ជាតិ
លោក Peter Studer ក៏ដូចជាលោក Beat Richner ផងដែរ មួយជីវិតដើម្បីកុមារកម្ពុជា!
×![]()
ដោយ: ផាត ដាណេ
ភ្នំពេញ៖ វេជ្ជបណ្ឌិត Peter Studer អនុប្រធានក្រុមប្រឹក្សាភិបាល និងជានាយកប្រតិបត្តិមូលនិធិគន្ធបុប្ផា (Kantha Bopha Foundation Dr Beat Richner) បានទទួលមរណភាពក្នុងអាយុ៧៣ឆ្នាំ ដោយរោគាពាធ កាលពីថ្ងៃទី៦ ខែឧសភា ឆ្នាំ២០២០ នៅប្រទេសស្វីស។ ថ្វីត្បិតតែឈ្មោះរបស់លោក Peter Studer មិនត្រូវបានសាធារណជនស្គាល់ជាទូទៅក៏ដោយ ប៉ុន្តែលោកត្រូវបានចាត់ទុកជាវីរបុរសម្នាក់របស់កុមារកម្ពុជា ដែលបានរួមដៃគ្នាជាមួយវេជ្ជបណ្ឌិត Beat Richner ក្នុងការកសាងមន្ទីរពេទ្យគន្ធបុប្ផាឡើងវិញចាប់តាំងពីឆ្នាំ១៩៩២មក។
អត្ថបទទាក់ទង
សារព័ត៌មានថ្មីៗ សូមដកស្រង់ជីវប្រវត្តិរបស់វេជ្ជបណ្ឌិត ភីធីរ ស្ទូឌ័រ ដោយផ្អែកតាមការចុះផ្សាយរបស់បណ្តាញសង្គមមូលនិធិមន្ទីរពទ្យេគន្ធបុប្ផា៖
វេជ្ជបណ្ឌិត Peter Studer កើតនៅថ្ងៃទី១៤ ខែមីនា ឆ្នាំ១៩៤៧។ លោកមានស្រុកកំណើតនៅទីក្រុងលូស៊ាន ក្នុងប្រទេសស្វីស ហើយលោកជាកូនទី២ ក្នុងគ្រួសារមួយដែលមានកូន៣នាក់ ស្រីម្នាក់ និងប្រុស២នាក់។ លោក Peter Studer បានបញ្ចប់ការសិក្សាថ្នាក់វិទ្យាល័យ នៅក្នុងទីក្រុងប៊ែន ប្រទេសស្វីស ក្រោយបញ្ចប់ការសិក្សាថ្នាក់វិទ្យា លោកក៏បានបន្តការសិក្សានៅមហាវិទ្យាល័យ វេជ្ជសាស្ត្រ ចាប់ពីឆ្នាំ១៩៦៨ ដល់ឆ្នាំ១៩៧៥។ នៅឆ្នាំ១៩៧៧ លោក Peter Studer បានបញ្ចប់ការសិក្សាដោយជោគជ័យ ហើយក៏បានក្លាយទៅជាវេជ្ជបណ្ឌិតឯកទេសជំងឺកុមារ នៅមូលនិធិគន្ធបុប្ផាស្វីស។
វេជ្ជបណ្ឌិត Peter Studer បានរស់នៅជាមួយអ្នកស្រី Genevieve F. Cattin អស់រយៈពេល៤០ឆ្នាំ ហើយទើបតែរៀបការជាមួយគ្នានៅថ្ងៃទី២០ ខែធ្នូ ឆ្នាំ២០១៩ ក្រោយពេលលោកបានធ្លាក់ខ្លួនឈឺ។ អ្នកស្រី Genevieve F. Cattin ជាស្ត្រីតែម្នាក់ដែលតែងតែនៅក្បែរចាំមើលថែរក្សា នៅគាំទ្រនិងលើកទឹកចិត្តចំពោះគ្រប់សកម្មភាព និងការពលិកម្មរបស់លោក Peter Studer ក្នុងបេសកម្មយ៉ាងវែងឆ្ងាយ ដើម្បីបុព្វហេតុមន្ទីរពេទ្យគន្ធបុប្ផា និងកុមារកម្ពុជា អស់រយៈពេល២៨ឆ្នាំ នៃជីវិតរបស់លោក។
រយៈពេល៣០ឆ្នាំនៃជីវិតចុងក្រោយ លោកវេជ្ជបណ្ឌិត Peter Studer បានផ្សារភ្ជាប់ជីវិតរបស់លោកយ៉ាងជ្រាលជ្រៅបំផុត ជាមួយនឹងប្រជាជនកម្ពុជា និងប្រទេសកម្ពុជា ចាប់ពីពេលដែលលោកបានមកបំពេញការងារមនុស្សធម៌នៅជនភាសខ្លួនខ្មែរថៃ លើកដំបូងឆ្នាំ១៩៨១ និងក្នុងបេសកម្មរបស់កាកបាទក្រហមស្វីសនៅក្នុងខេត្តកំពង់ចាម ឆ្នាំ១៩៨២។
លោកវេជ្ជបណ្ឌិត Peter Studer និងអតីតស្ថាបនិក វីរបុរសនៃកុមារកម្ពុជា Dr. Beat Richner បានរួមគ្នាបង្កើតមូលនិធិគន្ធបុប្ផា ដែលលោកបានលះបង់ពេលវេលា សុភមង្គលគ្រួសារ ខិតខំជំនះរាល់ឧបសគ្គសព្វបែបយ៉ាងក្នុងនាមជាអនុប្រធានមូលនិធិគន្ធបុប្ផាស្វីស។ មូលនិធិគន្ធបុប្ផា បានបង្កើតឡើងនៅឆ្នាំ១៩៩២។ ក្រោយមរណភាពរបស់ លោក Dr. Beat Richner នៅឆ្នាំ២០១៧ បន្ទុកការងារទាំងអស់ក្នុងមូលនិធិ និងមន្ទីរពេទ្យទាំងមូល ត្រូវបានធ្លាក់មកលើលោកវេជ្ជបណ្ឌិត Peter Studer ដែលជាប្រធានប្រតិបត្តិមូលនិធិគន្អបុប្ផាស្វីសថ្មី (CEO) មុនពេលដែលលោកធ្លាក់ខ្លួនឈឺនាចុងឆ្នាំ២០១៩៕
Tag:
ជីវព័ត៌មាន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
