្រោយថ្លោះធ្លោយ COVID-19

09, May 2020 , 4:33 pm

រូបភាព

លោក Li Bin អនុរដ្ឋមន្ត្រីនៃគណៈកម្មការសុខាភិបាលជាតិចិន (កណ្ដាល) ប្រាប់អ្នកសារព័ត៌មានបែបនេះ នៅថ្ងៃទី ៩ ខែឧសភា (Xinhua)

ដោយ:

រដ្ឋាភិបាលចិន នឹងធ្វើកំណែទម្រង់ប្រព័ន្ធបង្ការនិងគ្រប់គ្រងជំងឺខ្លួន ដើម្បីដោះស្រាយភាពទន់ខ្សោយដែលលាតត្រដាងឡើងដោយការរីករាលដាល COVID-19។ មន្ត្រីសុខាភិបាលជាន់ខ្ពស់ចិន បញ្ជាក់បែបនេះនៅថ្ងៃទី៩ ខែឧសភា។

ចិន រងការរិះគន់ទាំងក្នុងស្រុក និងអន្តរជាតិ ដោយសារយឺតយ៉ាវក្នុងការឆ្លើយតបនឹងជំងឺរាតត្បាត COVID-19 ដែលផ្ទុះឡើងដំបូងក្នុងក្រុង វូហាន ខេត្ត ហូប៉ីភ ភាគកណ្ដាលនៃប្រទេសចិន កាលពីចុងឆ្នាំ២០១៩។ ចាប់តាំងពីពេលនោះមក វីរុសនេះ បានរាតត្បាតនៅជុំវិញពិភពលោក ដែលឆ្លងមនុស្សជិត៤លាននាក់ និងសម្លាប់មនុស្សជាង២៧ម៉ឺននាក់ហើយ។

«ជំងឺរាតត្បាតសកល COVID-19 គឺជាការធ្វើតេស្តដ៏ធំមួយសម្រាប់អភិបាលកិច្ចនិងសមត្ថភាពដឹកនាំរបស់ប្រទេសយើង ហើយវាបានលាតត្រដាងភាពទន់ខ្សោយពាក់ព័ន្ធនឹងប្រព័ន្ធសុខភាពសាធារណៈយើង និងវិធីសាស្ត្ររបស់យើងក្នុងការទប់ទល់ជំងឺរាតត្បាតទ្រង់ទ្រាយធំ»។ លោក Li Bin អនុរដ្ឋមន្ត្រីនៃគណៈកម្មការសុខាភិបាលជាតិចិន ប្រាប់អ្នកសារព័ត៌មានបែបនេះ។

បើតាមទីភ្នាក់ងារព័ត៌មាន Reutets លោក Li សង្កត់ធ្ងន់ថា គណៈកម្មការជាតិនេះ មានបំណងធ្វើកំណែទម្រង់ កសាងប្រព័ន្ធគ្រប់គ្រងមានប្រសិទ្ធភាព ក៏ដូចជាធ្វើទំនើបកម្មលើប្រព័ន្ធគ្រប់គ្រងនិងបង្ការជំងឺ។

ម្យ៉ាងវិញទៀត លោក អះអាងថា គណៈកម្មការលោក ក៏មានគោលដៅប្រើប្រាស់ឲ្យកាន់តែប្រសើរជាងមុននូវទិន្នន័យធំ (big data) បញ្ញាសិប្បនិម្មិត (AI) និងប្រព័ន្ធ cloud computing ដើម្បីវិភាគជំងឺ តាមដាន និងចែកចាយធនធាន។ ទន្ទឹមនេះ គណៈកម្មការនេះ ក៏មានផែនការបង្កើនការស្រាវជ្រាវលើបច្ចេកវិទ្យាស្នូល ពង្រឹងការធានាគុណភាពវេជ្ជសាស្ត្រ ហើយជាពិសេសការផ្គត់ផ្គង់គ្រឿងបរិក្ខារអាសន្នផងដែរ។

គិតមកត្រឹមថ្ងៃទី៩ ខែឧសភានេះ ចិនពុំបានរកឃើញករណីស្លាប់ថ្មីដោយសារCOVID-19 ២៤ថ្ងៃមកហើយ។ ចិនមានករណីឆ្លងសរុប ៨២ ៨៨៧ករណី ខណៈអ្នកស្លាប់មាន ៤៦៣៣នាក់។ អ្នកជាសះស្បើយមាន៧៨ ០៤៦នាក់។ នេះបើតាមវេបសាយ worldometers៕